Esiteri 5:1-14
5 Ena ikatolu ni siga,+ e vakaisulu ni ranadi o Esiteri qai lai duri ena rara e loma ni valenitui donuya na valenitui ena gauna e dabe tiko kina na tui ena nona idabedabe vakaturaga, ena vale vakaturaga veibasai kei na katuba.
2 Ni raica ga na tui ni duri tiko o Ranadi Esiteri ena raranivale, e marau sara ga mani dodoka vua na ititoko vakatui koula+ e taura tiko. E toro yani o Esiteri me tara na ulu ni ititoko.
3 E tarogi koya na tui: “Na cava o vinakata Ranadi Esiteri? Na cava o kerea? E rawa mada ga ni soli vei iko e veimama na noqu matanitu!”
4 E kaya o Esiteri: “Ke vinaka vua na tui, moni lako mada mai nikua kei Emani+ ina dua na kanavata au vakarautaka vua.”
5 E mani tukuna na tui vei ira na nona tamata: “Moni tukuna vei Emani me vakatotolo mai me vaka e kerea o Esiteri.” E qai lako na tui kei Emani ina kanavata e vakarautaka o Esiteri.
6 Ni ratou gunu waini tiko e qai tarogi Esiteri na tui: “Na cava o vinakata? Ena soli vei iko! Na cava o kerea? E rawa mada ga ni soli vei iko e veimama na noqu matanitu!”+
7 E sauma o Esiteri: “Qo na noqu kerekere kei na ka au vinakata,
8 Ke oni vakadonui au na tui, ke taleitaka tale ga na tui me vakadonuya na noqu kerekere me cakava na ka au vinakata, moni lako mada mai na tui kei Emani ina dua na kanavata au na vakarautaka vei kemudrau nimataka, au na qai vakayacora nimataka na ka oni vinakata na tui.”
9 E marau o Emani ni lako yani ena siga oya qai reki na lomana. Ia ni raici Motekai ga ena matamata ni tui ni sega ni tucake se vakarokoroko e matana, e katakatataki Motekai+ sara ga.
10 la e kinoca nona cudru o Emani e lako sara ina nona vale. E qai talatala mera lako yani na nona itokani kei na watina o Seresi.+
11 E sakitaka o Emani na levu ni nona iyau, na levu ni luvena tagane,+ ni toroya cake tale ga na tui na nona itutu me vakacerecerei koya vei ira kece na vo ni turaga kei ira na dauveiqaravi ni tui.+
12 E tukuna tale o Emani: “E sega tale ni dua e sureta o Ranadi Esiteri, o yau ga meu lako vata kei na tui ena kanavata e vakarautaka.+ E sureti au tale tu ga nimataka vata kei na tui.+
13 Ia au sega ga ni lomavakacegu ena ka kece qo niu raici Motekai na Jiu ni dabe tiko ena matamata ni tui.”
14 E kaya sara vua o Seresi na watina kei ira kece na nona itokani: “Me vakaduri mada e dua na kau e 50 na kiupiti* na kena cere. Mo qai tukuna vua na tui ena mataka me vakaliligi kina+ o Motekai. Oti mo lako vata kei na tui ina kanavata ni marau.” E taleitaka na vakatutu qo o Emani, e tukuna sara me vakaduri e dua na kau.
