Isikeli 25:1-17
25 E vosa tale vei au o Jiova, e kaya:
2 “O iko na luve ni tamata, mo rai vei ira na Amoni,+ mo parofisaitaka vei ira na ka ca.+
3 Mo kaya me baleti ira na Amoni, ‘Moni rogoca na nona vosa na Turaga Cecere Duadua o Jiova. Qo na ka e tukuna na Turaga Cecere Duadua o Jiova: “Ni oni kaya ‘Maleka!’ ina noqu itikotiko tabu ena gauna e beci kina, ena qele e Isireli ni biu wale tu, kei ira na Juta nira kau vakavesu,
4 au na soli kemuni gona vei ira na lewenivanua ena Tokalau mera taukeni kemuni. Era na birika ena nomuni vanua na nodra keba, era na vakaduria na nodra valelaca ena tikimuni. Era na kania na nomuni vuata, era na gunuva na memuni sucu.
5 Au na vakarautaki Rapa+ me nodra vanua veico na kameli, na vanua o Amoni me nodra ivakavakacegu na qelenisipi, oni na qai kila ni o yau o Jiova.”’”
6 “Qo na ka e kaya na Turaga Cecere Duadua o Jiova: ‘Ni o vakasausau e ligamu,+ o butubutu e yavamu, o veivakasewasewani tale ga ena levu ni nomu marautaka na ca e tara na vanua o Isireli,+
7 au na dodoka kina na ligaqu vei iko meu soli iko vei ira na veimatanitu mo itokinivalu. Au na muduki iko tani vei ira na lewe ni veivanua, au na vakarusai iko mai na veivanua.+ Au na vakawabokotaki iko, o na qai kila ni o yau o Jiova.’
8 “Qo na ka e kaya na Turaga Cecere Duadua o Jiova: ‘Ni rau tukuna o Moapi+ kei Sia,+ “Raica! o Juta e vakataki ira kece na veimatanitu,”
9 au na vakarawarawataka na kabakoro ena baba nei Moapi, ena koro kece ena iyala ni nona vanua, na iukuuku ni nona vanua, o Peci-isimoci, o Peali-mioni, me yaco i Kiriaceimi.+
10 Au na soli koya kei ira na Amoni vei ira na lewenivanua ena Tokalau+ mera taukena mera kua kina ni nanumi na Amoni ena veimatanitu.+
11 Au na tauca vei Moapi na kena itotogi,+ era na qai kila ni o yau o Jiova.’
12 “Qo na ka e kaya na Turaga Cecere Duadua o Jiova, ‘E totogitaki Juta o Itomi, e cala vakalevu ni sauma vei ira na ka ca,+
13 ia qo na ka e kaya na Turaga Cecere Duadua o Jiova: “Au na dodoka tale ga na ligaqu vei Itomi meu vakarusa mai kea na tamata kei na manumanu, au na vakalala.+ Era na bale ena iseleiwau me tekivu mai Temani me yaco i Titana.+
14 ‘Au na totogitaki Itomi niu vakayagataki ira na noqu tamata na Isireli.+ Era na tauca vei Itomi na noqu cudru kei na noqu cudru levu, era na vakila na noqu vakatauitotogi,’+ e kaya na Turaga Cecere Duadua o Jiova.”’
15 “Qo na ka e kaya na Turaga Cecere Duadua o Jiova: ‘Nira veicati tiko ga na kai Filisitia, era nakita ena dela ni nodra veibeci mera veitotogitaki mera veivakarusai.+
16 Qo gona na ka e kaya na Turaga Cecere Duadua o Jiova: “Au na dodoka na ligaqu vei ira na kai Filisitia,+ au na vakarusai ira na kai Kireci+ kei ira na vo tiko e baravi.+
17 Au na cudruvi ira vakalevu ena itotogi kaukaua, era na qai kila ni o yau o Jiova au totogitaki ira.”’”
