Isikeli 12:1-28
12 E vosa tale vei au o Jiova, e kaya:
2 “O iko na luve ni tamata, o bula tiko ena dua na vuvale talaidredre. E tiko na matadra mera rai kina ia era sega ni rai, e tiko na daligadra mera rogo kina ia era sega ni rogo,+ nira dua na vuvale talaidredre.+
3 Ia o iko na luve ni tamata, mo vakarautaka na nomu kato mo kau vakavesu. Mo qai toki ena siga nira rai tu. Mo toki mai na nomu vale ina dua tale na vanua nira rai tu. Era dua na vuvale talaidredre, de dua era na kauai.
4 Mo kauta mai tuba na nomu kato ni kau vakavesu nira rai tu ena siga, ia mo qai biubiu ena yakavi me vaka e dua e kau vakavesu nira rai tu.+
5 “Mo qiva e dua na qara e lalaga nira rai tu, mo yauta kina na nomu kato.+
6 Mo cola yani na nomu iyaya ena buto nira rai tu. Mo ubia na matamu mo kua ni raica na qele, niu lesi iko mo ivakatakilakila vei ira na vuvale ni Isireli.”+
7 Au mani vakayacora na ka au vakaroti kina. Ena siga, au kauta yani na noqu kato me vaka na kato ni kau vakavesu, ena yakavi au qiva e ligaqu e dua na qara e lalaga. Ni sa buto au qai kauta yani na noqu kato, au cola yani e tabaqu nira rai tu.
8 Ena mataka e vosa tale vei au o Jiova, e kaya:
9 “O iko na luve ni tamata, nira tarogi iko na vuvale ni Isireli, na vuvale talaidredre, ‘Na cava o cakava tiko?’
10 Mo tukuna vei ira, ‘Qo na ka e kaya na Turaga Cecere Duadua o Jiova: “Qo na itukutuku bibi me baleta na turaga+ mai Jerusalemi kei ira kece na vuvale ni Isireli era tiko ena koro.”’
11 “Mo kaya, ‘O yau na ivakatakilakila vei kemuni.+ Na ka au cakava tiko qo ena yacovi ira. Era na toki, era na kau vakavesu.+
12 Ia na turaga e maliwai ira tiko ena colata yani na nona kato me biubiu ena buto. Ena qiva e dua na qara e lalaga me yauta kina na nona kato.+ Ena ubia na matana me kua ni raica na qele.’
13 Au na balata vua na noqu lawa, ena coko kina.+ Au na kauti koya sara i Papiloni, na nodra vanua na Kalitia, ia ena sega ni raica, ena mate e kea.+
14 O ira kece na volekati koya, o ira na dau vukei koya kei ira kece na nona mataivalu, au na vakasava ina yasana kece,+ au na ucuna e dua na iseleiwau meu cicimuri ira.+
15 Era na qai kila ni o yau o Jiova niu vakasavi ira ina veimatanitu, au cemuri ira tale ga ina veivanua.
16 Ia au na vakabula e vica mai na iseleiwau, ena leqa ni kakana, kei na matedewa mera talanoataka na nodra itovo vakasevaki ina veimatanitu era na lako kina, era na qai kila ni o yau o Jiova.”
17 E vosa tale vei au o Jiova, e kaya:
18 “O iko na luve ni tamata, mo ninini ni o kania na kemu madrai, mo gunuva na memu wai ena taqaya kei na nuiqawaqawa.+
19 Mo tukuna vei ira na lewenivanua, ‘Qo na ka e kaya na Turaga Cecere Duadua o Jiova vei ira na lewe i Jerusalemi ena vanua o Isireli: “Era na kania na kedra madrai ena nuiqawaqawa, era na gunuva na medra wai ena rere, ni na vakalalai vakadua na nodra vanua+ nira valavala kaukaua na tiko kina.+
20 Ena vakalalai kece na koro e tawani, ena laladidi na vanua,+ oni na qai kila ni o yau o Jiova.”’”+
21 E vosa tale vei au o Jiova, e kaya:
22 “O iko na luve ni tamata, na cava oni dau cavuta kina na vosa vakaibalebale qo e Isireli, ‘Se balavu na gauna, e sega ni yaco na raivotu kece’?+
23 Mo tukuna gona vei ira, ‘Qo na ka e kaya na Turaga Cecere Duadua o Jiova: “Au na kauta tani na ivosavosa qo, era na sega ni vakayagataka tale na vosa vakaibalebale qo e Isireli.” ’ Mo tukuna vei ira, ‘Sa voleka mai na gauna,+ ena vakayacori na raivotu kece.’
24 Ena sega tale na raivotu lasu se na daurairai veivakaisini ena vuvale ni Isireli.+
25 ‘“O yau o Jiova au na vosa. Ena yaco dina na ka au tukuna, ena sega sara ni bera.+ Ena nomuni gauna,+ o kemuni na vuvale talaidredre, au na vosa au na vakayacora,” e kaya na Turaga Cecere Duadua o Jiova.’”
26 E vosa tale vei au o Jiova, e kaya:
27 “O iko na luve ni tamata, qo na ka era kaya tiko na lewe i Isireli,* ‘Se bera na nona raivotu, se yawa sara na gauna e parofisaitaka tiko.’+
28 Ia mo tukuna vei ira, ‘Qo na ka e kaya na Turaga Cecere Duadua o Jiova: “‘Ena sega sara ni bera e dua na noqu vosa. Ena vakayacori na ka au tukuna,’ e kaya na Turaga Cecere Duadua o Jiova.”’”
iVakamacala e ra
^ Ipe., “vuvale.”
