Vola o Joni 13:1-38
13 E dau lomani ratou nona imuri e vuravura o Jisu. Ena nona kila ni bera na soqo ni Lakosivia ni sa voleka nona gauna+ me biuta kina na vuravura qo me lako vei Tamana,+ sa qai lomani ratou ga me yacova sara na iotioti.+
2 Ni ratou vakayakavi tiko, e sa bucina oti na Tevoro e loma i Jutasa Isikarioti,+ na luvei Saimoni, me soli Jisu yani.+
3 Ni kila o Jisu ni sa solia o Tamana na ka kece ina ligana, ni a lako mai vua na Kalou ena lako tale vua na Kalou,+
4 e tucake mai na vakayakavi qai luvata nona isulu e sau. E qai taura e dua na tauwelu, e vesuka sara e tolona.+
5 Oti ya e livia na wai ena beseni, e vuya sara na yavadratou na tisaipeli qai qusia ena tauwelu e vesu toka e tolona.
6 Ni yaco yani vei Saimoni Pita, e kaya vua: “Turaga, oni na vuya na yavaqu?”
7 E sauma vua o Jisu: “O na sega ni kila ena gauna qo na ka au cakava tiko, ia o na qai kila e muri.”
8 E kaya vua o Pita: “Oni na sega sara ni vuya na yavaqu.” E sauma o Jisu: “Keu sega ni vuya na yavamu,+ o na sega ni noqu itokani.”
9 E tukuna vua o Saimoni Pita: “Turaga, ni kua ni vuya ga na yavaqu, na ligaqu tale ga kei na uluqu.”
10 E kaya vua o Jisu: “O koya e sili oti sa savasava, e sega tale ni yaga me savui na yagona taucoko, na yavana ga. Dou sa savasava o kemudou, ia sega ni o kemudou kece.”
11 E kila vinaka o Jisu na tagane ena soli koya yani.+ Ya na vuna e kaya kina: “Dou sega ni savasava kece.”
12 Ni sa vuya oti na yavadratou, e dara tale nona isulu e sau, lai dabe sara ena teveli qai tarogi ratou: “Dou kila na ka au cakava vei kemudou?
13 Dou kaya niu ‘Qasenivuli,’ niu ‘Turaga,’ e donu vinaka qori, niu Qasenivuli, au Turaga tale ga.+
14 Keu vuya gona na yavamudou niu Turaga qai Qasenivuli,+ e dodonu* mo dou veivuiyava tale ga.+
15 Na ka au cakava qo e ivakaraitaki vei kemudou, mo dou cakava tale ga na ka au cakava vei kemudou.+
16 Au tukuna vakadodonu sara vei kemudou, na bobula e sega ni uasivia nona turaga, o koya tale ga e talai e sega ni uasivi koya e veitalai.
17 Ke dou kila na ka kece qo, dou na qai marau ke dou cakava.+
18 Au sega ni tukuni kemudou kece tiko, au kilai ira au digitaka. Ia e caka qo me vakayacori kina na tikinivolatabu:+ ‘O koya e kania tiko na kequ madrai sa laveta na bukubukuniyavana me saqati au.’*+
19 Au sa tukuna rawa qo vei kemudou ni bera ni yaco. Na gauna me qai yaco kina, dou vakabauta ni o yau ga o koya.+
20 Au tukuna vakadodonu sara vei kemudou, o koya e ciqoma e dua vei ira au tala yani e ciqomi au tale ga.+ O koya e ciqomi au, e ciqomi koya tale ga e talai au mai.”+
21 Ni cavuta oti na vosa ya o Jisu, e vusolo na lomana, e kaya: “Au tukuna vakadodonu sara vei kemudou, e dua vei kemudou ena soli au yani.”+
22 Eratou veiraici na tisaipeli ni ratou sega ni kila se tukuni cei tiko.+
23 E dabe tiko e yasa i* Jisu e dua na nona tisaipeli e dau lomana.+
24 E mani deguvacu yani vei koya o Saimoni Pita qai kaya: “Tukuna mada mai se tukuni cei tiko o koya.”
25 E ravi yani vei Jisu na tisaipeli ya qai tarogi koya: “Turaga, o cei?”+
26 E sauma o Jisu: “O koya ga au na solia vua na tiki ni madrai au tonia.”+ Ni tonia oti na tiki ni madrai, e solia sara vei Jutasa na luvei Saimoni Isikarioti.
27 Ni taura o Jutasa na tiki ni madrai, e qai uqeta na lomana o Setani.+ Mani kaya vua o Jisu: “Vakatotolotaka na ka o cakava tiko.”
28 Ia e sega ni dua vei ratou na kana tiko e kila na ibalebale ni ka e tukuna ya.
29 Me vaka ni taura tiko o Jutasa na kato ni ilavo,+ eratou nanuma kina eso na tisaipeli ni tukuna tiko vua o Jisu: “Volia mai na ka e yaga vei kedatou ena soqo,” se me solia eso na ka vei ira na dravudravua.
30 Ni taura oti ga na tiki ni madrai, e curu sara i tuba. Sa buto tu na vanua.+
31 Ni sa curu i tuba, e qai kaya o Jisu: “Sa qai vakalagilagi qo na Luve ni tamata,+ e vakalagilagi tale ga kina na Kalou.
32 Na Kalou vakataki koya ena vakalagilagi Jisu,+ ena vakalagilagi koya sara ga.
33 Kemudou na gone lomani, ena lekaleka ga noqu tiko vata kei kemudou. Dou na vakasaqarai au, ia me vaka au tukuna vei ira na Jiu, ‘Na vanua au lako kina dou na sega ni lako rawa kina,’+ au sa tukuna tale qo vei kemudou.
34 Au solia vei kemudou e dua na ivunau vou, mo dou veilomani, mo dou veilomani+ me vaka ga na noqu lomani kemudou.+
35 Na ka qo era na kila kece kina ni dou noqu tisaipeli, ke dou veilomani.”+
36 E kaya vua o Saimoni Pita: “Turaga, oni lako i vei?” E sauma o Jisu: “O na sega ni muri au rawa qo ena vanua au lako kina, ia o na qai muri malua yani.”+
37 E kaya vua o Pita: “Turaga, na cava au sega ni muri kemuni rawa kina qo? Au na solia noqu bula ena vukumuni.”+
38 E sauma o Jisu: “O na solia nomu bula ena vukuqu? Au tukuna vakadodonu sara vei iko, ni se bera mada ni tagi na toa o sa na cakitaki au vakatolu.”+
