Isikeli 8:1-18
8 Ena ikaono ni yabaki, ena ikaono ni vula ena ikalima ni siga ni vula niu dabe tiko ena noqu vale, era dabe tale tiko ga e mataqu na qase ni Juta, e mai tu vei au e kea na liga ni Turaga Cecere Duadua o Jiova.
2 Niu vakararai tiko au raica sara e dua na ka e vaka na irairai ni bukawaqa. Na irairai ni tolona lako sobu e bukawaqa,+ e ramase na tolona lako cake me vaka na taliva ni koula e waki vata kei na siliva.+
3 E qai dodoka mai o koya e dua na ka e vaka na irairai ni liga, e taura vata eso na drauniuluqu, e laveti au e dua na yalo ena maliwa ni vuravura kei na lomalagi, e kauti au sara i Jerusalemi ena raivotu ni Kalou, ina katuba ena matamata e loma+ donuya na vualiku, e duri tu kina na ivakatakarakara ni vuvu e dau qaravi, e uqeta na vuvu.+
4 Ia raica! E tu e kea na lagilagi ni Kalou ni Isireli,+ e vaka na ka au raica ena vanua bucabuca.+
5 E qai kaya vei au: “O iko na luve ni tamata, yalovinaka mo rai mada ina vualiku.” Au mani rai ina vualiku, au raica sara ni tiko na ivakatakarakara qo ni vuvu ena katuba ni matamata ni icabocabonisoro ena vualiku.
6 E kaya vei au: “O iko na luve ni tamata, o sa raica na torosobu, na sevaki ni ka era vakayacora tiko eke+ na vuvale ni Isireli meu yawaka kina na noqu tikina tabu?+ O na raica e levu tale na ka vakasevaki e torosobu sara.”
7 E qai kauti au o koya ina matamata ni raranivale, au mani raica e dua na qara e lalaga.
8 E kaya vei au: “O iko na luve ni tamata, yalovinaka mo qiva na lalaga.” Au mani qiva na lalaga, au raica sara e dua na katuba.
9 E kaya vei au o koya: “Mo curu i loma mo raica na ka ca, na ka vakasevaki era vakayacora tiko eke.”
10 Au mani curu au vakararai, au raica sara ni ceuti tu ena lalaga taucoko na veimataqali ivakatakarakara ni manumanu qasi kece kei na manumanu vakasisila,+ kei na nodra matakau vakasisila* kece na vuvale ni Isireli.+
11 Era duri tu e matadra e 70 na qase ni vuvale ni Isireli, e duri maliwai ira tale tu ga o Jesanaia na luvei Safani.+ Era yadua na itawatawa ni ka boivinaka e ligadra qai kuvu cake tiko na kubou ni ka boivinaka sara.+
12 E kaya vei au o koya: “O iko na luve ni tamata, o sa raica na ka era cakava tiko ena buto na qase ni vuvale ni Isireli ena nodra dui rumu i loma e tuva tu kina na nodra matakau? Era kaya tiko, ‘E sega ni raici keda o Jiova. Sa biuta na vanua o Jiova.’”+
13 E kaya tale vei au: “O na raica e levu tale na ka vakasevaki e torosobu sara era vakayacora tiko.”
14 E kauti au sara ina katuba ena matamata ni vale i Jiova e tiko ena vualiku, au raica nira dabe tiko e kea na yalewa, era tagicaka tiko na kalou o Tamusi.
15 E kaya tale vei au: “O sa raica qo, o iko na luve ni tamata? O na raica na ka e vakasevaki mai na kena qo.”+
16 E mani kauti au ina raranivale e loma ni vale i Jiova.+ Era tiko ena katuba ni valenisoro i Jiova, ena maliwa ni varada kei na icabocabonisoro, e rauta ni 25 na tagane era vakanadakuya tu na valenisoro i Jiova ra qai vakanamata ina tokalau, era cuva tiko ena matanisiga ena tokalau.+
17 E kaya vei au o koya: “O sa raica qo, o iko na luve ni tamata? Vakacava, e ka wale mera vakayacora na vuvale ni Juta na ivalavala sevaki qo, mera vakasinaita na vanua ena ivalavala kaukaua+ mera vakacudrui au tiko ga? Era dodoka tiko eke na tabanikau* e ucuqu.
18 O koya gona au na cudruvi ira vakalevu. Ena sega ni lomani ira na mataqu, au na sega ni nanumi ira.+ Era na tagi mai vei au ena domolevu, ia au na sega ni rogoci ira.”+
iVakamacala e ra
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
^ Qo beka na tabanikau e vakayagataki ena qaravi matakau.
