Isikeli 46:1-24
46 “Qo na ka e kaya na Turaga Cecere Duadua o Jiova: ‘Me sogo tu ga+ ena ono na siga ni cakacaka+ na matamata ni raranivale e loma donuya na tokalau,+ me qai dola ena Siga ni Vakacecegu kei na siga ni vula vou.
2 Ena curu i loma na turaga ni muria na varada ni matamata,+ ena duri volekata na duru ni matamata. Era na cabora na bete na nona isoro kama taucoko kei na nona isoro ni veiyaloni, ena cuva ena ilago ni matamata qai curu i tuba. Me kua ni sogo na matamata me yacova na yakavi.
3 Era na cuva tale ga na lewenivanua ena mata i Jiova ena katuba ni matamata qori ena Siga ni Vakacecegu kei na vula vou kece.+
4 “‘Na isoro kama taucoko ena cabora na turaga vei Jiova ena Siga ni Vakacecegu me ono na lami tagane yagovinaka kei na dua na tamanisipi yagovinaka.+
5 Na isoro kakana me dua na efa* na covuata me cabori vata kei na tamanisipi, na levu ni covuata e rawa ni solia me cabori vata kei na lami tagane, e dua tale ga na hini* waiwai ni cabori vata kei na dua na efa covuata.+
6 Ena siga ni vula vou me cabori e dua na luvenibulumakau tagane yagovinaka ena qelenibulumakau, e ono na lami tagane, kei na dua na tamanisipi, me yagovinaka kece.+
7 Me cabora o koya na isoro kakana e dua na efa na covuata kei na luvenibulumakau tagane, e dua na efa covuata kei na tamanisipi, kei na levu ni covuata e rawa ni solia kei na lami tagane. Me cabora tale ga o koya e dua na hini waiwai kei na dua na efa covuata.
8 “‘Ni curu i loma na turaga me muria na varada ni matamata, me curu tale ga i tuba ena vanua qori.+
9 Nira lako yani na lewenivanua mera tu ena mata i Jiova ena gauna ni soqo,+ o ira na curu yani ena matamata ena vualiku+ mera sokalou mera curu i tuba ena matamata ena ceva,+ o ira na curu yani ena matamata ena ceva mera curu i tuba ena matamata ena vualiku. Me kua ni dua e lesu ena vanua e curu yani kina, mera curu i tuba ena matamata e donui ira.
10 Na turaga e maliwai ira tiko me curu i loma nira curu i loma, me curu tale ga i tuba nira curu i tuba.
11 Ena gauna ni soqo kei na soqo tabu, na isoro kakana me dua na efa na covuata me cabori vata kei na luvenibulumakau tagane, e dua na efa na covuata me cabori vata kei na tamanisipi, kei na levu ni covuata e rawa ni solia me cabori vata kei na lami, me dua tale ga na hini waiwai kei na dua na efa covuata.+
12 “‘Ke vakarautaka na turaga e dua na isoro kama taucoko+ se isoro ni veiyaloni me cautaka vei Jiova, ena dola vua na matamata ena tokalau, ena vakarautaka na nona isoro kama taucoko kei na nona isoro ni veiyaloni me vaka e dau cakava ena Siga ni Vakacecegu.+ Ni curu i tuba o koya, me sogo na matamata.+
13 “‘Mo vakarautaka e veisiga e dua na lami tagane yagovinaka e yabaki dua me isoro kama taucoko vei Jiova.+ Mo cakava qo ena veimataka.
14 Mo vakarautaka tale ga ena veimataka e dua na ikaono ni efa me isoro kakana kei na dua na ikatolu na hini na waiwai me kureitaki ena falawa vinaka sara me isoro kakana e veisiga vei Jiova. Qo e dua na lawa tudei.
15 Mera vakarautaka e veimataka e dua na lami tagane, na isoro kakana, kei na waiwai me isoro kama taucoko e cabori wasoma.’
16 “Qo na ka e kaya na Turaga Cecere Duadua o Jiova: ‘Ke soli iloloma na turaga vei ratou kece na luvena tagane me nodratou ivotavota, eratou na taukena na luvena. E nodratou ni votai vei ratou.
17 Ia ke solia vakailoloma e dua na tiki ni nona ivotavota vua e dua na nona dauveiqaravi, ena taukena tiko me yacova na yabaki ni veisereki,+ oti ena suka vua na turaga. Na nodratou ivotavota na luvena ena nodratou vakadua.
18 Me kua ni taura na turaga na nodra ivotavota na lewenivanua ni vakasavi ira mai na nodra qele. Me solia vei ratou na luvena na nodratou ivotavota mai na nona qele, me kua ni dua na noqu tamata me vakasavi mai na nona qele.’”
19 E qai kauti au i loma ni keirau curu ena katuba+ e volekata na matamata e gole ina nodra rumunikana tabu* na bete donuya na vualiku,+ au raica e dua na vanua e dakuna donuya na ra.
20 E kaya vei au o koya: “Qo na vanua era na saqara kina na bete na isoro ni cakacala kei na isoro ni ivalavala ca, era na vavia tale ga e kea na isoro kakana+ mera kua kina ni kauta ina raranivale e tuba e dua na ka me vakadewa na savasava vei ira na lewenivanua.”+
21 E kauti au yani ena raranivale e tuba meu sivita na va na duru ena tutu ni raranivale, au mani raica ni tiko na raranivale volekata na tutu vava ni raranivale e tuba.
22 E tiko ena duru vava ni raranivale na rara lalai e 40 na kiupiti* na kena balavu, e 30 na kiupiti na kena raba. E tautauvata kece na kedratou ivakarau vava.*
23 E vakavata* wavoki kece, e tara ena ruku ni vata na vanua me saqa kina na isoro.
24 E qai kaya vei au o koya: “Qo na vale era saqara kina o ira na veiqaravi ena valenisoro na nodra isoro na lewenivanua.”+
iVakamacala e ra
^ Se “rumu tabu.”
^ Se “tautauvata kece na kedratou ivakarau vava kei na vale e tiko e tutuna.”
^ Se “vakaiyatu.”
