Isikeli 1:1-28
1 Ena ika30 ni yabaki, ena ikalima ni siga ena ikava ni vula, niu tiko kei ira na kau vakavesu+ ena bati ni uciwai na Kipa,+ e tadola na lomalagi au raica sara na raivotu ni Kalou.
2 Ena ikalima ni siga ni vula, oya ena ikalima ni yabaki e kau vakavesu kina o Tui Jioakini,+
3 e vosa o Jiova vei Isikeli* na luvei Pusai na bete, ena bati ni uciwai na Kipa ena nodra vanua na Kalitia,+ e tiko vua mai kea na liga i Jiova.+
4 Niu vakararai tiko au raica sara e dua na covulaca+ e liwa mai na vualiku, e dua na o levu, kei na caucaudre ni bukawaqa*+ e ramase wavokita, e tiko ena loma ni bukawaqa e dua na ka e vaka na irairai ni koula e waki vata kei na siliva.+
5 E vaka e va na kabula e tiko e loma,+ na kedratou irairai yadua e vaka na tamata.
6 E yava na matadratou, e yava na tabadratou.+
7 E dodonu na yavadratou, na qeteqete ni yavadratou e vaka na qeteqete ni yava ni luvenibulumakau, e tatalivaliva kece me vaka na taliva ni kopa masiraki.+
8 E tiko na liga ni tamata e ruku ni tabadratou ena yasadratou vava, e tiko na matadratou kei na tabadratou na le va qo.
9 E veitarai na tabadratou. Eratou sega ni vuki ni ratou lako, eratou lako ga vakadodonu.+
10 E va qo na irairai ni matadratou: E tiko yadua vei ratou na mata ni tamata kei na mata ni laione+ ena imatau, na mata ni bulumakau+ ena imawi, e tiko tale ga vei ratou yadua na mata+ ni ikeli.+
11 E va qori na irairai ni matadratou. Eratou tevuka cake na tabadratou. E veitaratara e rua na tabadratou, e rua tale e ubia na yagodratou.+
12 Eratou dui lako vakadodonu ena vanua ga e dusimaki ratou kina na yalo tabu.+ Eratou sega ni vuki ni ratou lako tiko.
13 Na kedratou irairai na kabula e vaka na qilaiso waqa qai veitosoyaki tiko e dua na ka e vaka na cina caucaudre ena kedratou maliwa na kabula, e tibi na liva mai na loma ni bukawaqa.+
14 Ni ratou lako yani se lesu mai na kabula, e vaka na tibi ni liva na nodratou veitosoyaki.
15 Niu vakaraici ratou tiko na va na kabula, au mani raica ena delaniqele e dua na yavaniqiqi ni tu e yasadratou na kabula e va na matadratou.+
16 E taliva me vaka na kirisilaite na yavaniqiqi kei na kena ibulibuli, e tautauvata na kedratou irairai vava. Na kedratou irairai kei na kena ibulibuli e vaka e dua na yavaniqiqi ena loma ni dua tale na yavaniqiqi.*
17 Ni ratou toso e rawa ni ratou toso ena dua vei ratou na va na yasana, eratou sega ni veivukiyaki.
18 E vakatubuqoroqoro na cere ni batiniqiqi, e robota kece na batiniqiqi vava na yalokanimata.+
19 Ni ratou toso na kabula e toso e yasadratou na yavaniqiqi, ni talave mai na qele na kabula, e talave tale ga na yavaniqiqi.+
20 Eratou toso ena vanua e via lako kina na yalo tabu, oya na vanua ga e lako kina na yalo tabu. Ena talave vata kei ratou na yavaniqiqi, ni tiko ena yavaniqiqi na yalo tabu e dusimaki ratou tiko na kabula.*
21 Ni ratou toso na kabula, e toso na yavaniqiqi, ni ratou tu vakadua, e tu vakadua. Ni ratou talave mai na qele e talave tale ga na yavaniqiqi, ni tiko ena yavaniqiqi na yalo tabu e dusimaki ratou tiko na kabula.
22 E tatevu tu e cake e uludratou na kabula e dua na ka e vaka na buturara, e tatibi me vaka na waicevata rairai vinaka.+
23 Ena ruku ni maliwalala e dodonu tu* na tabadratou, e dui veiqaravi. E rua na tabadratou e ubia na yagodratou ena dua na yasana, e rua tale e ubia na yagodratou e yasana adua.
24 Au rogoca ni vaka na rorogo ni tacoka ni wai na cakurobaroba ni tabadratou, e vaka na domo i koya e Kaukaua Duadua.+ E vaka na rorogo ni mataivalu ni ratou toso. Ni ratou tu vakadua, eratou biuta sobu na tabadratou.
25 E rogo mai cake e dua na domo ena buturara e uludratou. (Ni ratou duri vakadua eratou biuta sobu na tabadratou.)
26 E tiko ena buturara e cake e uludratou e dua na ka e vaka na vatu sefaia na kena irairai,+ e vaka na idabedabe vakaturaga.+ E dabe toka e cake ena idabedabe vakaturaga e dua e vaka na irairai ni tamata.+
27 Au raica ni taliva tiko e dua na ka e vaka na koula e waki vata kei na siliva,+ e vaka sara ga ni caudre tiko na bukawaqa e tolona lako cake, au raica e dua na ka e vaka na irairai ni bukawaqa e tolona lako sobu.+ E ramase wavoki o koya
28 me vaka na ramase ni drodrolagi+ ena o ena siga ni uca. E va qori na ramase ni rarama e wavokiti koya. Na kena irairai e vaka na lagilagi i Jiova.+ Niu raica qori au davo vakatoboicu, au rogoca sara ni vosa tiko e dua.
iVakamacala e ra
^ Kena ibalebale “Veivakaukauataki na Kalou.”
^ Se “kei na liva.”
^ Rairai veilatai e lomadonu.
^ Ipe., “na yalo ni kabula.”
^ Se rawa ni, “eratou tevuka vakadodonu.”
