Isikeli 43:1-27
43 E kauti au sara o koya ena matamata e donuya na tokalau.+
2 Au mani raica e kea na iserau ni Kalou ni Isireli ni lako tiko mai na tokalau,+ na domona e vaka na rorogo ni kui ni wai,+ e vakararamataka na vuravura na kena iserau.+
3 Na ka au raica e vaka na raivotu au raica niu lako yani meu vakarusa na koro, e vaka na ka au raica volekata na uciwai na Kipa,+ au tekicuva sara ina qele.
4 E qai curuma na valenisoro* na iserau i Jiova ni curu yani ena matamata e donuya na tokalau.+
5 E vakaduri au sara e dua na kabula vakayalo, e kauti au ina raranivale e loma, au raica ni robota na valenisoro na iserau i Jiova.+
6 Au mani rogoca ni vosa vei au e dua mai na loma ni valenisoro, e lako mai me duri volekati au.+
7 E kaya vei au:
“O iko na luve ni tamata, qo na itutu ni noqu idabedabe vakaturaga+ kei na itutu ni qeteqete ni yavaqu,+ na vanua au na tiko kina kei ira na lewe i Isireli me sega ni mudu.+ Era na sega tale ni vakarogocataka na yacaqu tabu na vuvale ni Isireli,+ o ira kei na nodra tui, nira saqamua vakayalo kei na yagodra mate na nodra tui ena gauna era mate kina.
8 Era biuta na nodra ilago volekata na noqu ilago, na nodra duru ni katuba volekata na noqu duru ni katuba, e dua ga na lalaga e lati keimami toka, o yau kei ira,+ era vakarogocataka tale ga na yacaqu tabu ena vakasevaki ni ka era vakayacora, au mani vakawabokotaki ira ena noqu cudru.+
9 Ia qo mera biuta tani na nodra saqamua vakayalo, mera kauta tani vakayawa vei au na yagodra mate na nodra tui, au na qai tiko vata kei ira me tawamudu.+
10 “O iko na luve ni tamata, mo vakamacalataka na valenisoro vua na vuvale ni Isireli,+ era na maduataka na nodra cala,+ mera vulica na kena peleni.*
11 Ke ra maduataka na ka kece era vakayacora, mo vakaraitaka vei ira na droini ni valenisoro, na kena itaratara, na kena katuba, kei na kena matamata.+ Mo vakaraitaka vei ira na kena droini kece kei na kena ivakaro, na kena droini kei na kena lawa, mo vola e matadra mera raica na kena droini kece, mera muria tale ga na kena ivakaro.+
12 Qo na lawa ni valenisoro. E vanua tabu sara na vanua taucoko e kovuta na ulunivanua.+ Raica! Qo na lawa ni valenisoro.
13 “Qo na ivakarau kiupiti ni icabocabonisoro+ (e kuri e dua na rabaniliga ena kiupiti yadua).* E dua na kiupiti na botona, e dua na kiupiti na kena raba. E wavokita na tutuna na iyala ni botona, e dua na ivakarau ni iqaqalo* na kena raba. Qo na boto ni icabocabonisoro.
14 Mai na botona ena fuloa me yala ina vatavata e ra e rua na kiupiti, na kena raba e dua na kiupiti. Mai na vatavata lailai me yala ina vatavata levu e va na kiupiti, na kena raba e dua na kiupiti.
15 Na matadravu ni icabocabonisoro e va na kiupiti na kena cere qai dudu cake mai na matadravu ni icabocabonisoro e va na ileu.+
16 Na matadravu ni icabocabonisoro e tautauvata na balavu ni yasana vava, e 12 na kiupiti na kena balavu, e 12 na kiupiti na kena raba.+
17 Na yasa vava ni vata e 14 na kiupiti na kena balavu, e 14 na kiupiti na kena raba, na kena iyala wavokita e veimama na kiupiti, na botona e dua na kiupiti na yasana kece.
“Na kena ikabakaba e donuya na tokalau.”
18 E qai kaya vei au o koya, “O iko na luve ni tamata, qo na ka e tukuna na Turaga Cecere Duadua o Jiova: ‘Qo na idusidusi me muri ni tara na icabocabonisoro me cabori kina na isoro kama taucoko, me kureitaki kina na dra.’+
19 “‘Mo solia e dua na luvenibulumakau tagane ena qelenibulumakau, me isoro ni ivalavala ca+ vei ira na Livai era bete ena kawa nei Setoki+ era torovi au mera qaravi au,’ e kaya na Turaga Cecere Duadua o Jiova.
20 ‘Mo taura eso na kena dra mo boroya ena va na ileu ni icabocabonisoro, ena tutu vava ni vata, kei na kena iyala wavokita me vakasavasavataki ena ivalavala ca me sorovaki tale ga kina.+
21 Mo qai taura na luvenibulumakau tagane, oya na isoro ni ivalavala ca, mo vakama ena vanua vakarautaki ena valenisoro, qori ena taudaku ni loqi tabu.+
22 Ena ikarua ni siga o na cabora e dua na me tagane yagovinaka me isoro ni ivalavala ca. Era na vakasavasavataka na icabocabonisoro mai na ivalavala ca me vaka ga nira vakasavasavataka na icabocabonisoro mai na ivalavala ca ena luvenibulumakau tagane.’
23 “‘Ni o vakasavasavataka oti qori mai na ivalavala ca, o na cabora e dua na luvenibulumakau tagane yagovinaka mai na qelenibulumakau, kei na dua na tamanisipi yagovinaka mai na qelenisipi.
24 Mo cabora qori vei Jiova, mera kureitaka kina na bete na masima+ me cabori me isoro kama taucoko vei Jiova.
25 O na cabora e veisiga e dua na me tagane me vitu na siga me isoro ni ivalavala ca,+ vaka kina e dua na luvenibulumakau tagane mai na qelenibulumakau kei na dua na tamanisipi mai na qelenisipi, o na cabora na manumanu e sega ni ca e dua na tikina.
26 E vitu na siga mera sorovaka na icabocabonisoro, mera vakasavasavataka mera vakarau vakayagataka.
27 Ni cava na gauna qori, era na cabora na bete ena ikawalu ni siga+ kei na veisiga e tarava na nomuni* isoro kama taucoko kei na nomuni isoro ni veiyaloni ena icabocabonisoro, au na qai marautaki kemuni,’+ e kaya na Turaga Cecere Duadua o Jiova.”
iVakamacala e ra
^ Ipe., “vale.”
^ Ipe., “vakarautaka na kena droini.”
^ Oya na ivakarau ni iqaqalo ni liga, e rauta ni 22.2 na sedimita (8.75 na idi). Raica na iKuri B14.
^ Oya na nodra na lewenivanua.
