Isikeli 38:1-23
38 E vosa tale vei au o Jiova, e kaya:
2 “O iko na luve ni tamata mo vagolea na matamu vei Koki ena vanua o Mekoki,+ na nodra turaga levu na Meseki kei Tupali,+ mo parofisaitaka vua na ka ca.+
3 Mo kaya, ‘Qo na ka e tukuna na Turaga Cecere Duadua o Jiova: “Au sa cudruvi iko Koki, na turaga levu na Meseki kei Tupali.
4 Au na vukici iko, au na biuta na iqaso e galegalemu+ meu kauti iko mai tuba kei ira kece na nomu mataivalu,+ na nomu ose kei ira na vodoka, era vakaisulu totoka kece, na isoqosoqo levu era vakaisasabai lelevu kei na isasabai lalai,* era vakaiseleiwau kece,
5 e tomani ira o Perisia, o Iciopea kei Pate,+ era vakaisasabai lalai kece, era vakaisala,
6 era tokoni iko e levu na lewe ni veivanua, o Komera kei na nona sotia kece, na kawa nei Tokama+ mai na vanua yawa ena vualiku, kei ira kece na kena sotia.+
7 “‘“Mo vakarau, mo vakarautaki iko kei na nomu mataivalu kece era soqoni mai vei iko, o na nodra komada.*
8 “‘“O na lewai* ni oti e levu na siga. Ena icavacava ni veiyabaki o na curuma na nodra vanua na vakabulai mai na iseleiwau, era kumuni mai vei ira e levu na lewe ni veivanua mera lako ina veiulunivanua e Isireli a rusa dede tu. Era kau mai na veivanua o ira na lewenivanua qo, era tikovakacegu kece.+
9 O na ravuti ira me vaka na cava, o na robota na vanua me vaka na o, o iko kei ira na nomu sotia kece kei na levu na lewe ni veivanua era tokoni iko.”’
10 “Qo na ka e kaya na Turaga Cecere Duadua o Jiova: ‘Ena siga oya o na veinanuyaka e lomamu e levu na ka, o na lalawataka na ka ca.
11 O na kaya: “Au na ravuta na vanua e tiko kina na itikotiko e sega ni taqomaki.+ Au na valuti ira era tikovakacegu, era sega ni vakasosani. Era tiko kece ena vanua e sega ni taqomaki ena bai, ena ilati ni matamata, se na matamata.”
12 Ena kauta e levu na itokinivalu, me ravuta na vanua lala sa tawani tale+ kei ira na lewenivanua era kumuni tale mai na veivanua,+ era kumuna e levu na iyau kei na qele,+ era tiko ena loma ni vuravura.
13 “‘Ena kaya vei iko o Sipa+ kei Titana,+ o rau na dauveivoli ni Tasisi+ kei ira kece na nona tamata qaqa:* “O lako mai mo kauta e levu na nomu itokinivalu kei na iyau? O soqoni ira na nomu mataivalu mera yauta na siliva kei na koula, mera taura na iyau kei na qele, mera kovea e levu sara na itokinivalu?”’
14 “Mo parofisai gona o iko na luve ni tamata, mo kaya vei Koki, ‘Qo na ka e kaya na Turaga Cecere Duadua o Jiova: “Ena siga oya o na kila nira tikovakacegu na noqu tamata na Isireli.+
15 O na biuta na nomu yasana mai na vanua yawa ena vualiku,+ o iko kei na levu na lewe ni veivanua era tokoni iko, era vodo ose kece, na isoqosoqo kaukaua, na mataivalu levu.+
16 O na ravuti ira na noqu tamata na Isireli me vaka na o e ubia na vanua. Au na kauti iko mai mo valuta na noqu vanua ena veisiga mai muri,+ mera kilai au na veimatanitu niu vakayagataki iko Koki meu rokovi kina e matadra.”’+
17 “Qo na ka e kaya na Turaga Cecere Duadua o Jiova: ‘O iko ga qo au tukuna ena gauna e liu ena gusudra na noqu tamata na parofita e Isireli, era parofisaitaka me vica vata na yabaki ni o na valuti ira?’
18 “‘Ena siga oya, na siga ena curuma kina o Koki na vanua o Isireli,’ e kaya na Turaga Cecere Duadua o Jiova, ‘ena waqa sara ga na noqu cudru levu.+
19 Au na vosa ena noqu cudru kei na noqu cudru waqawaqa, ena siga oya ena dua na uneune levu ena vanua o Isireli.
20 Ena vukuqu ena ninini na ika ni wasawasa, na manumanuvuka ni lomalagi, na manumanu kila ni vanua, na manumanu kece era qasi ena qele, kei ira kece na tamata era tiko e vuravura, ena talaraki na veiulunivanua,+ ena lulutu na barinivatu, ena kasura ina qele na bai kece.’
21 “‘Au na kaciva na iseleiwau me valuti koya ena noqu ulunivanua kece,’ e kaya na Turaga Cecere Duadua o Jiova. ‘Era na ravuta ga na tacidra ena nodra iseleiwau.+
22 Au na lewai koya niu totogitaki koya ena matedewa+ kei na vakadavedra, au na vakatauca na uca bi kei na mataniuca qereqere+ kei na bukawaqa+ kei na sulifure+ me tauci koya, o ira na nona sotia, kei na levu na lewe ni veivanua era tokoni koya.+
23 Au na vakacerecerei au sara ga, au na vakarokorokotaki au, au na vakatakilai au e matadra e levu na veimatanitu, era na qai kila ni o yau o Jiova.’
iVakamacala e ra
^ Qo na isasabai lalai era dau kauta na dauvanataka na dakaititi.
^ Ipe., “yadra.”
^ Se “kacivi.”
^ Ipe., “luvenilaione kaukaua.”
