Vei Ira na Iperiu 6:1-20
6 O koya gona, nida sa kila rawa na ivakavuvuli rawarawa+ me baleti Karisito, meda saga sara meda matua,+ meda kua ni viria tale e dua na yavu, me vaka na veivutunitaki ni cakacaka tawayaga, na nona vakabauti na Kalou,
2 na ivakavuvuli me baleta na veimataqali papitaiso, na veitabaki ni liga,+ na nodra vakaturi na mate,+ kei na lewa tawamudu.
3 Eda na saga dina meda matua, ke vakatara na Kalou.
4 Me baleti ira na ciqoma e liu na rarama,+ era vakila na iloloma soli wale vakalomalagi, era vakaivotavota tale ga ena yalo tabu
5 era sa tovolea na vinaka ni vosa ni Kalou, kei na kaukaua ni veika e se bera mai,*
6 ia era sa gole tani,+ e dredre mera sagai mera veivutuni tale, nira vakota tale na Luve ni Kalou ena kau ena vukudra qai vakamadualaki koya e matanalevu.+
7 E vakalougatataka na Kalou na qele e gunuva na wai ni uca e dau tau kina, qai vakatubura na draunikau mera kania o ira na tea.
8 Ia ke vakatubura na kau vakavotona kei na soni, sa na tawayaga, ena cati, ena tini vakamai.
9 Ia ena vukumuni na wekaqu lomani, keitou kila vinaka na veika e vinaka cake, na veika me baleta na veivakabulai, dina ni keitou vosa tiko va qo.
10 Ni sega ni tawayalododonu na Kalou me guilecava na nomuni cakacaka kei na loloma oni vakaraitaka ena vuku ni yacana,+ ena nomuni qaravi ira na yalosavasava, qai sega ni cegu na nomuni veiqaravi.
11 Ia keitou vinakata moni dui gumatua tiko ga va qori me dei kina na nomuni inuinui+ me yacova sara na icavacava,+
12 moni kua kina ni vucesa,+ ia moni vakatotomuri ira na taukena na vosa ni yalayala ni Kalou ena vuku ni nodra vakabauta kei na vosovoso.
13 Ena gauna gona e yalayala kina na Kalou vei Eparama, e qai bubului ga ena yacana me vaka ni sega ni tiko e dua e cecere vua me bubului kina,+
14 ni kaya: “Au na vakalougatataki iko dina, au na vakalevutaka dina na kemu iwiliwili.”+
15 O koya gona, ena nona vosovoso voli o Eparama, e qai rawata kina na vosa ni yalayala qo.
16 Nira bubului na tamata era bubului vua e dua e cecere, e itinitini tale ga ni veileti na nodra vosa ni bubului nira raica kece me ivakadei vakalawa.+
17 E vaka kina na Kalou, ni via vakamatatataka na dei ni nona inaki vei ira na taukena na vosa ni yalayala,+ e vakadeitaka qori ena bubului.
18 E vakayacori qo me vakayaloqaqataki keda na sa dro ina idrodro meda taura dei na inuinui e vakarautaki me noda, ena vuku ni rua na ka tudei e sega ni lasu rawa kina na Kalou.+
19 Na inuinui qo+ e ikelekele ni noda bula, e dei qai kaukaua, e tuberi keda tale ga meda lakosivita na ilati,+
20 e curuma yani ena vukuda na noda iliuliu o Jisu,+ o koya e sa bete levu me vakataki Melikiseteki me tawamudu.+
iVakamacala e ra
^ Se “na itabagauna se bera mai.” Raica na iVakamacala ni Vosa.
