Vola o Joni 19:1-42
19 E qai kauti Jisu o Pailato, e lai kuitalaki koya.+
2 Era talia na sotia e dua na isala wavakavotona ra qai vakaisalataki koya kina, ra vakaisulutaki koya tale ga ena dua na isulu lokaloka,+
3 era qai lako tiko ga mai vua, era kaya: “Ni bula vinaka, nodra Tui na Jiu!” Era sabaka tale ga vakavica na matana.+
4 E lako tale i tuba o Pailato qai kaya vei ira: “Raica! Au kauti koya mai tuba moni kila kina niu sega ni raica vua e dua na cala.”+
5 Ni lako gona mai tuba o Jisu, sa dara tu na isala wavakavotona kei na isulu lokaloka. E qai kaya vei ira o Pailato: “Raica! Qo na tagane!”
6 Ia nira raici koya na iliuliu ni bete kei na yadra, era kailavaka yani: “Me lauvako ena kau! Me lauvako ena kau!”+ E kaya vei ira o Pailato: “Ni kauti koya sara ga, ni vakamatei koya niu sega ni raica vua e dua na cala.”+
7 Era sauma vua na Jiu: “E tiko na neimami lawa, e kaya ni dodonu me mate+ ni tukuni koya tiko me luve ni Kalou.”+
8 Ni rogoca o Pailato na ka era tukuna tiko, sa qai rere ga vakalevu,
9 e curu lesu ina itikotiko ni kovana qai kaya vei Jisu: “O iko mada mai vei?” E sega ni sauma o Jisu na nona taro.+
10 Mani kaya vua o Pailato: “O sega ni via vosa vei au? O sega ni kila ni tu vei au na lewa meu sereki iko, e tu tale ga vei au na lewa meu vakamatei iko?”
11 E kaya vua o Jisu: “O sega sara ga ni lewai au vakalailai, vakavo ke sa soli vei iko na lewa mai cake. Ya na vuna e levu cake kina na nona ivalavala ca o koya e soli au vei iko.”
12 Sa mani saga voli o Pailato e dua na sala me sereki koya kina. Ia era kailavaka yani na Jiu: “Ke oni sereka na tamata qo, oni sega ni totaki Sisa. O koya yadua e kaya ni tui, e saqati Sisa.”+
13 Ni rogoca na vosa ya o Pailato, e kauti Jisu i tuba, e dabe ena idabedabe ni veilewai ena vanua e vakatokai na Raravatu, ia na yacana vakaIperiu o Qabaca.
14 Qo na siga ni Vakavakarau+ ni Lakosivia, rauta na ikaono ni aua.* E qai kaya o Pailato vei ira na Jiu: “Raica na nomuni tui!”
15 Ia era kailavaka yani: “Kauti koya tani! Kauti koya tani! Me lauvako ena kau!” E kaya vei ira o Pailato: “Meu vakamatea na nomuni tui?” Era sauma na iliuliu ni bete: “E sega tale ni dua na neimami tui, o Sisa ga.”
16 E qai soli koya yani me vakamatei ena kau.+
Era mani tauri Jisu.
17 E cola duadua na nona kaunirarawa,* sa qai lako yani ina vanua e vakatokai ena vosa vakaIperiu+ o Kolikoca, kena ibalebale na Vanua ni Qavokavoka.+
18 Era vakoti koya e kea ena kau,+ erau vako tikivi koya tale ga e rua na tagane, erau yadua na yasana, ia e loma o Jisu.+
19 E vola o Pailato e dua na ivakatakilakila ena kaunirarawa. E volai tu kina: “Jisu na kai Nasareci na nodra Tui na Jiu.”+
20 E levu vei ira na Jiu era wilika na ivakatakilakila qo, ni volekata nodra koro na vanua e vako kina ena kau o Jisu qai volai ena vosa vakaIperiu, vosa vakaLatina, kei na vosa vaKirisi.
21 Ia era kaya vei Pailato na iliuliu ni bete: “Kua ni vola ‘Na nodra Tui na Jiu,’ vola ga ni kaya, ‘O yau na nodra Tui na Jiu.’”
22 E kaya o Pailato: “Na ka au sa vola, au sa vola.”
23 Ni ratou vakoti Jisu oti ena kau na sotia, eratou kauta nona isulu e sau eratou qai wasea vakava me ratou yadua na tikina, vaka kina na nona isulu e loma. Ia e sega ni sema na isulu e loma me vaka ni tali taucoko sara ga me tekivu mai cake me yaco sara i ra.
24 Eratou mani veikayaka: “Me datou kua ni dresuka, me datou vakawirimadigitaka ga me macala kina se o cei me nona.”+ Qo me vakayacori kina na ka e tukuni ena tikinivolatabu: “Era wasea na noqu isulu e sau, era vakawirimadigitaka tale ga na noqu isulu.”+ Era vakayacora dina na ka qo na sotia.
25 Ia eratou duri volekata tu na kaunirarawa* i Jisu o tinana+ kei na taci tinana o Meri na wati Kilopa kei Meri Makitala.+
26 Ni raica o Jisu ni rau duri veitikivi tu na tinana kei na nona tisaipeli lomani,+ e kaya vei tinana: “Yalewa, raica na Luvemu!”
27 E qai kaya vua na tisaipeli: “Raica na tinamu!” Gauna sara ga ya e kauti tinana kina i nona vale na tisaipeli.
28 Oti ya, ni kila o Jisu ni sa yaco na ka kece me vakayacori kina na ka e tukuni ena tikinivolatabu, e kaya: “Au sa karamaca.”+
29 E toka e kea e dua na saqa e sinai ena waini wiwi. Era mani tonia kina e dua na vutovuto* ra qai dodoka cake ina gusu i Jisu ena dua na taba ni isopi.*+
30 Ni tovolea o Jisu na waini wiwi, e qai kaya: “Sa vakacavari!”+ E vakacuva na uluna, mai cavuka yani na nona icegu.+
31 Me vaka ni siga tiko ni Vakavakarau,+ era kerei Pailato na Jiu me musu na yavadratou me rawa ni lai maroroi na yagodratou, me kua kina ni tu ga ena kaunirarawa+ ena Siga ni Vakacecegu, (e Siga ni Vakacecegu levu ya.)+
32 Era mani lako yani na sotia ra qai musuka na yava i koya na imatai ni tagane kei na yava i koya na ikarua ni tagane erau vako tikivi Jisu ena kau.
33 Nira lako yani vei Jisu, era raica ni sa mate tu, era mani sega ni musuka na yavana.
34 Ia e dua vei ira na sotia e qai suaka na sarisarina ena moto,+ mani drodro mai kina na dra kei na wai.
35 E mai tukutuku o koya e raica na ka qo, e dina na nona itukutuku. E kila o koya ni ka e tukuna e dina, moni vakabauta tale ga.+
36 E yaco na ka kece qo me dina kina na ka e tukuni ena tikinivolatabu: “Ena sega ni ramusu e dua na suina.”+
37 E dua tale na tikinivolatabu e kaya: “Era na rai vei koya era suaka.”+
38 Ni oti na ka kece qo e lai kerei Pailato o Josefa na kai Arimacea me kauta na yago i Jisu. O Josefa qo e tisaipeli tale ga i Jisu, ia ena nona rerevaki ira na Jiu+ e sega kina ni dau vakatakilai koya. E vakadonuya o Pailato na nona kerekere, mani kauta sara na yago i Jisu.+
39 E lako tale ga yani o Nikotimo,+ o koya a lai raici Jisu mada ena imatai ni gauna ena dua na bogi, e kauta yani na mura e veiwaki kei na elou,* e rauta ni duanadrau na paudi* na kena bibi.+
40 Erau qai kauta na yago i Jisu, rau ologa ena isulu lineni vakaisaluaki+ me vaka ga na nodra ivakarau ni veibulu na Jiu.
41 Ia e tiko e dua na iteitei ena vanua e vakamatei kina o Jisu, ena iteitei ya e tiko kina e dua na ibulubulu* vou+ se bera ni dua e vakadavori kina.
42 Me vaka ni donuya sara tiko ga na nodra siga ni Vakavakarau+ na Jiu, erau mani lai vakadavora e kea na yago i Jisu ni toka voleka ga.
iVakamacala e ra
^ Rauta na 12 na kaloko ena sigalevu.
^ Raica na iVakamacala ni Vosa.
^ Raica na iVakamacala ni Vosa.
^ E dua na mataqali ka bula ni waitui e malumu, e rawa ni domica na wai.
^ Raica na iVakamacala ni Vosa.
^ Se “ibulubulu nanumi.”
