Esiteri 9:1-32
9 Ena ika13 ni siga ni ika12 ni vula, oya na vula o Eta,*+ na gauna me vakayacori kina na vosa kei na lawa ni tui,+ na siga era namaka na kedra meca na Jiu mera valuti ira kina, qai yaco na kena veibasai nira vakadrukai ira tale na cati ira o ira na Jiu.+
2 Era soqoni vata na Jiu ena nodra koro ena yasana kece e lewa o Tui Esuerosi+ mera ravuti ira na via vakacacani ira, qai sega ni dua e vorati ira rawa nira domobulataki ira na Jiu na lewe ni veivanua kece.+
3 Era tokoni ira na Jiu o ira kece na turaga ni veiyasana, o ira na vakailesilesi liu ni yasana,+ o ira na kovana, kei ira era qarava na nona cakacaka na tui nira rerevaki Motekai.
4 E vosayaco o Motekai+ ena valenitui, e rogovaki ena yasana kece na kena irogorogo ni kaukaua tiko ga na turaga qo.
5 Era ravuta kece na kedra meca na Jiu ena iseleiwau, era vakamatei ira, era vakarusai ira, era cakava na ka ga era vinakata vei ira na cati ira tiko.+
6 Mai Susani*+ na vanua viribaiti* era vakamatea na Jiu e 500 na tamata ra qai vakarusa.
7 Era vakamatei Parisadaca tale ga, o Talifoni, o Asepaca,
8 o Poraca, o Atelia, o Aritaca,
9 o Pamasita, o Arisai, o Aritai, kei Vaisaca,
10 o ratou na tini na luvena tagane o Emani na luvei Emitaca, na kedra meca na Jiu.+ Ia nira vakamatei ratou oti, era sega ni yauta na itokinivalu.+
11 Ena siga oya e tukuni vua na tui na kedra iwiliwili na vakamatei mai Susani* na vanua viribaiti.*
12 E kaya na tui vei Ranadi Esiteri: “Era vakamatea na Jiu ra qai vakarusa e 500 na tamata kei ratou na tini na luvei Emani mai Susani* na vanua viribaiti.* Na cava era sa cakava ena vo ni yasana e lewa na tui?+ Na cava tale o vinakata? Ena soli vei iko. Na cava tale o kerea? Ena vakayacori.”
13 E kaya o Esiteri: “Ke vinaka vei kemuni na tui,+ moni vakadonuya mada mera vakayacora tale ga nimataka na Jiu era tiko e Susani* na ka e tukuni ena lawa nikua,+ me ratou vakaliligi ena kau na tini na luvei Emani.”+
14 E vakarota sara na tui me vakayacori na ka qori. E soli na lawa mai Susani,* eratou mani vakaliligi na tini na luvei Emani.
15 Era soqoni vata tale na Jiu era tiko e Susani* ena ika14 ni siga ni vula o Eta,+ era qai vakamatea e Susani* e 300 na tamata, ia era sega ni yauta na itokinivalu.
16 Era soqoni vata tale ga na vo ni Jiu era tiko ena yasana e lewa na tui mera taqomaka na nodra bula.+ Era taqomaki ira mai na kedra meca,+ nira vakamatea e le 75,000 era cati ira ia era sega ni yauta na itokinivalu.
17 Qori ena ika13 ni siga ni vula o Eta, era vakacegu ena ika14 ni siga, era lokuca me siga ni kanavata kei na marau levu.
18 Era soqoni vata na Jiu era tiko mai Susani* ena ika13 ni siga+ kei na ika14 ni siga,+ era vakacegu ena ika15 ni siga, era lokuca me siga ni kanavata kei na marau levu.
19 Oya na vuna era lokuca kina na Jiu mai na veikoro ena taudaku ni yasana mera marau vakalevu, mera kanavata ena ika14 ni siga ni vula o Eta, me siga ni soqo+ kei na gauna mera veisoliyaka kina na ivotavota kakana.+
20 E vola o Motekai+ na ka kece qo qai vakauta na ivola vei ira kece na Jiu era tiko ena yasana e lewa o Tui Esuerosi, vei ira era tiko voleka kei ira na tiko vakayawa.
21 E vakaroti ira mera dau soqova na ika14 ni siga ni vula o Eta kei na ika15 ni siga ena veiyabaki,
22 ni siga qori era vakacegu kina na Jiu mai vei ira na kedra meca, na vula qori e veisau kina na nodra rarawa me marau kei na nodra lolosi+ me siga ni reki. Era lokuca me siga ni kanavata kei na marau levu, na gauna mera veisoliyaka kina na kakana kei na iloloma vei ira na dravudravua.
23 Era vakadonuya na Jiu mera tomana na soqo era tekivuna, mera cakava tale ga na ka e vola vei ira o Motekai.
24 Ni a nakicataki ira na Jiu o Emani+ na luvei Emitaca na kai Ekaki,+ na kedra meca kece na Jiu, me vakawabokotaki ira+ qai vakawiri Puri+ oya na Madigi, me vakataqayataki ira, me vakarusai ira.
25 Ia ni lako yani o Esiteri vua na tui, e vakarota ena ivola:+ “Me sauti koya tale na nona inaki ca me baleti ira na Jiu,”+ era qai vakaliligi koya kei ratou na luvena tagane ena kau.+
26 Oya na vuna era vakatoka kina na siga qori me Purimi ni yavutaki ga ena yaca na Puri.*+ Ena vuku ni ka kece e volai ena ivola, na ka era raica me baleta na ka qo kei na ka e yacovi ira,
27 era bolea na Jiu kei na nodra kawa kei ira kece na mai tomani ira,+ me kua ni cegu nodra soqova na rua na siga qori, mera vakayacora tale ga na ka e volai me baleti ira ena kena gauna lokuci e veiyabaki.
28 Mera dau nanuma na siga qori, mera soqova na itabatamata kece, ena vuvale yadua, ena yasana yadua, kei na koro yadua, me kua sara ni yali vei ira na Jiu na siga ni Purimi, mera dau vakananuma tale ga qori na nodra kawa.
29 E qai volavola o Ranadi Esiteri na luvei Epaieli, kei Motekai na Jiu ena nodrau lewa kece me rau vakadeitaka na ka me baleta na Purimi ena ikarua ni ivola.
30 E vakauta o koya na ivola vei ira kece na Jiu ena 127 na yasana+ ena matanitu nei Esuerosi+ ena vosa ni veivakacegui kei na vosa dina,
31 me vakadeitaka me soqovi na siga ni Purimi ena kena gauna lokuci me vaka e vakaroti ira kina o Motekai na Jiu kei Ranadi Esiteri mera vakayacora,+ era bolea tale ga kei na nodra kawa mera vakayacora,+ wili kina na lolo+ kei na kerekere.+
32 E vakadeitaka na ka me baleta na Purimi na ivakaro nei Esiteri+ qai volai ena dua na ivola.
iVakamacala e ra
^ Se “Susa.”
^ Se “valenitui, koronivalu.”
^ Se “Susa.”
^ Se “valenitui, koronivalu.”
^ Se “Susa.”
^ Se “valenitui, koronivalu.”
^ Se “Susa.”
^ Se “Susa.”
^ Se “Susa.”
^ Se “Susa.”
^ Se “Susa.”
