Vei Ira na Iperiu 4:1-16
4 O koya gona, ni se tiko na nona ivakavakacegu a yalataki, meda qarauna de dua vei kemuni e sega ni yacova.+
2 Ni a tukuni tale ga vei keda na itukutuku vinaka me vaka ni a tukuni tale ga vei ira,+ ia na ka era rogoca era sega ni vakila na kena yaga, ni sega vei ira na mataqali vakabauta e laurai vei ira na muria.
3 O keda eda vakaraitaka na vakabauta eda curu ina ivakavakacegu, me vaka e kaya: “Au mani bubuluitaka ena noqu cudru, ‘Era na sega ni curu ina noqu ivakavakacegu,’”+ e dina ni sa vakacavari na nona cakacaka ena ivakatekivu kei vuravura.+
4 Ni a tukuna ena dua na tikinivolatabu me baleta na ikavitu ni siga: “E vakacegu na Kalou ena ikavitu ni siga mai na nona cakacaka kece,”+
5 e kaya tale: “Era na sega ni curu ina noqu ivakavakacegu.”+
6 O koya gona, ni se tiko ga na ivakavakacegu mera curu kina eso, ia o ira a tukuni taumada vei ira na itukutuku vinaka era sega ni curu kina nira talaidredre,+
7 e lokuca tale kina e dua na siga ena nona tukuna makawa sara ena same i Tevita, “Nikua,” me vaka e sa tukuni mai cake, “Nikua ke oni rogoca na domona, ni kua ni vakaukauataka na lomamuni.”+
8 Ke sa kauti ira o Josua+ ina dua na ivakavakacegu, ke a sega ni tukuna e muri na Kalou e dua tale na siga.
9 O koya gona, e se tiko ga na nodra siga ni vakacecegu na tamata ni Kalou.+
10 Ni o koya e curu ina ivakavakacegu ni Kalou, e sa vakacegu tale ga mai na nona cakacaka, me vaka ni vakacegu na Kalou mai na nona.+
11 Meda saga gona ena noda vinaka taucoko meda curu ina ivakavakacegu ya, meda kua ni ucui ira ena nodra talaidredre.+
12 E bula na vosa ni Kalou qai kaukaua,+ e gata cake mai na iseleiwau batirua,+ e suaka me wasea na yagoda kei na lomada, na noda isema kei na uro e loma ni suida, me vakavotuya na nanuma kei na inaki ni lomada.
13 E sega ni vunitaki vua e dua na kabuli,+ ia e luvawale qai laurai levu na ka kece e matai koya eda na saumitaro vua.+
14 Ni sa dua gona na noda bete levu cecere e lako i lomalagi, o Jisu na Luve ni Kalou,+ meda tukuna tiko ga yani e matana levu nida vakabauti koya.+
15 E sega ni noda bete levu o koya e sega ni nanuma na noda malumalumu,+ o koya ga e vakatovolei ena ka kece me vakataki keda, ia e sega ni bau ivalavala ca.+
16 O koya gona, meda torova na idabedabe vakaturaga ni loloma soli wale, meda doudou ni masuta na Kalou me lomani keda,+ me sobuti keda tale ga na nona loloma soli wale ena gauna eda gadreva kina na veivuke.
