Joeli 1:1-20
1 Na vosa e tukuna o Jiova vei Joeli* na luvei Pecueli:
2 “Ni rogoca qo o kemuni na qase,Ni vakatudaliga o kemuni kece na lewenivanua.*
Sa bau yaco e dua na ka va qo ena nomuni gauna,Se na nodra gauna na tukamuni?+
3 Ni tukuna vei ira na luvemuni,O ira na luvemuni mera tukuna vei ira na luvedra,O ira na luvedra mera tukuna vei ira na itabatamata tarava.
4 Na ka e vakavoca na vodre dauvakacaca e kania na yavusa vodre,+Na ka e vakavoca na yavusa vodre e kania na vodre sega ni vakatabana,Na ka e vakavoca na vodre sega ni vakatabana e kania na vodre daukana.+
5 Ni yadra na daumateni,+ moni tagi!
Ni tagilagalaga na daugunu waini,Ni sa kau tani mai gusumuni na waini kamica.+
6 Ni sa lako cake ina noqu vanua e dua na matanitu, e qaqa qai sega ni wili rawa.+
Na batina e bati ni laione,+ na galegalena e galegale ni laione.
7 E vakarusa na noqu vaini qai vukica na noqu vunilolo me dulumi,*E cecega taucoko na kulina qai kolotaka laivi,Me vulavula na tabana.
8 Mo tagilagalaga me vaka na goneyalewa e vakaisulutagaEna vuku i tagane ena qai watina ni se goneyalewa.
9 “Sa yali mai na vale i Jiova na isoro kakana+ kei na isoro livi,+Era lolosi tiko na bete, o ira na dauveiqaravi nei Jiova.
10 Sa vakacacani na were, sa lolosi na qele,+Ni sa vakacacani na covuata, sa maca na waini vou, sa oti na waiwai.+
11 Era yalolailai na dauteitei, era tagilagalaga na dausamaki vaini,Ena vuku ni witi kei na varile,*Ni sa rusa na ka me tamusuki.
12 Sa malai na vaini,Sa malai na vunilolo.
Na pomekaraneti,* na niuniu, na yapolo,Na kau kece ni vanua sa malai,+Sa vuki na nodra marau na tamata me madua.
13 Ni vakaisulutaga na bete, moni lolosi,*Ni tagilagalaga na dau qarava na icabocabonisoro.+
Ni lako mai, moni vakaisulutaga ena bogi taucoko na dauveiqaravi ni noqu Kalou,Ni sa bureitaki na isoro kakana+ kei na isoro livi+ ena vale ni Kalou.
14 Moni kacivaka na lolo, ni tuvanaka e dua na soqo bibi.+
Ni soqoni ira mai na qase kei ira na lewenivanua,Ina vale i Jiova na nomuni Kalou,+ moni kere veivuke vei Jiova.
15 “Oilei na siga oya!
Sa voleka na siga i Jiova,+Ena yaco mai me vaka ni veivakarusai o koya e Kaukaua Duadua!
16 Vakaevei, sa kau tani na kakana mai matada,Na marau kei na reki mai na vale ni Kalou?
17 Sa vuca na sorenikau* ena ruku ni nodra isivi.
Sa lala na valenimaroroi iyau.
Sa kasura na lololo ni sa malai na covuata.
18 Era vutugu mada ga na manumanu!
Era veilecayaki na qelenibulumakau, ni sa sega na kedra co drokadroka!
Sa tau na itotogi vei ira na qelenisipi.
19 Au na masuti kemuni Jiova,+Ni sa yameca na bukawaqa na veico ni vanua talasiga,Sa yameca na yameyame na kau kece ni vanua.
20 Era tagici kemuni mada ga na manumanu ni vanua,Ni sa maca na uciwai lalai,Sa yameca na bukawaqa na veico ni vanua talasiga.”
iVakamacala e ra
^ Kena ibalebale “E Kalou o Jiova.”
^ Se “na lewe i vuravura.”
^ Qo na vunikau musu na tolona qai vo toka ga na vuna.
^ Dua na kau e vaka na witi.
^ Qo e dua na vuanikau damudamu buto na rokana, e vaka na irairai ni yapolo.
^ Se “tavimabu.”
^ Se rawa ni, “na lolo mamaca.”
