Vei Ira na Iperiu 2:1-18
2 Oya na vuna meda vakasamataka kina vakabibi na ka eda rogoca,+ meda kua vakadua kina ni ciri tani.+
2 Ke dei na vosa era tukuna na agilosi,+ ena saumi tale ga na cala kece kei na talaidredre kece me salavata kei na lewadodonu,+
3 eda na dro bula vakacava ke da vakawalena na veivakabulai levu?+ Ni a tekivu vunautaka na noda Turaga+ ra qai vakadinadinataka vei keda o ira na rogoci koya,
4 e tokoni ira tale ga na Kalou ena ivakatakilakila, ena cakamana, ena cakacaka veivakurabuitaki,+ kei na nona vota na isolisoli ni yalo tabu me vaka na nona inaki.+
5 A sega ni lesi ira na agilosi mera lewa na vuravura e se bera mai,+ o koya eda tukuna tiko.
6 Ia e vola e dua na ivakadinadina: “Na cava mada na tamata moni nanumi koya tiko kina, se na luve ni tamata moni kauaitaki koya kina?+
7 Oni vakarautaki koya me lailai mada vei ira na agilosi, oni vakaisalataki koya ena lagilagi kei na vakarokoroko, oni qai lesi koya me lewa na cakacaka ni ligamuni.
8 Oni vakamalumalumutaka na ka kece e ruku ni yavana.”+ Ni vakamalumalumutaki vua na ka kece,+ e sega ni vakavoca na Kalou e dua na ka me sega ni vakamalumalumutaki vua.+ E dina nida se sega ni raica ena gauna qo na vakamalumalumutaki ni ka kece vua.+
9 Ia eda raici Jisu o koya e vakarautaki me lailai toka mada vei ira na agilosi,+ ni vakaisalataki ena lagilagi kei na vakarokoroko ena vuku ni nona vakamatei.+ E mate ena vukuda na tamata kece ena levu ni loloma soli wale ni Kalou.+
10 Na ka kece e buli e vakalagilagi kina na Kalou, e vakatau tale ga vua na nodra bula. O koya gona, me rawa ni vakalagilagi e levu na luvena,+ e ganiti koya me vakataucokotaka na iLiuliu Levu era vakabulai kina,+ ena nona vakararawataki.+
11 Ni o koya e veivakasavasavataki kei ira na vakasavasavataki+ e dua ga na Tamadra,+ e sega kina ni madua me kacivi ira taciqu,+
12 me vaka e kaya: “Au na tukuna na yacamuni vei ira na taciqu, au na vakacaucautaki kemuni ena sere ena loma ni ivavakoso.”+
13 E kaya tale ga: “Au na vakararavi vua.”+ E kaya tale: “Raica! O yau kei ira na gone e solia vei au o Jiova.”*+
14 O koya gona, nira vakalewe ra qai vakadra “na gone,” e sa mai vakalewe e vakadra tale ga o koya.+ Ni mate e vakawabokotaki kina na Tevoro,+ o koya e vakavuna na mate,+
15 me sereki ira kece kina era vakabobulataki tu ena rerevaki ni mate ena nodra bula taucoko.+
16 E sega ni lako mai me vukei ira na agilosi, me vukei ira ga na kawa i Eparama.+
17 O koya gona, e dodonu me vakataki ira “na tacina” ena ka kece,+ me dua kina na bete levu e yalololoma qai yalodina ena ka kece e vauca na nona qaravi na Kalou, me cabora na isoro ni veiyaloni*+ me bokoci kina na nodra ivalavala ca na tamata.+
18 Me vaka ni vosota sara ga o koya ena gauna e vakatovolei kina,+ e rawa ni vukei ira eso tale nira vakatovolei.+
iVakamacala e ra
^ Se “cabora na isoro ni veibuluti, me buluti kina na ivalavala ca.”
