Isikeli 5:1-17
5 “O iko na luve ni tamata, taura e dua na iseleiwau gata mo vakayagataka me vaka na batinitoro ni dauveikoti. Tasia na ulumu kei na kumimu, kauta mai na ivakarau ni bibi mo vakarautaka kina, qai wasea na drauniulumu.
2 O na vakama e dua na ikatolu ni kena iwase ena lomanikoro ni sa cava na siga ni viribai.+ Mo taura e dua tale na ikatolu ni kena iwase, mo tatalaka ena iseleiwau ena yasa taucoko ni koro,+ na iotioti ni dua na ikatolu ni kena iwase o na ceburaka ina cagi, au na qai ucuna e dua na iseleiwau meu cicimuri ira.+
3 “Mo taura tale ga e vica na drauniulu, mo ologa ena ilobi ni nomu isulu.
4 Mo taura eso tale mo kolotaka ina loma ni bukawaqa me kama. Ena tete yani na yameyame qo ina vuvale taucoko ni Isireli.+
5 “Qo na ka e kaya na Turaga Cecere Duadua o Jiova: ‘Qo o Jerusalemi. Au sa biuti koya ena kedra maliwa na veimatanitu, era wavokiti koya na veivanua.
6 Ia e beca na noqu lewa kei na noqu lawa, e torosobu na nona ivalavala ni vakatauvatani kei na veimatanitu kei na veivanua volekata.+ Nira cata na noqu lewa, era sega ni muria na noqu lawa.’
7 “Qo na ka e kaya na Turaga Cecere Duadua o Jiova: ‘Ni oni veivakacudrui vakalevu ni vakatauvatani kei na veimatanitu era wavokiti kemuni, oni sega ni muria na noqu lawa, oni sega ni cakava na noqu lewa, ia oni muria na nodra lewa na veimatanitu era wavokiti kemuni,+
8 qo na ka e kaya na Turaga Cecere Duadua o Jiova: “Au na valuta na koro,+ io au na totogitaki iko e matadra na veimatanitu.+
9 Au na vakayacora vei iko na ka au se sega ni cakava, au na sega tale ni vakayacora vaka kina ena vuku ni nomuni itovo sevaki kece.+
10 “‘“Ia era na kania na luvedra na tama+ era tiko vei iko, o ira na gone era na kania na tamadra, au na totogitaki kemuni, au na vakasavi ira tale ga na vo vei kemuni ina veiyasana kece.”’+
11 “‘O koya gona niu bula tiko,’ e kaya na Turaga Cecere Duadua o Jiova, ‘ni oni vakadukadukalitaka na noqu tikina tabu ena nomuni matakau vakasisila kece kei na nomuni itovo sevaki kece,+ au na vakanadakui kemuni tale ga, ena sega ni vosoti kemuni na mataqu, au na sega ni nanumi kemuni.+
12 Ena mate e dua na ikatolu vei kemuni ena matedewa, se mate ena leqa ni kakana ena kemuni maliwa. E dua tale na kena ikatolu ena bale wavokiti iko ena iseleiwau.+ Au na vakasava na iotioti ni ikatolu ina veiyasana kece,* au na ucuna e dua iseleiwau meu cicimuri ira.+
13 Ena oti noqu cudru, ena ruru noqu cudruvi ira, au na qai cegu.+ Niu cudruvi ira oti, era na qai kila ni o yau o Jiova au vosa vei ira niu vinakata meu qaravi duadua ga.+
14 “‘Au na vakarusai iko, era na vakalialiai iko na veimatanitu era tiko volekati iko e matadra kece na tavali.+
15 O na vakalialiai, o na beci,+ mo ivakaraitaki mera rere kina na veimatanitu era wavokiti iko niu totogitaki iko ena cudru, ena cudru waqawaqa, kei na itotogi warumisa. O yau o Jiova au tukuna.
16 “‘Au na tala vei kemuni na gasau dau veivakamatei ni leqa ni kakana me vakarusai kemuni. Ena vakarusai kemuni na gasau au tala yani.+ Au na vakavuna me ca sara na leqa ni kakana vei kemuni niu tarova na kemuni kakana.*+
17 Au na tala vei kemuni na leqa ni kakana kei na manumanu kila+ dau kata me kaliraka na luvemuni. Ena vakaleqai kemuni na matedewa kei na vakadavedra, au na kauta yani vei kemuni na iseleiwau.+ O yau o Jiova au tukuna.’”
iVakamacala e ra
^ Ipe., “matanicagi kece.”
^ Ipe., “musuka na kau ni madrai.” Rairai dusia na kau dau maroroi kina na madrai.
