Isikeli 32:1-32
32 Ena ika12 ni yabaki, ena ika12 ni vula ena imatai ni siga ni vula, e vosa tale vei au o Jiova, e kaya:
2 “O iko na luve ni tamata, mo lagata e dua na sere ni lolosi me baleti Fero na tui Ijipita, mo kaya vua,‘O vaka na luvenilaione kaukaua ni veimatanitu,Ia o sa vagalui.
O vaka na manumanu levu ni wasawasa,+ o veitosoyaki vakaukaua ena nomu veiuciwai,O vakavuvuya na wai ena yavamu, o vakaduka na* veiuciwai.’
3 Qo na ka e kaya na Turaga Cecere Duadua o Jiova:
‘Au na viritaka vei iko na noqu lawa niu vakayagataka e dua na ilala levu mai na veimatanitu,Era na yavi iko ena noqu lawa.
4 Au na biuti iko ena vanua,Au na biuti iko ena vanua lala.
Au na vakavuna mera rovi iko na manumanuvuka kece ni lomalagi,Au na vakamamautaka na manumanu kila ni vuravura taucoko ena lewemu.+
5 Au na biuta na lewemu ena veiulunivanua,Au na vakasinaita na veibuca ena vo ni yagomu.+
6 Au na luvuca na vanua ena nomu dra e drodro vakayauyau me yacova na veiulunivanua,Ena sinai kina na veiuciwai.’*
7 ‘Ni o sa mate au na ubia na lomalagi, au na vakabutobutotaka na kedra kalokalo.
Au na vakaruguta na matanisiga ena o,Ena sega ni cila na vula.+
8 Au na vakabutobutotaka na vunirarama kece ni lomalagi ena vukumu,Au na vakabutobutotaka na nomu vanua,’ e kaya na Turaga Cecere Duadua o Jiova.
9 ‘Au na vakararawataka na lomadra e levu na lewe ni veivanua niu tuberi ira na nomu kaivesu ina veimatanitu,Ina veivanua o sega ni kila.+
10 Au na vakidroataka e levu na lewe ni veivanua,Era na domobulataki iko na nodra tui niu wiricaka e matadra na noqu iseleiwau.
Era na ninini tiko ga nira leqataka yadua de ra mate,Ena siga o bale kina.’
11 Qo na ka e kaya na Turaga Cecere Duadua o Jiova:
‘Ena lauti iko na iseleiwau nei tui Papiloni.+
12 Au na vakabalea na nomu ilala levu ena nodra iseleiwau na tamata qaqa,Era tamata voravora kece ni veimatanitu.+
Era na vakamalumalumutaka na viavialevu nei Ijipita, ena vakarusai na nona ilala levu.+
13 Au na vakarusa na nona manumanu kece ena nona bati ni wai levu,+Ena sega ni dua na yava ni tamata se yava ni manumanu me vakavuvuya tale.’+
14 ‘Ena gauna oya au na vakamakaretaka na medra wai,Au na vakadrodroya na nodra uciwai me vaka na waiwai,’ e kaya na Turaga Cecere Duadua o Jiova.
15 ‘Niu vakalalai Ijipita, na vanua e kau tani na ka kece e tu kina,+Au vakarusa kece na lewena,Era na qai kila ni o yau o Jiova.+
16 Qo na sere ni lolosi era na lagata dina na tamata,Era na lagata na goneyalewa ni veimatanitu.
Era na lagata vei Ijipita kei ira kece na nona ilala levu,’ e kaya na Turaga Cecere Duadua o Jiova.”
17 Ia ena ika12 ni yabaki ena ika15 ni siga ni vula, e qai vosa vei au o Jiova, e kaya:
18 “O iko na luve ni tamata, mo osivaki ira na ilala levu nei Ijipita, mo kauti koya sobu e ruku ni qele, o koya, o ira kece na goneyalewa ni veimatanitu qaqa, kei ira na lako sobu ina qara.*
19 “‘O uasivi cei ena kemu totoka? Mo lako sobu, mo davo vata kei ira na sega ni cili!’
20 “‘Era na bale kei ira na mate ena iseleiwau.+ Sa soli o koya ina iseleiwau, moni yarataki koya yani kei ira kece na nona ilala levu.
21 “‘Era na vosa vua na tamata qaqa kei ira na vukei koya ena boto ni iBulubulu.* Era na lako sobu, era na davo me vakataki ira na sega ni cili era mate ena iseleiwau.
22 E tiko e kea o Asiria kei na nona isoqosoqo kece. E wavokiti koya na nodra ibulubulu, era bale kece ena iseleiwau.+
23 Na nona ibulubulu e tiko ena boto ni qara,* era wavokita na nona ibulubulu na nona isoqosoqo, era mate kece ena iseleiwau nira veivakarerei ena nodra vanua na bula.
24 “‘E tiko e kea o Ilama+ kei na nona ilala levu, era wavokita na nona ibulubulu, era bale kece ena iseleiwau. Era lako sobu e ruku ni qele, era sega ni cili, era veivakarerei ena nodra vanua na bula. Era na madua kei ira na lako sobu ina qara.*
25 Era cakava e dua na nona idavodavo ena kedra maliwa na vakamatei, me nodra tale ga na nona ilala levu kece era wavokita na nona ibulubulu. Era sega kece ni cili, era mate ena iseleiwau nira veivakarerei ena nodra vanua na bula. Era na madua kei ira na lako sobu ina qara.* E biu vata kei ira na vakamatei.
26 “‘E tiko kina o Meseki kei Tupali+ kei ira kece na nodrau* ilala levu. E wavokiti koya na nodra* ibulubulu. Era sega kece ni cili, era lausua ena iseleiwau nira veivakarerei ena nodra vanua na bula.
27 Era na davo vata kei ira na tamata qaqa sega ni cili era sa bale, era lako sobu ina iBulubulu* kei na nodra iyaragi ni ivalu. Era na biuta na nodra iseleiwau ena ruku ni uludra* kei na nodra ivalavala ca ena dela ni suidra, nira vakarerea na tamata qaqa qo na nodra vanua na bula.
28 Ia o iko o na lauqaqi kei ira na sega ni cili, o na davo kei ira na mate ena iseleiwau.
29 “‘E tiko e kea o Itomi,+ o ira na nona tui kei ira kece na nona turaga, era qaqa ia era davo kei ira na mate ena iseleiwau, era na davo tale ga kei ira na sega ni cili+ kei ira na lako sobu ina qara.*
30 “‘Era tiko kina o ira na turaga kece mai na vualiku kei ira kece na kai Saitoni,+ era veivakarerei nira kaukaua, ia era lako sobu ena madua kei ira na mate. Era na davo kei ira na sega ni cili era mate ena iseleiwau, era na madua kei ira na lako sobu ina qara.*
31 “‘Ena raica kece qori o Fero, ena vakacegui koya na ka kece e yacovi ira na nona ilala levu,+ ena mate ena iseleiwau o Fero kei ira kece na nona mataivalu,’ e kaya na Turaga Cecere Duadua o Jiova.
32 “‘Ni vakarerei ira na tiko ena nodra vanua na bula o Fero kei ira kece na nona ilala levu, era na davo kei ira na sega ni cili, oya o ira na mate ena iseleiwau,’ e kaya na Turaga Cecere Duadua o Jiova.”
iVakamacala e ra
^ Ipe., “na nodra.”
^ Ipe., “Na veiuciwai ena sinai ena tikimu.”
^ Se “ibulubulu.”
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Se “ibulubulu.”
^ Se “ibulubulu.”
^ Se “ibulubulu.”
^ Ipe., “nona.”
^ Ipe., “nona.”
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Rairai dusi ira na tamata qaqa era bulu kei na nodra iseleiwau, e vakayacori vei ira na vakarokoroko vakaivalu.
^ Se “ibulubulu.”
^ Se “ibulubulu.”
