Vola o Joni 18:1-40
18 Ni tukuna oti o Jisu na ka kece qo, sa qai lako vata kei ratou na nona tisaipeli ina+ dua na iteitei e tiko ena Buca o Kitironi.+
2 E kila tale ga na vanua qo o Jutasa, o koya ena soli Jisu yani, ni dau lai sota kina o Jisu kei ratou nona tisaipeli.
3 Mani yaco yani i kea o Jutasa ni kauti ira yani na sotia kei na nodra yadra na iliuliu ni bete kei na Farisi. Era tauri bukawaqa, cina, kei na iyaragi.+
4 Ni kila o Jisu na ka kece ena vakarau yaco vua, e lako yani qai tarogi ira: “Oni vaqarai cei?”
5 Era sauma vua: “O Jisu na kai Nasareci.”+ E kaya vei ira: “O yau ga qo.” E tucake tale tu ga e kea+ o koya ena soli Jisu yani, o Jutasa.
6 Ia ni kaya vei ira o Jisu: “O yau ga qo,” era suka i muri ra qai bale ina qele.+
7 Mani tarogi ira tale: “Oni vaqarai cei?” Era kaya: “O Jisu na kai Nasareci.”
8 E sauma o Jisu: “Au sa tukuna oti vei kemuni, o yau ga qo. Ke oni vaqarai au tiko, ni laivi ratou qo me ratou lako.”
9 Qo me vakayacori kina na vosa a cavuta: “Au sega ni vakayalia e dua oni solia vei au.”+
10 E tiko vei Saimoni Pita e dua na iseleiwau, e ucuna qai taya laivi na daligana imatau+ na nona dauveiqaravi na bete levu. Na yaca ni dauveiqaravi ya o Maliko.
11 E qai kaya vei Pita o Jisu: “Daramaka na iseleiwau ina kena taga.+ Vakacava, sega ni dodonu meu gunuva na bilo e solia vei au o Tamaqu?”+
12 Era sa qai vesuki Jisu na sotia, na komada ni mataivalu, kei na nodra yadra na Jiu.
13 Era kauti koya e liu vei Anasa na vugoi Kaiafa.+ A bete levu ena yabaki ya o Kaiafa.+
14 O Kaiafa ga qo a vakasalataki ira na Jiu ni yaga vei ira me mate e dua na tamata ena vukudra na lewenivanua.+
15 E muri Jisu+ tiko yani o Saimoni Pita kei na dua tale na tisaipeli. E kilai koya vinaka na tisaipeli ya na bete levu, erau mani curu vata kei Jisu ina raranivale ni bete levu.
16 Ia e duri tu ena matanikatuba mai tuba o Pita. E lako na tisaipeli erau veikilai kei na bete levu qai lai vosa vua na ivakatawa ni katuba me kauti Pita mai loma.
17 Mani kaya vei Pita na yalewa dauveiqaravi e vakatawa tiko na katuba: “O iko tale ga na tisaipeli ni tamata qo, se cava?” E sauma o Pita: “Sega.”+
18 Era duri wavokita tu na dauveiqaravi kei na yadra na qilaiso waqa mera vakatakata kina ena levu ni liliwa. E duri vata tale tu ga kei ira o Pita me vakatakata kina.
19 Mani vakatarogi Jisu na iliuliu ni bete ena ka e baleti ratou na nona tisaipeli kei na nona ivakavuvuli.
20 E sauma vua o Jisu: “Au dau tukuna na ka kece ga e matanalevu. Au dau veivakavulici ena valenilotu kei na valenisoro,+ na Jiu kece ga era dau lako yani kina, au sega ni cavuta vakavuni e dua na ka.
21 Na cava o tarogi au kina? Tarogi ira ga era dau rogoca na noqu vosa. Raica! Era kila vinaka na ka au dau tukuna.”
22 Ni cavuta oti na vosa ya, e qai sabaka na mata+ i Jisu e dua na yadra e tucake voleka tu e kea, e kaya: “E dodonu mo vosa tu va ya vua na iliuliu ni bete?”
23 E sauma vua o Jisu: “Ke cala na ka au tukuna, tukuna mai na ka e cala, ia keu tukuna tiko na ka dina, na cava o sabaki au kina?”
24 Oti ya, ni se vesu tu ga o Jisu, e qai vakatalai koya o Anasa vei Kaiafa na bete levu.+
25 E duri tu e kea o Saimoni Pita me vakatakata. Era qai kaya vua: “E kena irairai ni o nona tisaipeli tale ga o iko!” E cakitaka qai kaya: “Sega.”+
26 E kaya e dua na dauveiqaravi ni bete levu, na wekai koya e taya laivi+ o Pita na daligana: “Au raici iko sara ga mai na iteitei seu lasu?”
27 Ia se baci cakitaka o Pita, e tagi sara na toa.+
28 Mai vei Kaiafa era kauti Jisu sara ena itikotiko ni kovana.+ Qo ena matakacaca. Ia era sega ni curu ina itikotiko ni kovana, mera kua ni dukadukali+ kina nira vinakata mera kania na Lakosivia.
29 Mani lako i tuba o Pailato qai tarogi ira: “Cava nona cala na tamata qo?”
30 Era sauma vua: “Ke sega ni dua na nona cala* keimami na sega ni kauti koya mai vei kemuni.”
31 E qai kaya vei ira o Pailato: “Ni kauti koya sara ni lai lewai koya ena nomuni lawa.”+ Era kaya vua na Jiu: “E sega vei keimami na kaukaua vakalawa me keimami vakamatea e dua.”+
32 Qo me vakayacori kina na ka e tukuna o Jisu me baleta na sala ena vakarau mate kina.+
33 E curu tale ina itikotiko ni kovana o Pailato, e kacivi Jisu qai taroga: “O iko na nodra Tui na Jiu?”+
34 E sauma o Jisu: “Qori na ka o nanuma me baleti au, se na ka era kaya vei iko eso?”
35 E sauma o Pailato: “O yau na Jiu? O ira sara ga na kainomu kei ira na iliuliu ni bete era soli iko vei au. Na cava o cakava?”
36 E sauma o Jisu:+ “E sega ni vakavuravura+ na noqu Matanitu. Ke vakavuravura na noqu Matanitu, era na vala na noqu tamata meu kua ni soli yani vei ira na Jiu.+ Ia e sega sara ga ni vu eke na noqu Matanitu.”
37 Mani kaya vua o Pailato: “Ia o iko na tui?” E sauma o Jisu: “O sa kaya tiko ga mai niu tui.+ Qo na vuna au sucu mai kina, qo tale ga na vuna au lako mai kina i vuravura meu tukuna na ka dina.+ O ira kece era totaka na dina era rogoca na noqu vosa.”
38 E tarogi koya o Pailato: “Na cava na ka dina?”
Ni cavuta oti ya, e lesu qai kaya vei ira na Jiu: “Sega ni dua na cala au raica vua.+
39 Kena ikuri, e kena ivakarau meu dau sereka vei kemuni e dua ena gauna ni Lakosivia.+ Na cava oni vinakata, meu sereka yani vei kemuni na nodra Tui na Jiu?”
40 Era qai kailavaka tale vua: “Sega ni o ka qori, o Parapa!” O Parapa qo na daubutako.+
iVakamacala e ra
^ Se “daubasulawa.”
