Isikeli 44:1-31
44 E kauti au tale o koya ina matamata e tuba ni tikina tabu donuya na tokalau,+ ia e sogo tu.+
2 E qai kaya vei au o Jiova: “Ena sogo tu ga na matamata qo. Me kua ni dola, ena sega ni curu kina e dua, ni a curu kina o Jiova na Kalou ni Isireli,+ o koya gona me sogo tu ga.
3 Ia ena dabe kina na turaga me kana madrai ena mata i Jiova,+ ni turaga o koya. Ena curu yani i loma ena varada ni matamata, ena curu tale mai kina i tuba.”+
4 E kauti au sara o koya ni keirau muria na matamata ena vualiku me keirau yaco ina mata ni valenisoro. Niu rai yani au raica ni vakasinaita na valenisoro i Jiova na iserau i Jiova.+ Au mani tekicuva ina qele.+
5 E qai kaya vei au o Jiova: “O iko na luve ni tamata, mo nanuma matua,* mo raica, mo vakatudaliga ina ka kece au tukuna vei iko me baleta na lawa ni valenisoro i Jiova. Mo nanuma matua na icurucuru ina valenisoro kei na icurucuru kece i tuba ni tikina tabu.+
6 Mo tukuna vua na vuvale talaidredre ni Isireli, ‘Qo na ka e kaya na Turaga Cecere Duadua o Jiova: “Kemuni na vuvale ni Isireli, moni muduka na nomuni ivalavala vakasevaki.
7 Ni oni kauti ira mai na vulagi e sega ni cili na lomadra kei na yagodra ina noqu tikina tabu, era beca na noqu valenisoro. Oni cabora na noqu madrai, na uro, kei na dra, e beci na noqu veiyalayalati ena nomuni ivalavala vakasevaki kece.
8 Oni sega ni qarava vinaka na ka au vakatabuya.+ Ia oni lesia eso tale mera qarava na itavi ena noqu tikina tabu.”’
9 “‘Qo na ka e kaya na Turaga Cecere Duadua o Jiova: “Me kua ni curu ina noqu tikina tabu na vulagi e tiko e Isireli e sega ni cili na lomana kei na yagona.”’
10 “‘Ia o ira na Livai era gole tani vei au+ nira biuti au na Isireli mera muria na nodra matakau vakasisila,* ena bale ga vei ira na nodra cala.
11 Era na veiqaravi ena noqu tikina tabu mera vakatawa na matamata ni valenisoro,+ mera veiqaravi ena valenisoro. Era na vakamatea na isoro kama taucoko kei na nodra isoro na lewenivanua, era na duri tale ga e matadra na lewenivanua mera qaravi ira.
12 Nira qaravi ira e matadra na nodra matakau vakasisila, era vakatarabetaka na vuvale ni Isireli mera valavala ca,+ oya na vuna au laveta kina na ligaqu ena bubului meu totogitaki ira,’ e kaya na Turaga Cecere Duadua o Jiova, ‘ena bale ga vei ira na nodra cala.
13 Era na sega ni torovi au mera noqu bete, se torova na ka au vakatabuya se ka tabu sara, era na madua nira vakayacora na ka vakasevaki.
14 Au na lesi ira ga mera veiqaravi ena valenisoro, mera raica na kena cakacaka, kei na ka kece e dau caka kina.’+
15 “‘O ira na Livai era bete ena kawa nei Setoki,+ era veiqaravi ena noqu tikina tabu nira biuti au na Isireli,+ era na torovi au mera qaravi au, era na duri e mataqu mera cabora vei au na uro+ kei na dra,’+ e kaya na Turaga Cecere Duadua o Jiova.
16 ‘O ira ga qori era na curu ina noqu tikina tabu, era na torova na noqu teveli mera qaravi au,+ era na qarava na nodra itavi vei au.+
17 “‘Mera vakaisulu lineni nira lako yani ena loma ni matamata ni raranivale.+ Mera kua ni vakaisulu vutinisipi nira veiqaravi ena loma ni matamata ni raranivale se i loma.
18 Mera dara na ivauniulu lineni kei na tarausese lekaleka lineni me ubia na dibidra.+ Mera kua ni dara e dua na ka era na buno kina.
19 Ni bera nira lako yani ena raranivale e tuba, oya na raranivale era tiko kina na lewenivanua, mera luvata na nodra isulu ni veiqaravi+ ra qai biuta ena rumunikana tabu.*+ Era na dara eso tale na isulu mera kua ni vakadewa na savasava vei ira na lewenivanua ena nodra isulu.
20 Mera kua ni tasia na uludra,+ se vakatubura me balavu. Mera kotiva ga vakalekaleka na drauniuludra.
21 Mera kua ni gunu waini na bete nira curu ena raranivale e loma.+
22 Mera kua ni vakawatitaka e dua na yada se yalewa sa sere,+ ia mera vakawatitaka ga e dua na goneyalewa ni Isireli se na watina na bete sa mate.’+
23 “‘Mera vakadreti ira na noqu tamata ena duidui ni ka tabu kei na ka e sega ni tabu, era na vakavulici ira ena duidui ni ka e sega ni savasava kei na ka e savasava.+
24 Era na vakataulewa ena kisi ni veilewai,+ mera vakataulewa me vaka na noqu lewa.+ Mera muria na noqu lawa kei na noqu lewa me baleta na noqu soqo kece,+ mera vakatabuya tale ga na noqu siga ni vakacecegu.
25 Mera kua ni torova e dua na tamata mate nira na dukadukali kina. Ia e rawa nira dukadukali ena vuku i tamadra, tinadra, luvedra tagane, luvedra yalewa, se ganedra dawai.+
26 Ni vakasavasavataki oti na bete, me wawa me vitu na siga qai veiqaravi tale.
27 Ena siga e curu kina ina tikina tabu, oya ena raranivale e loma, me veiqaravi ena tikina tabu, me cabora na nona isoro ni ivalavala ca,’+ e kaya na Turaga Cecere Duadua o Jiova.
28 “‘Qo na nodra ivotavota: O yau na nodra ivotavota.+ Moni kua ni solia vei ira e dua na ivotavota e Isireli niu nodra ivotavota.
29 Era na kania na isoro kakana,+ na isoro ni ivalavala ca, kei na isoro ni cakacala,+ ena nodra tale ga na ka kece e vakatabui e Isireli.+
30 Ena nodra na bete na isevu vinaka kece ni vuata dreu kei na nomuni cau kece.+ Moni solia na isevu ni falawa matailelevu vei ira na bete.+ Qo ena vakalougatataki kina na nomuni vuvale.+
31 Mera kua ni kania na bete na manumanuvuka se na manumanu e kunei ni sa mate tu se basubasuraki.’+
iVakamacala e ra
^ Ipe., “tugana e lomamu.”
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
^ Se “na rumu tabu.”
