Jeremaia 42:1-22
42 Era toro yani na iliuliu kece ni mataivalu, kei Joenani+ na luvei Karea, o Jisanaia na luvei Osaia, kei ira kece na tamata, o ira na tamata wale kei ira na turaga,
2 era kaya vei Jeremaia na parofita: “Yalovinaka, mo rogoca mada na neimami kerekere, mo masulaki keimami vei Jiova na nomu Kalou ena vuku i keimami kece na vo tu qo, ni keimami le vica ga keimami sega ni lewe levu+ me vaka o raica.
3 Me tukuna mada ga vei keimami o Jiova na nomu Kalou na sala me keimami lakova kei na ka me keimami cakava.”
4 E kaya vei ira o Jeremaia na parofita. “Au sa rogoci kemuni, au na masuti Jiova na nomuni Kalou me vaka oni kerea, au na tukuna vei kemuni na vosa kece e tukuna mai vei kemuni o Jiova. Au na sega ni vunia vei kemuni e dua na vosa.”
5 Era kaya vei Jeremaia: “O Jiova ga me neimami ivakadinadina daudina qai yalodina ke keimami sega ni vakayacora na ka kece e tukuna vei iko o Jiova na nomu Kalou me baleti keimami.
6 E vinaka se ca, keimami na muria na vosa i Jiova na noda Kalou keimami talai iko vua me keimami vinaka kina, ni keimami muria na vosa i Jiova na noda Kalou.”
7 Oti e tini na siga e qai vosa vei Jeremaia o Jiova.
8 E mani kacivi Joenani na luvei Karea, o ira kece na iliuliu ni mataivalu era tomani koya, kei ira kece na tamata, o ira na tamata wale kei ira na turaga.+
9 E kaya vei ira o koya: “Qo na ka e tukuna o Jiova na Kalou ni Isireli oni talai au vua, meu tauca vua na nomuni vakamamasu:
10 ‘Ke oni na tiko ga ena vanua qo, au na tarai kemuni au na sega ni basuki kemuni, au na tei kemuni au na sega ni cavuraki kemuni, niu na rarawataka na ka ca au vakayacora vei kemuni.+
11 Moni kua ni rerevaka na tui Papiloni oni rerevaka tiko.’+
“‘Moni kua ni rerevaki koya,’ e kaya o Jiova, ‘niu tokoni kemuni meu vakabulai kemuni, meu taqomaki kemuni mai ligana.
12 Au na lomani kemuni,+ ena lomani kemuni tale ga o koya, ena vakasukai kemuni ina nomuni vanua.
13 “‘Ia ke oni kaya, “Sega, keimami na sega ni tiko ena vanua qo!” moni beca na vosa i Jiova na nomuni Kalou,
14 oni kaya, “Sega, keimami na lako ina vanua o Ijipita,+ keimami na sega ni raica kina na ivalu, se rogoca na domo ni davui,* se mate ena viakana madrai, oya ga na vanua keimami na tiko kina,”
15 moni rogoca mada na vosa i Jiova, o kemuni na ivovo ni Juta. Qo na ka e kaya o Jiova ni lewe vuqa* na Kalou ni Isireli: “Ke oni nakita moni lako dina i Ijipita, moni lako i kea moni tiko* kina,
16 ena qai toboki kemuni ena vanua o Ijipita na iseleiwau oni rerevaka tiko, ena muri kemuni i Ijipita na viakana oni rerevaka tiko, oni na mate e kea.+
17 Ia o ira kece era nakita mera lako i Ijipita mera tiko kina era na mate ena iseleiwau, ena viakana, kei na matedewa. Ena sega ni dua e bula se drovaka na ca au na kauta yani vei ira.”’
18 “Ni qo na ka e kaya o Jiova ni lewe vuqa, na Kalou ni Isireli: ‘Me vaka ga niu sova na noqu cudru kei na noqu cudru levu vei ira na lewe i Jerusalemi,+ au na sova tale ga vei kemuni na noqu cudru levu ke oni lako i Ijipita, oni na vosavakacacataki, oni na domobulataki, oni na cudruvi, oni na beci,+ oni na sega ni raica tale na vanua qo.’
19 “Sa tukuna oti vei kemuni na ivovo ni Juta o Jiova. Moni kua ni lako i Ijipita. Moni kila vinaka tiko niu sa vakasalataki kemuni nikua
20 ni oni na mate ena nomuni cala. Oni talai au vei Jiova na nomuni Kalou, oni kaya, ‘Mo masulaki keimami vei Jiova na noda Kalou, mo tukuna vei keimami na ka ka kece e kaya na noda Kalou o Jiova, keimami na vakayacora.’+
21 Au sa tukuna vei kemuni nikua, ia oni na sega ni muria na vosa i Jiova na nomuni Kalou se vakayacora na ka e talai au mai kina vei kemuni.+
22 O koya gona, moni kila vinaka tiko ni oni na mate ena iseleiwau, ena viakana, kei na matedewa ena vanua oni vinakata moni lai tiko kina.”+
