Isikeli 29:1-21
29 Ena ikatini ni yabaki, ena ikatini ni vula ena ika12 ni siga ni vula, e vosa vei au o Jiova, e kaya:
2 “O iko na luve ni tamata mo rai vei Fero na tui Ijipita, mo parofisaitaka vua na ka ca, kei na ca ena yacovi Ijipita taucoko.+
3 Mo cavuta na vosa qo: ‘Qo na ka e tukuna na Turaga Cecere Duadua o Jiova:
“Au na valuti iko Fero na tui Ijipita,+Na manumanu vakaitamera ni wasawasa e davo koto ena uciwai lalai ni nona Naile,*+E kaya, ‘E noqu na Uciwai na Naile.
Au bulia me noqu.’+
4 Ia au na cobara e galegalemu na batinisiwa, au na vakavuna mera kabita na varimu na ika ni nomu Naile.
Au na kauti iko cake mai na Naile kei ira kece na ika ni Naile era kabita na varimu.
5 Au na biuti iko ena vanua talasiga, o iko kei ira kece na ika ni nomu Naile.
O na lutu ena delanivanua ia o na sega ni kumuni se soqoni vata.+
Au na soli iko me kedra na manumanu kila ni vanua kei na manumanuvuka ni lomalagi.+
6 Era na qai kila kece na lewe i Ijipita ni o yau o Jiova,Nira sega ni tokona tale na vuvale ni Isireli, era dua ga na tolonicovuata madu.*+
7 Nira qumia na ligamu, o lauqaqi,O vakavuna mera musuka na tabadra.
Nira raviti iko o ramusu,O vakavuna me ninini na yavadra.”*+
8 “‘Ia qo na ka e tukuna na Turaga Cecere Duadua o Jiova: “Au na kauta yani vei iko na iseleiwau,+ au na vakamatea na tamata kei na manumanu era tiko vei iko.
9 Ena lala na vanua o Ijipita, ena vakarusai,+ era na qai kila ni o yau o Jiova, ni o kaya,* ‘E noqu na Uciwai na Naile, au bulia.’+
10 Au na valuti iko gona kei na nomu Naile, au na vakarusa na vanua o Ijipita, ena mamaca, ena laladidi,+ mai Mikitoli+ me yaco i Saini,+ me yaco sara ina iyala ni vanua o Iciopea.
11 Ena sega ni taubaletaka na tamata se manumanu,+ ena sega ni tawani me 40 na yabaki.
12 Au na vakalala na vanua o Ijipita me vanua lala vei ira na veivanua, ena laladidi na kena koro vei ira kece na koro me 40 na yabaki,+ au na vakasavi ira na Ijipita ina veimatanitu, au na cemuri ira ina veivanua.”+
13 “‘Qo na ka e kaya na Turaga Cecere Duadua o Jiova: “Oti e 40 na yabaki au na soqoni ira tale na Ijipita mai vei ira na lewe ni veivanua era vakasavi kina,+
14 au na kauti ira mai na Ijipita era kau vakavesu mera lesu ina vanua o Pacirosi,+ na vanua era vu mai kina, era na matanitu lailai e kea.
15 Ena lolovira o Ijipita vei ira na veimatanitu, ena sega ni lewai ira na veimatanitu,+ au na vakalailaitaki ira mera kua ni vakamalumalumutaka e dua tale na matanitu.+
16 Era na sega ni nuitaki koya tale na vuvale ni Isireli,+ ia era na nanuma na cala ni nodra kere veivuke vei Ijipita. Era na qai kila ni o yau na Turaga Cecere Duadua o Jiova.”’”
17 Ena ika27 ni yabaki, ena imatai ni vula ena imatai ni siga ni vula, e vosa vei au o Jiova, e kaya:
18 “O iko na luve ni tamata, e vakacakacakataki ira vakalevu na nona mataivalu o Nepukanesa*+ na Tui Papiloni me ravuti Taia.+ Era cou kece, e dradrakusikusi kece na tabadra. Ia e sega ni saumi kina o koya kei na nona mataivalu ena levu ni ka e cakava me valuti kina o Taia.
19 “O koya gona, qo na ka e tukuna na Turaga Cecere Duadua o Jiova: ‘Au na solia na vanua o Ijipita vei Nepukanesa* na Tui Papiloni,+ ena kauta na kena iyau, ena kauta e levu na itokinivalu, ena kovea tale ga na ka e vo, qori sara ga ena kedra isau na nona mataivalu.’
20 “‘Au na solia vua na vanua o Ijipita me isau ni nona cakacaka me valuti koya,* nira cakava qori ena vukuqu,’+ e kaya na Turaga Cecere Duadua o Jiova.
21 “Ena siga oya au na vakatubura e dua na ileu me nona na vuvale ni Isireli,*+ au na solia vei iko na gauna mo vosa vei ira, era na qai kila ni o yau o Jiova.”
iVakamacala e ra
^ Ena tikina qo kei na vo ni tikina, na “Naile” e dusia na uciwai kei na kena ikelimusu.
^ Ipe., “gasau.”
^ Ipe., “tolodra.”
^ Ipe., “ni kaya o koya.”
^ Ipe., “Nepukatiresa,” e dua tale na kena ivolavolai.
^ Ipe., “Nepukatiresa,” e dua tale na kena ivolavolai.
^ Oya me valuti Taia.
^ Se “vakaukauataka na vuvale ni Isireli.”
