Isikeli 22:1-31
22 E vosa tale vei au o Jiova, e kaya:
2 “O iko na luve ni tamata, o sa tu vakarau mo tauca na kena itotogi* na koro dauvakadavedra,+ mo tukuna vua na nona itovo sevaki kece?+
3 Mo kaya, ‘Qo na ka e kaya na Turaga Cecere Duadua o Jiova: “O iko na koro dauvakadavedra,+ sa yaco mai na nomu gauna,+ o bulia na matakau vakasisila* mo dukadukali kina,+
4 o cala ni o vakadavedra,+ o dukadukali ena nomu matakau vakasisila.+ O vakatotolotaka na icavacava ni nomu gauna, sa voleka ni cava na nomu yabaki. Oya na vuna au na soli iko kina mera vosabeci iko na veimatanitu, mera vakalialiai iko na veivanua kece.+
5 Era na vakalialiai iko na veivanua voleka kei na veivanua yawa,+ o iko e rogo ca na yacamu, e levu nomu maue.
6 Raica! Era vakayagataka na nodra lewa na turaga ni Isireli era tiko vei iko Jerusalemi mera vakadavedra kina.+
7 Era beci tamadra kei tinadra na lewenivanua.+ Era dabuya na vulagi, era vakasaurarataka na gone e sega na tamana* kei na yada.”’”+
8 “‘O beca na noqu veivanua tabu, o vakawaletaka na noqu siga ni vakacecegu.+
9 Era tiko vei iko na dauvakaucaca e nodra inaki mera vakadavedra.+ Era tiko vei iko o ira na kania na isoro ena veiulunivanua, ra qai vakayacora tiko kina na ivalavala torosobu.+
10 Era tiko vei iko o ira na beca na imocemoce nei tamadra,*+ era vakacacana na yalewa e sega ni savasava ni matenivula.+
11 E tiko vei iko o koya e vakayacora na itovo vakasevaki kei na watina na kainona,+ e vakadukadukalitaki vugona e dua ena ivalavala torosobu,+ e dua tale e vakacacana na ganena, oya na luvei tamana.+
12 Era tiko vei iko o ira na vaqumi mera vakadavedra.+ O soli dinau ena tubu+ se mo rawatubu kina, o kovea na nodra ilavo na kainomu.+ Io, o sa guilecavi au vakadua,’ e kaya na Turaga Cecere Duadua o Jiova.
13 “‘Raica! au vakasausau e ligaqu niu sega ni taleitaka na nomu rawaka vakailawaki kei na nomu vakadavedra.
14 O na yaloqaqa tiko ga, ena kaukaua tiko ga na ligamu ena gauna au na totogitaki iko kina?+ O yau o Jiova au tukuna, au na vakayacora.
15 Au na vakasavi iko ina veimatanitu, au na cemuri iko ina veivanua,+ au na muduka tale ga na nomu dukadukali.+
16 O na beci e matadra na veimatanitu, o na qai kila ni o yau o Jiova.’”+
17 E vosa tale vei au o Jiova, e kaya:
18 “O iko na luve ni tamata, na vuvale ni Isireli e vaka na denikaukamea tawayaga vei au. O ira kece era kopa, era tini, era kaukamea, era uma ena loma ni lovo. Era denisiliva.+
19 “Ia qo na ka e tukuna na Turaga Cecere Duadua o Jiova: ‘Ni oni denikaukamea tawayaga kece,+ au na soqoni kemuni yani e loma i Jerusalemi.
20 Me vaka ni kumuni vata na siliva, na kopa, na kaukamea, na uma, kei na tini ena loma ni lovo me uvuci na buka e rukuna me waicala, au na soqoni kemuni tale ga ena noqu cudru kei na noqu cudru levu, au na uvuci kemuni moni waicala.+
21 Au na kauti kemuni vata mai meu uvuca vei kemuni na bukawaqa ni noqu cudru waqawaqa,+ oni na waicala e loma.+
22 Me vaka ni vakawaicalataki na siliva ena loma ni lovo, oni na vakawaicalataki vaka kina e loma i Jerusalemi, oni na qai kila ni o yau o Jiova au sova na noqu cudru levu vei kemuni.’”
23 E vosa tale vei au o Jiova, e kaya:
24 “O iko na luve ni tamata mo kaya vua, ‘O iko na vanua o na sega ni vakasavasavataki se tauci uca ena siga ni cudru.
25 Era bukivere e loma na nona parofita+ me vaka na laione e tagi ni basuraka na kena.+ Era vakamate tamata. Era yauta tiko na iyau kei na ka talei. Era vakalevutaka na nona yada.
26 Era beca na noqu lawa na nona bete,+ era vakadukadukalitaka tiko na noqu veivanua tabu.+ Era sega ni vakaduiduitaka na ka tabu kei na ka e sega ni tabu,+ era sega ni tukuna na ka savasava kei na ka e sega ni savasava,+ era sega ni via doka na noqu siga ni vakacecegu, era beci au.
27 O ira na nona turaga era vaka na olifa era basuraka na kedra, era vakadavedra, era veivakamatei mera rawaka kina vakailawaki.+
28 Ia era ubia na nodra itovo ca na nona parofita ena iboro vulavula. E lasu na nodra raivotu,+ e lasu na nodra rairai, era kaya: “Qo na ka e kaya na Turaga Cecere Duadua o Jiova,” ia e sega ni tukuna o Jiova.
29 Era veidabui na lewenivanua, era butako,+ era vakasaurarataka na vakaloloma kei na dravudravua, era dabuya na vulagi, era sega ni lewai koya vakadodonu.’
30 “‘Au vakaraica tiko e dua vei ira me vakavinakataka na baivatu, se duri ena qaraqara ni bai e mataqu ena vuku ni vanua me kua ni vakarusai,+ ia au sega ni raica e dua.
31 Au na sova gona vei ira na noqu cudru, meu vakarusai ira ena bukawaqa ni noqu cudru waqawaqa. Au na sauma vei ira* na nodra ivalavala,’ e kaya na Turaga Cecere Duadua o Jiova.”
iVakamacala e ra
^ Ipe., “o na lewa, o na lewa.”
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
^ Se “luveniyali.”
^ Ipe., “vakaraitaka na luvawale nei tamadra.”
^ Ipe., “sauma e uludra.”
