Isikeli 16:1-63
16 E vosa tale vei au o Jiova, e kaya:
2 “O iko na luve ni tamata, mo vakatakila vei Jerusalemi na nona itovo vakasevaki.+
3 Mo kaya, ‘Qo na ka e tukuna na Turaga Cecere Duadua o Jiova vei Jerusalemi: “O vu ena nodra vanua na kai Kenani, o sucu tale ga kina. E Amoraiti+ na tamamu, e Itaiti na tinamu.+
4 Ena siga o sucu kina e sega ni koti na nomu ivicovico, o sega ni sili ena wai mo savasava, o sega ni masiraki ena masima, o sega ni ovi ena isulu.
5 E sega ni dua e lomani iko vakalevu me cakava vei iko e dua na ka qori. E sega ni dua e kauaitaki iko. Ia o biu tu e veico ni o cati ena siga o sucu kina.
6 “‘“Niu tavali au raica ni o teketeke tu ena nomu dra, au mani kaya ni o davo tu ena nomu dra, ‘Mo bula tiko!’ Io au kaya vei iko ni o davo tu ena nomu dra, ‘Mo bula tiko!’
7 Au vakatuburi iko mo levu sara me vaka na tubu ni kau e veikau, o tubu, o levu, o vakaiukuuku talei. Erau dei na sucumu, e tubu na drauniulumu ia o luvawale, o sega ni vakaisulu.”’
8 “‘Au raici iko niu tavali, au raica sara ni sa ganita mo domoni. Au mani ubi iko ena noqu isulu+ meu ubia na nomu luvawale, au bubului me daru veidinadinati,’ e kaya na Turaga Cecere Duadua o Jiova, ‘o sa noqu.
9 Au vakasilimi iko tale ga ena wai, au savata tani na nomu dra, au lumuti iko ena waiwai.+
10 Au vakaisulutaki iko ena isulu talitali, au solia vei iko na ivava leca dina,* au ovici iko ena lineni matailalai, au vakaisulutaki iko ena isulu saulevu.
11 Au ukutaki iko, au vaqatotaka na ligamu, au vakaitaubetaka na domomu.
12 Au biuta tale ga e dua na mama e ucumu kei na sau e daligamu, kei na dua na isala totoka e ulumu.
13 O ukutaki iko tiko ga ena koula kei na siliva, na nomu isulu e lineni matailalai, e isulu saulevu, e tali tale ga. O kania na falawa vinaka sara, na denioni, kei na waiwai, o tubu mo matavinaka sara,+ e ganiti iko mo dua na ranadi.’”
14 “‘E teteva na veimatanitu na kemu irogorogo*+ ni o matavinaka, o totoka vakaoti niu solia vei iko na noqu lagilagi,’+ e kaya na Turaga Cecere Duadua o Jiova.”
15 “‘Ia o nuitaka ga na nomu matavinaka,+ o dua na saqamua ena vuku ni kemu irogorogo.+ O saqamua vakaveitalia kei ira na tavali,+ e nodra kina na nomu matavinaka.
16 O kauta eso na nomu isulu, o ukutaka me duiroka na vanua cecere mo saqamua kina,+ me kua sara ga ni caka qori, me kua tale ga ni yaco.
17 O kauta tale ga na nomu iukuuku talei e caka ena koula kei na siliva au solia vei iko, o bulia kina na ivakatakarakara ni tagane mo saqamua kina.+
18 O kauta na nomu isulu talitali mo ubi ira* kina, o cabora vei ira na noqu waiwai kei na noqu ka boivinaka.+
19 Na madrai au solia vei iko, e buli ena falawa vinaka sara, na waiwai, kei na denioni au solia vei iko mo kania, o cabora tale ga vei ira me iboi talei.*+ Qori sara ga na ka e yaco,’ e kaya na Turaga Cecere Duadua o Jiova.”
20 “‘O kauti ira na luvemu tagane kei ira na luvemu yalewa o vakasucuma me noqu+ mo cabora vei ira na matakau mera kania.+ Vakacava, se lailai na nomu itovo vakasaqamua?
21 O vakamatei ira na luvequ, o cabori ira ena bukawaqa me isoro.+
22 Ni o vakayacora na nomu itovo sevaki kece kei na nomu itovo vakasaqamua, o sega ni nanuma na gauna o se gone kina ni o luvawale, o sega ni vakaisulu o qai teketeke tu ena nomu dra.
23 Ni oti kece na nomu ivakarau ca, o na rarawa, o na rarawa,’+ e kaya na Turaga Cecere Duadua o Jiova.
24 ‘O bulia cake na vanua mo qaravi kalou lasu kina, o tara na nomu vanua cecere ena rara ni koro kece.
25 O tara na nomu vanua cecere ena gaunisala rogo kece, o soli iko* vei ira kece na tavali me sevaki kina na nomu matavinaka,+ o vakalevutaka tale ga na nomu itovo vakasaqamua.+
26 O lai saqamua kei ira na kai Ijipita,+ era wekamu garosa,* o vakacudrui au ena levu ni nomu itovo vakasaqamua.
27 Au na dodoka vei iko na ligaqu, au na vakalailaitaka na kemu ivotavota kakana,+ au na soli iko vei ira na yalewa era cati iko mo cakava na ka ga era vinakata,+ oya o ira na goneyalewa ni Filisitia, era sokonu ena vuku ni nomu ivalavala torosobu.+
28 “‘Ni sega ni cegu na lomamu o lai saqamua kina kei ira na kai Asiria,+ ia ni oti nomu saqamua kei ira, e sega tiko ga ni cegu na lomamu.
29 O vakalevutaka sara na nomu saqamua ena vanua ni veivoli,* kei ira na kai Kalitia,+ ia e sega tiko ga ni cegu na lomamu.
30 E tauvimate* vakalevu na lomamu,’ e kaya na Turaga Cecere Duadua o Jiova, ‘ni o vakayacora na ka kece qo, na nomu ivalavala e vaka na saqamua e sega ni madua!+
31 Ia ni o bulia cake na nomu vanua ni qaravi kalou lasu ena gaunisala rogo kece, o tara na nomu vanua cecere ena rara ni koro kece, o sega ga ni vaka na saqamua ni o cata mo saumi.
32 O yalewa vakawati dau veibutakoci o taura na vulagi me isosomi ni watimu!+
33 Era soli iloloma na lewenivanua vei ira kece na saqamua,+ ia o iko o soli iloloma vei ira kece na garovi iko,+ o vaqumi ira mera lako yani vei iko o ira kece na tu wavokiti iko moni veibutakoci kaya.+
34 O sega ni vakataki ira na vo ni saqamua. E sega ni dua e muria na nomu ivalavala vakasaqamua! O saumi ira, era sega ni saumi iko. E veibasai na ka o cakava.’
35 “Ia mo rogoca na vosa i Jiova o iko na saqamua.+
36 Qo na ka e kaya na Turaga Cecere Duadua o Jiova: ‘Ni rui sivia na nomu garogaro, e laurai tale ga na nomu luvawale ni o saqamua kei ira na domoni iko kei ira kece na nomu matakau sevaki+ qai vakasisila,* o cabora kina na nodra dra na luvemu,+
37 o koya gona au na soqoni ira kece mai na domoni iko o vakamarautaka, o ira kece o domona kei ira kece o cata. Au na soqoni ira kece mai na veivanua mera saqati iko, au na vakaraitaka vei ira na nomu luvawale, era na raica ni o luvawale sara tu ga.+
38 “‘Au na tauca vei iko na itotogi e tau vei ira na yalewa dau veibutakoci+ kei ira na yalewa dau vakadavedra,+ ena vakadavei na nomu dra ena cudru kei na vuvu.+
39 Au na soli iko e ligadra, era na basuka na nomu vanua ni sokalou lasu, era na vakacacana na nomu vanua cecere,+ era na luvata na nomu isulu,+ era na taura na nomu iukuuku talei+ ra qai biuti iko tu me laurai na nomu luvawale, o sega ni vakaisulu.
40 Era na kauta yani vei iko e dua na ilala levu,+ era na vakaviriki iko ena vatu,+ era na vakamatei iko ena nodra iseleiwau.+
41 Era na vakama na nomu vale,+ era na totogitaki iko e matadra e levu na yalewa, au na muduka na nomu saqamua,+ o na sega tale ni solia na kena isau.
42 Au na cudruvi iko vakalevu me cegu na lomaqu,+ ena oti na noqu vuvutaki iko,+ au na sega ni yavala, au na sega tale ni cudru.’
43 “‘Ni o sega ni nanuma na nomu gauna ni gone,+ o vakacudrui au ni o vakayacora na ka kece qo, au na sauma vei iko* na nomu ivalavala,’ e kaya na Turaga Cecere Duadua o Jiova, ‘ena oti vakadua na nomu ivalavala torosobu kei na nomu itovo sevaki kece.
44 “‘Raica! Era na cavuta kece vei iko na ivosavosa qo na dauvosa vakaibalebale: “E ucui tinana ga o luvena yalewa!”+
45 O iko na luvei tinamu, e cati watina kei ira na luvena. O tacidra na tacimu, era cati watidra kei na luvedra. E Itaiti na tinamuni, e Amoraiti na tamamuni.’”+
46 “‘Na tuakamu o Samaria+ e tiko ena nomu imawi* kei ira na luvena yalewa,*+ na tacimu o Sotoma+ e tiko ena nomu imatau* kei ira na luvena yalewa.+
47 O sega wale ga ni muria na nodra ivalavala se cakava na nodra itovo sevaki, ia ena dua na gauna lekaleka e ca sara na nomu ivalavala kece mai na nodra ivalavala.+
48 Niu bula tiko,’ e kaya na Turaga Cecere Duadua o Jiova, ‘e sega ni vakayacora na tacimu o Sotoma kei ira na luvena yalewa na ka o vakayacora kei ira na luvemu yalewa.
49 Raica! Qo na cala nei Sotoma na tacimu: E dokadoka+ o koya kei ira na luvena yalewa,+ e levu na kedra kakana,+ era bula galala,+ ia era sega ni vukei ira na rarawa kei ira na dravudravua.+
50 Era qaciqacia tiko ga,+ era vakayacora tiko e mataqu na itovo sevaki,+ au raica ni ganita mera kau tani.+
51 “‘Na ivalavala ca nei Samaria+ e sega mada ga ni yacova na veimama ni nomu ivalavala ca. O vakalevutaka tiko ga na nomu itovo sevaki ni vakatauvatani kei na ka erau cakava, erau rairai yalododonu gona na tacimu ena vuku ni nomu itovo sevaki kece.+
52 Ia qo ena sauti iko na nomu velavela ni o vakadonuya na nodrau itovo na tacimu. Ena vuku ni nomu ivalavala ca ni torosobu na nomu itovo sevaki ni vakatauvatani kei rau, erau yalododonu kina vei iko. Mo madua, ena sauti iko na velavela ni nomu vakadonui rau na tacimu.’
53 “‘Au na kumuni ira mai na nodra kaivesu, o ira na vesu mai Sotoma kei ira na luvena yalewa, kei ira na vesu mai Samaria kei ira na luvena yalewa. Au na kumuni ira vata mai kei na nomu kaivesu,+
54 mo luvuci ena nomu velavela. O na velavela ni o vakacegui ira ena ka o vakayacora.
55 Ena vakalesui na tacimu o Sotoma kei ira na luvena yalewa ina kedra itutu e liu, ena vakalesui o Samaria kei ira na luvena yalewa ina kedra itutu e liu, o na vakalesui tale ga o iko kei ira na luvemu yalewa ina kemuni itutu e liu.+
56 O sega sara ga ni tukuna e dua na ka me baleta na tacimu o Sotoma ena siga ni nomu dokadoka,
57 ni bera ni vakatakilai na nomu ca.+ Ia qo era beci iko na goneyalewa ni Siria kei ira kece na tiko volekata, era vakalialiai iko tale ga na goneyalewa ni Filisitia,+ qori o ira kece na tiko wavokiti iko.
58 Ena sauti iko ga na nomu ivalavala torosobu kei na nomu itovo sevaki,’ e kaya o Jiova.”
59 “Qo na ka e kaya na Turaga Cecere Duadua o Jiova: ‘Au na totogitaki iko me vaka na ka o vakayacora+ ni o beca na bubului, o sega ni dina ena noqu veidinadinati.+
60 Ia au nanuma na nodaru veiyalayalati ena gauna o se gone kina, au na vakataudeitaka vei iko me dua na veiyalayalati tudei.+
61 O na nanuma na nomu ivalavala, o na velavela+ ni o vakadonui ira na tacimu, o ira na qase kei ira na gone vei iko, au na soli ira vei iko mera luvemu yalewa, au sega ni cakava ena vuku ni nomu veiyalayalati.’
62 “‘Au na tauyavutaka na noqu veiyalayalati kei iko, o na qai kila ni o yau o Jiova.
63 O na nanuma, o na madua vakalevu mo dolava na gusumu ena nomu velavela,+ niu sa vosoti iko ena cala kece o vakayacora,’+ e kaya na Turaga Cecere Duadua o Jiova.”
iVakamacala e ra
^ Se “kulinisili.”
^ Ipe., “yacamu.”
^ Oya na matakau tagane.
^ Se “veivakalomavinakataki, malumu.” Ipe., “veivakacegui.”
^ Ipe., “balasagasaga.”
^ Ipe., “wekamu yagolevu.”
^ Ipe., “vanua o Kenani.”
^ Se “yalowai.”
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
^ Ipe., “sauma e ulumu.”
^ Rairai dusia na tauni lalai.
^ Se “ceva.”
^ Se “vualiku.”
