Isikeli 13:1-23
13 E vosa tale vei au o Jiova:
2 “O iko na luve ni tamata mo parofisaitaka na ka ca vei ira na parofita ni Isireli,+ mo kaya vei ira era bulia ga na nodra parofisai,*+ ‘Moni rogoca na vosa i Jiova.
3 Qo na ka e kaya na Turaga Cecere Duadua o Jiova: “Era na rarawa na parofita lialia era muria ga na lomadra nira sega ni raica e dua na ka!+
4 Kemuni na Isireli, o ira na nomuni parofita era vaka na fokisi ena irusarusa.
5 Oni na sega ni lako ina tiki ni baivatu kasura moni tara tale me baleti ira na vuvale ni Isireli,+ mera tudei kina na Isireli ena ivalu ni siga i Jiova.”+
6 “E lasu na no dra raivotu, e lasu tale ga na nodra parofisai, era kaya tiko, ‘Qo na ka e tukuna o Jiova,’ ni sega ni talai ira o Jiova, ra qai waraka me yaco na ka era kaya.+
7 E lasu na nomuni raivotu, e lasu tale ga na nomuni parofisai ni oni kaya, ‘Qo na ka e tukuna o Jiova,’ niu sega ni tukuna e dua na ka.”’
8 “‘O koya gona, qo na ka e tukuna na Turaga Cecere Duadua o Jiova: “‘Ni oni lasu, e lasu tale ga na nomuni raivotu, au na saqati kemuni,’ e kaya na Turaga Cecere Duadua o Jiova.”+
9 Na ligaqu ena saqati ira na parofita e lasu na nodra raivotu, e lasu tale ga na nodra parofisai.+ Era na sega ni tiko vata kei ira na tamata au nuitaka, era na sega ni volai ena nodra ivolaniyaca na vuvale ni Isireli, era na sega tale ga ni lesu ina vanua o Isireli, oni na qai kila ni o yau na Turaga Cecere Duadua o Jiova.+
10 E yaco kece qori nira vakasesei ira na noqu tamata, era kaya, “Na vakacegu!” ni sega na vakacegu.+ Ni tara oti na lalaga ilati malumalumu, era boroya ena iboro vulavula.’*+
11 “Mo kaya vei ira na boroya tiko ena iboro vulavula ni na bale. Ena bisa na uca, ena lutu na mataniuca qereqere, ena basuka na lalaga na cagi kaukaua.+
12 Ni bale na lalaga oni na tarogi, ‘I vei na nomuni iboro vulavula?’+
13 “Ia qo na ka e tukuna na Turaga Cecere Duadua o Jiova: ‘Au na vakatubura na cagi kaukaua me liwa yani ena noqu cudru levu, au na vakatauca na uca bi ena noqu cudru, kei na mataniuca qereqere ena noqu cudru waqawaqa.
14 Au na basuka na lalaga oni boroya ena iboro vulavula me lutu ina qele, ena laurai na kena yavu. Ni bale na koro, oni na mate e loma, oni na qai kila ni o yau o Jiova.’
15 “‘Ena gauna au cudruva kina na lalaga kei ira na boroya ena iboro vulavula, au na tukuna vei kemuni: “Sa yali vakadua na lalaga, era sa yali tale ga na boroya tiko.+
16 Era sa yali na parofita ni Isireli, o ira era parofisai vei Jerusalemi, era raivotutaka tale ga vua na vakacegu ni sega na vakacegu,”’+ e kaya na Turaga Cecere Duadua o Jiova.
17 “Ia o iko na luve ni tamata, mo matacataki ira na goneyalewa ni kainomu era bulia ga na nodra parofisai, mo parofisaitaka vei ira na ka ca.
18 Mo kaya vei ira, ‘Qo na ka e tukuna na Turaga Cecere Duadua o Jiova: “Era rarawa na yalewa era cula vata na ivesuniliga* kece, era cakava tale ga na iubiniulu ena kena ivakarau kece mera vakasasataka kina na nodra bula na lewenivanua! Vakacava, oni vakasasataka ga na nodra bula na noqu tamata oni qai via vakabulai kemuni ga?
19 Oni na vosavakacacataki au vei ira na noqu tamata me nomuni kina na iluku varile kei na tikitiki ni madrai,+ moni vakamatei ira na sega ni dodonu mera mate, moni vakabulai ira na sega ni dodonu mera bula ni oni lasutaki ira na noqu tamata era dau rogoca na nomuni lasulasu?”’+
20 “Ia qo na ka e tukuna na Turaga Cecere Duadua o Jiova: ‘Au na cata na nomuni ivesuniliga na yalewa oni vakasasataki ira kina na lewenivanua me vaka na manumanuvuka, au na drutia mai ligamuni, au na sereki ira tale ga oni vakasasataka tiko me vaka na manumanuvuka.
21 Au na dresuka na iubiniulumuni meu vakabulai ira na noqu tamata mai ligamuni, oni na sega tale ni toboki ira ena vakasasa, oni na qai kila ni o yau o Jiova.+
22 Oni vakararawataka na yalododonu ena nomuni lasulasu,+ niu sega ni vakararawataki koya, oni vakaukauataka tale ga na ligana na tamata ca+ me kua ni biuta na nona itovo ca me bula kina.+
23 Oni na sega tale ni raivotu lasu na yalewa, se daurairai,+ au na vakabulai ira na noqu tamata mai ligamuni, oni na qai kila ni o yau o Jiova.’”
iVakamacala e ra
^ Se “na parofisai e vu ga mai lomadra.”
^ Oya na kena tara na lalaga malumalumu ni ilati e loma qai boro ena iboro vulavula me via kaukaua kina na kena irairai.
^ Oya na wa e vesu ena duruduruniliga kei na ilabeniika me itataqomaki.
