Jona 3:1-10
3 E vosa o Jiova vei Jona ena ikarua ni gauna, e kaya:+
2 “Tucake, mo lako i Ninive+ na koro vakaitamera, mo vakarogoya vua na itukutuku au tukuna vei iko.”
3 E tucake sara o Jona me lako i Ninive+ ni talairawarawa ina vosa i Jiova.+ Ia e koro levu sara* o Ninive, e taubaletaki me tolu na siga.
4 E qai curu e lomanikoro o Jona, e taubale tiko me dua na siga, e vakarogoya tiko: “Sa vo ga e 40 na siga me vakarusai o Ninive.”
5 Era mani vakabauta na Kalou na lewe i Ninive,+ era kacivaka mera lolo mera vakaisulutaga, o ira na tamata wale kei ira na turaga.
6 Ni rogoca na itukutuku qo na tui Ninive, e duri sara mai na nona idabedabe vakatui, e luvata na nona isulu vakatui, e vakaisulutaga qai dabe ena dravusa.
7 E vakarota tale ga o koya me kacivaki e Ninive taucoko,
“Ena lewa ni tui kei ira na nona turaga: Me kua ni dua na tamata se manumanu, na qelenibulumakau se qelenisipi me kania e dua na ka. Mera kua ni kana se gunu wai.
8 Mera vakaisulutaga na tamata kei na manumanu, mera gumatua ni masuta na Kalou, mera vakanadakuya na nodra ivakarau ca kei na nodra ivalavala kaukaua.
9 O cei e kila de vakasamataka tale* na Kalou dina na ka e nakita me vakayacora, me kua ni waqa na nona cudru meda kua kina ni rusa?”
10 Ni raica na Kalou dina na ka era cakava, nira vakanadakuya na nodra ivakarau ca,+ e vakasamataka tale* o koya na ca e tukuna me cakava vei ira, qai sega ni cakava.+
