Jope 13:1-28
13 “Io, sa raica na veika kece qo na mataqu,Sa rogoca qai kila qo na daligaqu.
2 Na ka dou kila, au kila tale ga,Au sega ni lolovira vei kemudou.
3 Ia o yau, meu vosa ga vei koya e Kaukaua Duadua,Au vinakata meu valataka vua na Kalou na noqu kisi.+
4 Ia dou sa vakacacana na kequ irogorogo ena lasu,Dou yavu vuniwai tawayaga kece.+
5 Ke dou vakadigagalu mada ga,Ena qai vakaraitaki i keri na nomudou vuku.+
6 Yalovinaka, dou rogoca na noqu ile,Qai vakatudaliga ina vakamamasu ni tebenigusuqu.
7 Vakacava dou na vosa vakatawadodonu ena vuku ni Kalou,Dou na vosa ni veidabui ena vukuna?
8 Dou na tovaki koya,*Dou na saga mo dou valataka na kisi ni Kalou dina?
9 Vakacava ena vinaka ke vaqaqai kemudou o koya?+
Dou na vakalialiai koya me vaka nomudou vakalialia na tamata?
10 Ena vunauci kemudou sara ga o koyaKe dou saga lo mo dou veitovaki.+
11 Vakacava ena sega ni vakarerei kemudou na kena cecereQai curumi kemudou na domobula ena vukuna?
12 Na nomudou ivosavosa vuku,* e vosa vakaibalebale ni dravusa,Na nomudou isasabai* e malumalumu vaka na isasabai qele.
13 Dou vagagalu e mataqu, meu vosa mada.
Veitalia ga se cava ena yacovi au!
14 Na cava au biuti au kina ena dua na ituvaki dredre*Qai biuta e ligaqu na noqu bula?
15 Ke mani vakamatei au o koya, au na wawa tiko ga,+Au na valataka na noqu kisi* e matana.
16 Ena qai noqu ivakabula o koya,+Ni na sega ni toro rawa yani i matana o koya e sega ni vakabauta* na Kalou.+
17 Dou rogoca vinaka na noqu vosa,Dou vakatudaliga ena noqu itukutuku.
18 Raica qo, au sa vakarautaka noqu kisi ni veilewai,Au kila niu donu tiko.
19 O cei ena saqati au?
Au na mate keu galu tiko ga!*
20 Kemuni na Kalou, ni vakadonuya vei au e rua na ka,*Meu kua ni vunitaki au kina mai na matamuni:
21 Ni biuta vakayawa na ligamuni bibi,Meu kua tale ga ni domobula ena noqu rerevaki kemuni.+
22 Ni kaci mai meu rogo yani,Se meu vosa mada, moni qai sauma mai.
23 Na cava na noqu cala kei na noqu ivalavala ca?
Vakatakila vei au na noqu talaidredre kei na noqu valavala ca.
24 Na cava oni vunia kina na matamuni+Qai wiliki au meu kemuni meca?+
25 Oni na saga moni vakarerea e dua na draunikau sa veicaginayakiSe cicimuria na vunicovuata raqosa?
26 Ni oni vola tiko ga na veibeitaki gaga me baleti au,Oni qai cakava meu saumitaro ena noqu valavala ca niu se itabagone.
27 Oni sa biuta na yavaqu ena ivesu kau,Oni raica matua na noqu sala kece ga,Oni qai vakamuria vinaka na weniyavaqu yadua.
28 O koya gona, e vuca na tamata* me vaka na ka sa midra,Me vaka na isulu sa kania na sarasara.
iVakamacala e ra
^ Se “vakaduiduitaki koya.”
^ Se “tawaguilecavi.”
^ Ipe., “ivakadei ni isasabai.”
^ Ipe., “Na cava au kauta voli kina na lewequ e batiqu?”
^ Se “totaka noqu ivalavala.”
^ Se “e vukitani vua.”
^ Se rawa ni, “Ke rawa vua e dua, au na galu voli ga qai mate.”
^ Ipe., “E rua wale ga na ka moni kua ni cakava vei au.”
^ Ipe., “o koya,” rairai dusi Jope.
