Isikeli 3:1-27
3 E mani kaya vei au o koya: “O iko na luve ni tamata, mo kania na ka e tu e matamu.* Mo kania na ivolavivigi qo mo lai vosa ina vuvale ni Isireli.”+
2 Au dalaga e vakani au sara o koya ena ivolavivigi qo.
3 E kaya tale vei au: “O iko na luve ni tamata, mo kania na ivolavivigi qo au solia vei iko me mamau kina na ketemu.” Au mani kania, e kamikamica sara ga e gusuqu me vaka na denioni.+
4 E kaya vei au: “O iko na luve ni tamata, mo lako ina vuvale ni Isireli mo tukuna vei ira na noqu vosa.
5 O sega ni talai vei ira na tamata e dredre ni kilai na nodra vosa se duatani na nodra vosa, ina vuvale ga ni Isireli.
6 O sega ni talai vei ira e levu na lewe ni veivanua e dredre ni kilai na nodra vosa se duatani na nodra vosa mo sega ni kila na ka era tukuna. Keu talai iko vei ira, era na rogoci iko.+
7 Ia ena sega ni via rogoci iko na vuvale ni Isireli nira sega ni via rogoci au.+ Nira yalokaukaua ra qai domoqa kece na vuvale ni Isireli.+
8 Raica! Au sa vakaukauataka na matamu me vaka na matadra, au vakaukauataka tale ga na yadremu me vaka na yadredra.+
9 Au cakava na yadremu me vaka na daimani, me kaukaua mai na vatu.+ Mo kua ni rerevaki ira, mo kua ni domobulataka na matadra,+ nira dua na vuvale talaidredre.”
10 E kaya tale vei au: “O iko na luve ni tamata, mo tugana e lomamu, mo rogoca na vosa kece au tukuna vei iko.
11 Mo lako vei ira na kainomu era vesu tu*+ mo vosa vei ira. Mo tukuna vei ira, ‘Qo na ka e kaya na Turaga Cecere Duadua o Jiova,’ se ra mani rogoca se sega.”+
12 E qai kauti au e dua na yalo,+ au rogoca sara na vadugu e dakuqu, e kaya: “Me vakacaucautaki mada ga na lagilagi i Jiova mai na nona yasana.”
13 E rogo mai na cakurobaroba ni tabadratou na kabula ni veidrigidrigi,+ na rorogo ni yavaniqiqi e toka e yasadratou,+ kei na vadugu.
14 E laveti au na yalo me kauti au yani, au mani lako ena rarawa kei na yalokatakata, ia e vakaukauataki au tiko ga na liga i Jiova.
15 Au yaco sara vei ira na vesu tu e Teliapipi era vakaitikotiko ena bati ni uciwai na Kipa,+ au mani tiko e kea ena nodra itikotiko, au ririko+ niu maliwai ira me vitu na siga.
16 Ni cava e vitu na siga, e vosa vei au o Jiova:
17 “O iko na luve ni tamata, au lesi iko mo nodra ivakatawa na vuvale ni Isireli,+ ni o rogoca na vosa ni gusuqu, mo tukuna sara vei ira na noqu ivakasala.+
18 Niu tukuna vua na tamata ca, ‘O na mate sara ga,’ ia o sega ni vakasalataki koya, o sega ni tukuna mo vakasalataka na tamata ca me biuta na nona itovo ca me bula kina,+ ena mate ena nona cala na tamata ca,+ ia au na taroga vei iko na nona dra.*+
19 Ni o vakasalataka na tamata ca qai sega ni biuta na nona itovo ca kei na ivakarau ca, ena mate ena nona cala, ia o na vakabulai iko dina.+
20 Ni biuta na nona ivalavala dodonu e dua e dau cakadodonu me cakava na ka e cala, au na biuta e matana na ka me tarabe kina, ena mate.+ Ke o sega ni vakasalataki koya, ena mate ena nona ivalavala ca, ena sega tale ga ni nanumi na nona cakadodonu, ia au na taroga vei iko na nona dra.*+
21 Ni o vakasalataka e dua e dau cakadodonu me kua ni valavala ca qai sega ni valavala ca, ena bula tiko ni vakasalataki,+ o na vakabulai iko tale ga.”
22 E mai tiko vei au e kea na liga i Jiova, e kaya vei au: “Tucake, lako ina vanua bucabuca, au na vosa vei iko e kea.”
23 Au duri sara meu lako ina vanua bucabuca, ia raica! e tu e kea na lagilagi i Jiova,+ e vaka na lagilagi au raica ena bati ni uciwai na Kipa,+ au mani davo vakatoboicu.
24 E qai sobuti au na yalo tabu, e vakaduri au e yavaqu,+ e vosa sara vei au na Kalou:
“Lai sogoti iko ena nomu vale.
25 O iko na luve ni tamata, era na vesuki iko ena dali mo kua ni lako yani vei ira.
26 Au na vakabira na yamemu ena dokanigusumu, o na galu, o na sega ni vunauci ira rawa, nira dua na vuvale talaidredre.
27 Ia niu vosa vei iko au na dolava na gusumu, mo tukuna vei ira,+ ‘Qo na ka e kaya na Turaga Cecere Duadua o Jiova.’ O koya e rogoca me rogoca sara,+ o koya e bese ni rogoca me kua ga, nira dua na vuvale talaidredre.+
iVakamacala e ra
^ Ipe., “kania na ka o raica.”
^ Ipe., “na luvedra na kainomu.”
^ Se “au na totogitaki iko ena vuku ni nona dra.”
^ Se “au na totogitaki iko ena vuku ni nona dra.”
