Vei Ira na Iperiu 9:1-28
9 A okati ena veiyalayalati taumada e vica vata na lawa me baleta na veiqaravi tabu kei na kena tikina tabu+ e vuravura.
2 E vakarautaki e liu na imatai ni rumu ni valelaca e tiko kina na itutu ni cina,+ e tiko tale ga kina na teveli, kei na madrai e vakacabori* vua na Kalou,+ e qai vakatokai me Loqi Tabu.+
3 Ia ena daku ni ikarua ni ilati+ e tiko kina e dua na rumu ni valelaca e vakatokai na Loqi Tabu Sara.+
4 E tiko kina e dua na itawatawa koula,+ na kato ni veiyalayalati+ e koula wavoki,+ e tiko e loma ni kato na saqa koula e tawa tiko kina na mana,+ na ititoko nei Eroni e kubu,+ kei na vatu raraba+ ni veiyalayalati,
5 e toka e dela ni kato e rua na jerupi vakatubuqoroqoro, erau vakaruguta na kena isogo.*+ Ia se sega ni kena gauna me vakamatailalaitaki kina na ka kece qo.
6 Ni sa vakarautaki oti na veika qo me vaka na kena icakacaka, sa ra qai dau curu na bete ena imatai ni rumu ni valelaca mera dau vakaitavi ena veiqaravi tabu,+
7 ia ena ikarua ni rumu, e curu duadua ga kina na bete levu, vakadua ena dua na yabaki,+ ena kauta tiko na dra+ me cabora ena vukuna,+ ena vukudra tale ga na lewenivanua+ era sega ni nakita na nodra valavala ca.
8 O koya gona, e vakamatatataka na yalo tabu ni sega ni vakatakilai na sala ina tikina tabu ni se tiko na imatai ni valelaca.+
9 Na valelaca qo e ivakatakarakara ena gauna qo.+ Ena ituvatuva qo e se cabori tiko ga kina na isolisoli kei na isoro.+ Ia e sega ni vakasavasavataka vakadua na lewaeloma i koya e veiqaravi tabu tiko vua na Kalou na ka kece qo,+
10 ni vauci ga kina na kakana, na gunu, kei na veimataqali ivakarau ni veivakasavasavataki.*+ Na ka e lavaki ena lawa me baleta na yago+ me muri tiko me yacova na gauna lokuci me vakadodonutaki kina na ka kece.
11 Ia ni lako mai o Karisito na bete levu, o koya e kauta mai na veika vinaka eda sa vakila tiko, e curu sara ina valelaca levu e uasivi e sega ni tara ena liga, e sega ni vakayago.
12 Ni curu, e sega ni kauta na dra ni me se dra ni luvenibulumakau tagane, na nona dra sara ga,+ e kauta ga vakadua ina tikina tabu me sereki keda me tawamudu.+
13 Ke sa rawa ni vakasavasavataki na dukadukali ni yagodra+ ni kureitaki vei ira na dra ni me, na dra ni bulumakau tagane,+ kei na dravusa ni luvenibulumakau yalewa,
14 sa na qai wacava na dra i Karisito,+ o koya a cabori koya vua na Kalou ena vuku ni yalo tabu tawamudu ni a sega na nona cala, me vakasavasavataka na noda lewaeloma mai na cakacaka tawayaga,+ meda vakaraitaka kina vua na Kalou bula na veiqaravi tabu!+
15 Oya na vuna e dauveisorovaki kina ni veiyalayalati vou,+ me soli vei ira na kacivi na ivotavota tawamudu+ e yalataki. Na ka kece qo e rawati ena nona mate, mera sereki ena ivoli+ mai na cala e vu mai na veiyalayalati taumada.
16 Ni caka e dua na veiyalayalati kei na Kalou, e dodonu me mate na tamata e veiyalayalati,*
17 ni yaga ga na veiyalayalati ke sa mate. Ena sega ni yaga ke bula tiko o koya.
18 E va sara ga ya na veiyalayalati taumada, ni a tauyavutaki ena dra.
19 Ni cavuta oti o Mosese na ivunau kece e volai ena Lawa vei ira na lewenivanua, e taura na dra ni luvenibulumakau tagane, na dra ni me, na wai, na isulu damudamu, kei na drau ni isopi qai kureitaka ena ivola ni veiyalayalati, e kureitaka tale ga vei ira kece na lewenivanua,
20 e kaya: “Qo na dra ni veiyalayalati e vakarota na Kalou moni muria.”+
21 E kureitaki tale ga na dra+ ena valelaca kei na iyaya kece e vakayagataki ena veiqaravi raraba.
22 Io, voleka ni ka kece ga e vakasavasavataki ena dra+ me vaka e vakaroti ena Lawa. Ke sega ni vakadavei na dra ena sega na veivosoti.+
23 O koya gona, e dodonu mera vakasavasavataki va qo na veika kece era vakatakarakarataka+ na veika vakalomalagi, ia na veika vakalomalagi mada ga era vakasavasavataki+ ena isoro e vinaka cake mai na isoro kece qo.
24 Ni sega ni curu o Karisito ina tikina tabu e tara ena liga,+ qori na ivakatakarakara ga ni ka dina.+ Ia e sa tiko mai lomalagi+ ena gauna qo me rairai ena mata ni Kalou ena vukuda.+
25 E sega ni caka qo me cabori koya vakawasoma me vaka e dau cakava na bete levu ena nona curu e veiyabaki+ ina loqi tabu ni kauta na dra e sega ni nona.
26 Ke sega ena gadrevi me rarawa tiko vakawasoma mai na ivakatekivu kei vuravura. Ia qo e sa vakatakilai koya vakadua ga ena ivakataotioti ni veika ni vuravura* me kauta tani na ivalavala ca ni cabora nona bula.+
27 Ia e waraka na tamata me mate vakadua ga, me qai lewai,
28 e vaka kina o Karisito ni cabori ga vakadua me colata na nodra ivalavala ca e le levu,+ na ikarua ni gauna e basika kina ena sega ni basika ena vuku ni ivalavala ca, ena vukudra ga era vakasaqarai koya dina mera vakabulai.+
iVakamacala e ra
^ Se “madrai dauraici.”
^ Se “na vanua ni veibuluti.”
^ Kir., “veimataqali papitaiso.”
^ Se, “me isoro ni veivakaduavatataki.”
^ Se “ena itabagauna.” Raica na iVakamacala ni Vosa.
