Isikeli 34:1-31
34 E vosa tale vei au o Jiova, e kaya:
2 “O iko na luve ni tamata, mo parofisaitaka na ka ca vei ira na ivakatawa e Isireli. Mo parofisai, mo kaya vei ira na ivakatawa, ‘Qo na ka e tukuna na Turaga Cecere Duadua o Jiova: “Era rarawa na ivakatawa e Isireli,+ era vakani ira tiko ga! E dodonu mera vakania na qelenisipi.+
3 Oni kania na uro, oni vakaisulu ena vutinisipi, oni vakamatea na manumanu uro,+ ia oni sega ni vakania na qelenisipi.+
4 Oni sega ni vakaukauataki ira na malumalumu, se vakabulai ira na tauvimate, se vadretitaki ira na mavoa, se vakalesui ira mai na lako sese, se vaqarai ira era yali,+ ia oni lewai ira ga vakaukaua, oni lewai ira vakasaurara.+
5 Era mani veiseyaki ni sega na ivakatawa,+ era veiseyaki qai kani ira na manumanu kila kece ni vanua.
6 Era lako sese na noqu sipi ena veiulunivanua kece kei na veidelana cecere, era veiseyaki ina veiyasa i vuravura kece na noqu sipi, e sega ni dua e vaqarai ira se via raici ira.
7 “‘“Ia qo moni rogoca na vosa i Jiova o kemuni na ivakatawa:
8 ‘“Niu bula dina tiko,” e kaya na Turaga Cecere Duadua o Jiova, “era kovei na noqu sipi, e kedra na manumanu kila kece ni vanua ni sega na ivakatawa, era sega ni vaqara na noqu sipi na noqu ivakatawa, ia era vakani ira tiko ga, era sega ni vakania na noqu sipi,”’
9 moni rogoca gona na vosa i Jiova o kemuni na ivakatawa.
10 Qo na ka e tukuna na Turaga Cecere Duadua o Jiova: ‘Au na veimecaki kei ira na ivakatawa, au na tarogi ira ena vukudra na noqu sipi,* au na vakasukai ira mera kua ni vakania* na noqu sipi,+ era na sega tale ni vakani ira. Au na vakabula na noqu sipi mai gusudra, era na sega tale ni kani ira.’”
11 “‘Qo na ka e kaya na Turaga Cecere Duadua o Jiova: “O yau qo, au na vaqarai ira ga na noqu sipi, au na karoni ira.+
12 Au na karoni ira na noqu sipi me vaka na ivakatawa e kunea na nona sipi era veiseyaki qai vakani ira.+ Au na vakabulai ira mai na vanua kece era veiseyaki kina ena siga ni o kei na butobuto loaloa.+
13 Au na kauti ira tani vei ira na lewe ni veivanua, au na soqoni ira mai na veivanua meu kauti ira ina nodra vanua, au na vakani ira ena veiulunivanua e Isireli,+ oya ena bati ni veiuciwai kei na itikotiko kece ena vanua.
14 Au na vakani ira ena veico vinaka, era na kana ena veiulunivanua cecere e Isireli.+ Era na davo mai kea ena vanua veico vinaka,+ era na kana ena veico bulabula ena veiulunivanua e Isireli.”
15 “‘“O yau ga au na vakani ira na noqu sipi,+ au na vakadavori ira,”+ e kaya na Turaga Cecere Duadua o Jiova.
16 “Au na vaqarai koya e yali,+ au na vakalesui koya mai e lako sese, au na vadretitaki koya e mavoa, au na vakaukauataki koya e malumalumu, ia au na vakawabokotaki koya e urouro kei koya e kaukaua. Au na vakani koya qori ena itotogi.”
17 “‘Kemuni na noqu sipi, qo na ka e kaya na Turaga Cecere Duadua o Jiova: “Au vakarau vakataulewa ena vukuna na sipi qo kei na sipi oya, ena vukudra na tamanisipi kei na me tagane.+
18 E sega ni rauti kemuni moni kana ena veico vinaka? Moni butubutuka tale ga na vo ni nomuni vanua veico? Ni oni gunuva oti na wai makare, moni vakavuvuya na wai ni oni butubutuka e yavamuni?
19 Mera kana na noqu sipi ena vanua veico oni butubutuka e yavamuni ra qai gunuva na wai oni vakavuvuya ni oni butubutuka e yavamuni?”
20 “‘Ia qo na ka e tukuna vei ira na Turaga Cecere Duadua o Jiova: “O yau qo, au na vakataulewa ena vukuna na sipi urouro kei na sipi yago ca,
21 ni oni veibili tiko ena sarisarimuni kei na tabamuni, oni cumuti ira tiko na tauvimate ena nomuni ileu me yacova ni oni vakasavi ira i vanuatani.
22 Au na vakabulai ira na noqu sipi, era na sega tale ni kovei,+ au na vakataulewataka na sipi qo kei na sipi oya.
23 Au na lesia e dua na kedra ivakatawa,+ oya na noqu tamata o Tevita,+ ena vakani ira. Ena vakani ira o koya, ena kedra ivakatawa.+
24 O yau o Jiova au na nodra Kalou,+ na noqu tamata o Tevita ena nodra turaga.+ O yau o Jiova au tukuna.
25 “‘“Au na veiyalayalati vata kei ira ena veiyalayalati ni vakacegu,+ au na kauta tani ena vanua na manumanu kila rerevaki+ mera tikovakacegu ena vanua talasiga, mera moce tale ga e veikau.+
26 Au na cakava mera vu ni veivakalougatataki,+ o ira kei na vanua volekata na noqu delana, au na vakatauca na uca ena kena gauna. Ena tau mai na veivakalougatataki me vaka na uca.+
27 Ena vua na kau kece ni vanua, ena vuataka na qele na vuana,+ era na tikovakacegu ena vanua. Era na qai kila ni o yau o Jiova niu musuka na kedra ivua+ meu vakabulai ira mai vei ira na kauti ira vakavesu.
28 O ira na veimatanitu era na sega tale ni kovei ira, o ira na manumanu kila e vuravura era na sega ni kanilaki ira, era na tikovakacegu, ena sega ni dua me vakarerei ira.+
29 “‘“Au na vakarautaka vei ira e dua na iteitei rogo, era na sega tale ni mate ena dausiga ena vanua,+ ena sega tale ga ni vakamaduataki ira na veimatanitu.+
30 ‘Era na qai kila ni o yau o Jiova na nodra Kalou au tokona na vuvale i Isireli, era noqu tamata,+ e kaya na Turaga Cecere Duadua o Jiova.”’
31 “‘Ia o kemuni oni noqu sipi,+ na sipi au karona, oni tamata ga o yau na nomuni Kalou,’ e kaya na Turaga Cecere Duadua o Jiova.”
