Isikeli 39:1-29
39 “O iko na luve ni tamata, mo parofisaitaka na ka ca vei Koki,+ mo tukuna vua, ‘Qo na ka e kaya na Turaga Cecere Duadua o Jiova: “Au na saqati iko Koki na turaga levu ni Meseki kei Tupali.+
2 Au na vukici iko meu liutaki iko, au na vakavuna mo biuta mai na vanua yawa ena vualiku,+ au na kauti iko ina veiulunivanua e Isireli.
3 Au na tavia tani na nomu dakaititi ena ligamu imawi, au na vakalutuma na nomu gasau ena ligamu imatau.
4 O na bale ena veiulunivanua e Isireli,+ o iko, o ira kece na nomu sotia, kei ira na lewe ni veivanua era tokoni iko. Au na soli iko me kedra kakana na veimataqali manumanuvuka* kei na manumanu kila ni vanua.”’+
5 “‘O na bale ena vanua lala+ niu tukuna sara ga o yau,’ e kaya na Turaga Cecere Duadua o Jiova.
6 “‘Au na tala na bukawaqa i Mekoki kei ira na tikovakacegu ena veiyanuyanu,+ era na qai kila ni o yau o Jiova.
7 Au na vakatakila na yacaqu tabu vei ira na noqu tamata na Isireli, au na sega ni vakatara me beci tale na yacaqu tabu. Era na qai kila na veimatanitu ni o yau o Jiova,+ na Yalosavasava ni Isireli.’+
8 “‘Io, sa voleka mai, ena vakayacori,’ e kaya na Turaga Cecere Duadua o Jiova. ‘Qo na siga au a tukuna.
9 Era na lako yani na lewe ni veikoro e Isireli mera vakama na iyaragi, oya na isasabai lalai,* na isasabai, na dakaititi, na gasau, na iwau ni ivalu,* kei na moto. Era na waqara me buka+ me vitu na yabaki.
10 Era na sega ni cabuka ena nodra vanua, se kau buka mai veikau nira na vakayagataka na iyaragi me buka.’
“‘Era na taura mai na itokinivalu vei ira na ravuti ira kei na iyau vei ira na kovei ira,’ e kaya na Turaga Cecere Duadua o Jiova.
11 “‘Ena siga oya au na solia vei Koki+ e dua na ibulubulu e Isireli, ena nodra buca na dau lako ena tokalau ni waitui, ena latia na nodra sala na muri kina. Oya na vanua era na buluti Koki kina kei ira kece na nona ilala levu, era na vakatoka me Buca o Emoni-koki.*+
12 Ena vitu na vula nodra buluti ira tiko na vuvale ni Isireli me savasava kina na vanua.+
13 Era na vakaitavi kece na lewenivanua ena nodra bulu, era na rogo kina ena siga au vakalagilagi au kina,’+ e kaya na Turaga Cecere Duadua o Jiova.
14 “‘Era na lesi eso mera lako voli ena vanua mera buluta na yago mate e vo ena delanivanua me savasava kina. Era na vaqaqara tiko me vitu na vula.
15 Nira raica na sui ni tamata o ira na lako voli ena vanua, era na biuta e dua na ivakatakilakila e yasana. Era na qai buluta ena Buca o Emoni-koki o ira na lesi mera bulubulu.+
16 Ena tiko tale ga e kea e dua na koro e vakatokai me o Emona.* Era na vakasavasavataka na vanua.’+
17 “O iko na luve ni tamata, qo na ka e kaya na Turaga Cecere Duadua o Jiova: ‘Mo tukuna vei ira na veimataqali manumanuvuka kei na manumanu kila kece ni vanua, “Moni soqoni vata mai. Moni soqoni mai moni wavokita na noqu isoro au vakarautaka tiko vei kemuni, na isoro levu ena veiulunivanua e Isireli.+ Oni na kania na lewe, oni na gunuva na dra.+
18 Oni na kania na lewedra na tamata qaqa, oni na gunuva na nodra dra na turaga ni vuravura. O ira na tamanisipi, na lami, na me, na bulumakau tagane, na manumanu yagovinaka kece ni Pasani.
19 Oni na kocova na uro, oni na gunuva tale ga na dra moni mateni ena isoro au vakarautaka vei kemuni.”’
20 “‘Oni na vakamamautaki ena noqu teveli ena ose kei ira na dauvodo qiqinivalu, o ira na tamata qaqa kei ira kece na tamataivalu,’+ e kaya na Turaga Cecere Duadua o Jiova.
21 “‘Au na vakaraitaka na noqu lagilagi ena veimatanitu, era na raica kece na veimatanitu na itotogi au tauca kei na kaukaua* au vakaraitaka vei ira.+
22 Me tekivu ena siga oya era na kila na vuvale ni Isireli ni o yau o Jiova na nodra Kalou.
23 Era na qai kila na veimatanitu nira kau vakavesu na vuvale ni Isireli ena vuku ni nodra cakacala, nira sega ni yalodina vei au.+ Au mani vunia vei ira na mataqu,+ au soli ira vei ira na kedra meca+ ra qai bale kece ena iseleiwau.
24 Au cakava vei ira me vaka na nodra dukadukali kei na nodra cala, au vunia vei ira na mataqu.’
25 “O koya gona, qo na ka e kaya na Turaga Cecere Duadua o Jiova: ‘Au na vakalesui ira na kaivesu nei Jekope,+ au na lomana tale ga na vuvale taucoko ni Isireli,+ au na gumatua meu taqomaka na yacaqu tabu.+
26 Nira vakamaduataki oti ena ka kece era cakava nira sega ni yalodina vei au,+ era na tikovakacegu ena nodra vanua, ena sega ni dua me vakarerei ira.+
27 Niu vakalesui ira mai vei ira na lewe ni veivanua, meu kumuni ira mai na nodra vanua na kedra meca,+ au na vakarokorokotaki au ena kedra maliwa nira rai tu e levu na matanitu.’+
28 “‘Era na qai kila ni o yau o Jiova na nodra Kalou, niu soli ira mera kau vakavesu ina veimatanitu au qai kauti ira lesu ina nodra vanua, au sega ni biuta tu yani e dua.+
29 Au na sega ni vunia tale vei ira na mataqu+ niu na sova na yaloqu ina vuvale ni Isireli,’+ e kaya na Turaga Cecere Duadua o Jiova.”
iVakamacala e ra
^ Se “manumanu co kena.”
^ Se rawa ni, dua na iyaragi e momoto na muana.
^ Qo na isasabai lailai era dau kauta na dauvana dakaititi.
^ Se “Nodra Buca na iLala Levu nei Koki.”
^ Kena ibalebale “iLala levu.”
^ Ipe., “ligaqu.”
