Josua 10:1-43
10 Ena gauna ga e rogoca kina o Tui Etoniseteki mai Jerusalemi ni sa ravuti Ai o Josua qai vakarusa, e vakayacora vei Ai kei na kena tui+ na ka e vakayacora vei Jeriko kei na kena tui,+ era veiyaloni kei ira na Isireli+ o ira na lewe i Kipioni ra qai tiko vata ga,
2 e rere vakalevu+ ni koro levu o Kipioni me vaka e dua na koro vakaturaga. E levu sara vei Ai+ ra qai tamata qaqa kece na lewena.
3 E mani vakauta na itukutuku qo o Etoniseteki na tui Jerusalemi vei Oami na tui Epironi,+ vei Pirami na tui Jarimoce, vei Jafia na tui Lakisi, kei Tipiri na tui Ekiloni:+
4 “Dou mai vukei au mada meda valuti Kipioni nira sa veiyaloni kei Josua kei ira na Isireli.”+
5 Eratou soqoni vata na lima na nodra tui na Amoraiti,+ oya na tui Jerusalemi, na tui Epironi, na tui Jarimoce, na tui Lakisi, kei na tui Ekiloni, kei na nodratou mataivalu, era lako yani mera keba donui Kipioni mera valuta.
6 Era talatala sara na lewe i Kipioni vei Josua ena keba i Kilikali:+ “Mo kua ni guilecavi* keimami na nomu tamata.+ Mo lako mai vakatotolo! Mo vakabulai keimami, mo vukei keimami! Era sa soqoni vata na nodra tui kece na Amoraiti era tiko ena veiulunivanua mera valuti keimami.”
7 E mani lako cake o Josua mai Kilikali, kei ira kece na tamataivalu kei ira na tamata qaqa.+
8 E qai kaya vei Josua o Jiova: “Mo kua ni rerevaki ira+ niu sa soli ira e ligamu.+ Ena sega ni dua vei ira ena valuti iko rawa.”+
9 Era kidacala ni valuti ira o Josua, e lako cake mai Kilikali ena dua na bogi taucoko.
10 E vakasesei ira o Jiova e matadra na Isireli+ ra qai vakamatea e levu sara e Kipioni, era cicimuri ira ena sala e lako cake i Pecioroni ra qai vakamatei ira tiko me yaco sara i Aseka kei Maketa.
11 Nira drovaki ira tiko na Isireli nira gole sobu i Pecioroni qai vakatauca vei ira o Jiova na ucaqereqere lelevu mai lomalagi me yaco sara i Aseka, era mate kina. E levu era mate ena ucaqereqere, e lailai era vakamatea na Isireli ena nodra iseleiwau.
12 Ena siga e vakadrukai ira kina na Amoraiti o Jiova e matadra na Isireli, e kaya sara o Josua vei Jiova e matadra na Isireli:
“Matanisiga, mo tu vakadua+ donui Kipioni,+Kei iko vula, donuya na Buca o Eijaloni!”
13 E tu sara vakadua na matanisiga, e sega ni yavala na vula mera vakadruka mada na lewe ni matanitu na kedra meca. Vakacava, e volai ena ivola i Jaeseri?+ E tu vakadua na matanisiga ena lomadonu ni lomalagi, e sega ni dromu totolo me rauta ni dua na siga taucoko.
14 E sega tale ni dua na siga e liu se muri me tautauvata kei na siga oya, ni a rogoca o Jiova na domona e dua na tamata,+ ni vala sara ga o Jiova ena vukudra na Isireli.+
15 Oti qori e lesu o Josua kei ira kece na Isireli ina keba e Kilikali.+
16 Ia eratou dro na lima na tui, eratou lai vuni tiko ena qaravatu e Maketa.+
17 E tukuni sara vei Josua: “E laurai ni ratou vuni tiko ena qaravatu e Maketa na lima na tui.”+
18 E qai kaya o Josua: “Moni vaqiqica na vatu lelevu ina gusu ni qara, ni lesia eso mera yadrava.
19 Ia o kemuni na kena vo moni kua ni tu vakadua. Moni cicimuri ira na kemuni meca, moni mokuti ira na tiko e muri.+ Moni kua ni vakatara mera curu ena nodra koro, ni sa soli ira e ligamuni o Jiova na nomuni Kalou.”
20 Oti ga na nona ravuti ira o Josua kei ira na Isireli ena ravuravu levu me vakawabokotaki ira, e bula ga eso nira dro ra qai curu ina koro vakabai,
21 era lesu kece vakavinaka na tamata vei Josua ena keba e Maketa. E sega ni dua e doudou me tukuna e dua na ka ca vei ira na Isireli.
22 E kaya sara o Josua: “Moni dolava na gusu ni qaravatu, kauti ratou mai tuba na lima na tui mai na qaravatu, ni kauti ratou mai vei au.”
23 Era mani kauta yani vua na lima na tui mai na qara: na tui Jerusalemi, na tui Epironi, na tui Jarimoce, na tui Lakisi, kei na tui Ekiloni.+
24 Ena gauna ga era kauta yani kina na tui qori vei Josua, e kacivi ira kece na lewe i Isireli o koya qai tukuna vei ira na komada ni tamataivalu era lako vata kei koya: “Dou toso mai liu. Dou biuta na yavamudou ena usousonidomodratou na tui qo.” Eratou toso yani i liu, eratou biuta na yavadratou ena usousonidomodratou.+
25 E kaya sara vei ratou o Josua: “Dou kua ni rere se domobula.+ Dou yaloqaqa dou kaukaua, qori na ka ena vakayacora o Jiova vei ira kece na kemudou meca dou na valuta.”+
26 Oti qori e mokuti ratou o Josua qai vakamatei ratou, e vakaliligi ratou sara ena lima na kau,* eratou lili tu ga ena kau me yacova na yakavi.
27 Ni sa dromu na siga e vakarota o Josua me ratou kau sobu mai na kau+ me ratou biu ena loma ni qaravatu eratou a vuni tu kina. E qai bini na vatu lelevu ena gusu ni qaravatu, se tu ga me yacova na siga qo.
28 E valuti Maketa ena siga oya o Josua,+ e ravuta ena iseleiwau. E vakamatea na kena tui kei ira kece na tiko kina, e sega ni vakabula e dua.+ E vakayacora vua na tui Maketa+ na ka ga e cakava vei tui Jeriko.
29 E biubiu mai Maketa o Josua kei ira kece na Isireli mera lako i Lipina, ra qai valuti Lipina.+
30 E soli Lipina tale ga o Jiova kei na kena tui+ ina ligadra na Isireli, era ravuta kei ira kece na tiko kina ena iseleiwau, era sega ni vakabula e dua. Era vakayacora vua na kena tui na ka ga era cakava vua na tui Jeriko.+
31 Oti e biuti Lipina o Josua kei ira kece na Isireli mera lako i Lakisi,+ era keba e kea ra qai valuta.
32 E soli Lakisi o Jiova e ligadra na Isireli ra qai ravuta ena ikarua ni siga. Era ravuta kei ira kece na tiko kina ena iseleiwau+ me vaka ga na ka kece era cakava vei Lipina.
33 E lako cake sara o Orami na tui Keseri+ me vukei Lakisi, ia e ravuti koya kei ira na nona tamata o Josua me sega ni dua e bula.
34 E biuti Lakisi o Josua kei ira kece na Isireli mera lako i Ekiloni,+ era keba e kea ra qai valuta.
35 Era valuta ena siga oya, era ravuta ena iseleiwau. Era vakamatei ira kece na tiko kina ena siga oya me vaka ga na ka era vakayacora e Lakisi.+
36 E lako cake mai Ekiloni o Josua kei ira kece na Isireli mera lako i Epironi+ mera valuta.
37 Era valuta era ravuta na kena tui, na kena tauni, kei ira kece era tiko kina ena iseleiwau, era sega ni vakabula e dua. Me vaka ga na ka e vakayacora e Ekiloni, e vakarusa kei ira kece na tiko kina.
38 E qai gole i Tipiri o Josua kei ira kece na Isireli+ mera valuta.
39 E ravuta sara, na kena tui kei na kena tauni kece, era vakamatei+ ira kece na tiko kina ena iseleiwau, era sega ni vakabula e dua.+ E vakayacora vei Tipiri kei na kena tui na ka ga e vakayacora vei Epironi kei Lipina kei na kena tui.
40 E vakadruka o Josua na vanua kece ena veiulunivanua, na Nikepi, na Sefila,+ na baba, kei ira kece na kedra tui, e sega ni vakabula e dua, e vakarusa o koya na kabula kece+ me vaka ga e vakarota o Jiova na Kalou ni Isireli.+
41 E vakadrukai ira o Josua mai Ketesa-parinea+ me yaco i Kesa,+ kei na vanua kece o Koseni+ me yaco sara i Kipioni.+
42 E valuta o Josua na tui kece qori kei na nodra vanua ena dua ga na gauna, ni vala tiko ena vukudra na Isireli o Jiova na Kalou ni Isireli.+
43 E qai lesu o Josua kei ira kece na Isireli ina keba e Kilikali.+
