Josua 11:1-23
11 Ni rogoca ga qori o Japini na tui Asori, e vakauitukutuku sara vei Jopapa na tui Matoni,+ vei tui Simironi, vei tui Ekisafi,+
2 vei ira na tui ena vualiku ni veiulunivanua, o ira na tiko ena buca* ena ceva kei Kinereci, o ira na tiko ena Sefila, kei na ra ni baba e Doa,+
3 vei ira na kai Kenani+ ena tokalau kei na ra, vei ira na Amoraiti,+ vei ira na Itaiti, vei ira na Perisaiti, vei ira na Jepusaiti ena veiulunivanua, kei ira na Aivaiti+ e ruku i Erimoni+ ena vanua o Misipa.
4 Era lako yani kei na nodra mataivalu kece, e dua na iwiliwili levu sara e vaka na mataninuku ni matasawa, e levu sara na ose kei na qiqinivalu.
5 Era vakadonuya na tui kece qo mera sota, era qai lako yani mera keba vata ena wai o Meromi mera valuti Isireli.
6 E kaya o Jiova vei Josua: “Mo kua ni rerevaki ira+ niu na soli ira kece vei Isireli ena gauna vata qo nimataka mera vakamatei ira. Mo taya na ua ni sagadra na ose,+ mo vakama ena bukawaqa na nodra qiqinivalu.”
7 E lako vakidacala yani o Josua kei ira kece na tagane ni ivalu mera valuti ira ena wai o Meromi.
8 E qai soli ira o Jiova ina ligadra na Isireli,+ era vakadrukai ira, era cicimuri ira me yaco sara i Saitoni Levu+ kei Misirifoci-meimi,+ kei na tokalau ni Buca o Misipe, era ravuti ira tiko me sega ni dua e vo.+
9 Oti e vakayacora vei ira o Josua me vaka ga e tukuna vua o Jiova, e taya na ua ni sagadra na ose, e vakama ena bukawaqa na nodra qiqinivalu.+
10 E mani lesu o Josua me ravuti Asori qai mokuta na kena tui ena iseleiwau+ ni dau liutaki ira tu na veimatanitu kece qo o Asori.
11 Era mokuti ira kece na tiko kina ena iseleiwau, era vakawabokotaki ira.+ E sega sara ga ni vo e dua na kabula.+ E qai vakamai Asori ena bukawaqa.
12 E ravuta kece o Josua na nodra koro na tui qori, e vakadrukai ira kece na kedra tui ena iseleiwau.+ E vakamatei+ ira me vaka ga e vakarota o Mosese na tamata i Jiova.
13 Ia era sega ni vakama na Isireli na koro kece era tiko e delana, vakavo ga o Asori ni a vakama o Josua.
14 Era kauta na Isireli na itokinivalu kece ni koro qori kei na manumanu me nodra.+ Ia era vakamatei ira kece na tamata ena iseleiwau mera vakawabokotaki ira.+ Era sega ni vakabula e dua.+
15 Na ka e vakarota o Jiova vei Mosese na nona tamata, e vakaroti Josua kina o Mosese,+ e vakayacora sara o Josua. E cakava kece o koya na ka e vakaroti Mosese kina o Jiova.+
16 E vakadruka o Josua na vanua kece qo, na veiulunivanua, na Nikepi+ taucoko, na vanua kece o Koseni, na Sefila,+ na Arapa,+ na veiulunivanua e Isireli kei na kena Sefila,*
17 mai Ulu i Alaki lako cake i Sia me yaco sara i Pealikata+ ena Buca o Lepanoni ena ruku ni Ulu i Erimoni,+ e ravuti ira kece na kedra tui, e vakamatei ira.
18 E dede toka na nona valuti ira na tui kece qo o Josua.
19 E sega ni dua na koro me veiyaloni kei ira na Isireli, o ira ga na Aivaiti era tiko e Kipioni.+ Era vakamalumalumutaki ira kece na kena vo ena ivalu.+
20 E vakatara o Jiova mera yalokaukaua+ mera valuti Isireli me vakarusai ira, me kua tale ga ni vakadonui ira.+ Era vakawabokotaki me vaka e vakaroti Mosese kina o Jiova.+
21 Ena gauna oya e vakamatei ira na luvei Anaki ena veiulunivanua o Josua,+ mai Epironi, mai Tipiri, mai Anapi, mai na veiulunivanua kece e Juta, kei na veiulunivanua kece e Isireli. E vakarusai ira o Josua kei na nodra koro.+
22 E sega ni vo e dua na luvei Anaki ena nodra vanua na Isireli. Era tiko ga+ e Kesa,+ e Kaca,+ kei Asoto.+
23 E qai lewa na vanua kece o Josua me vaka ga na ka e yalataka vei Mosese o Jiova,+ e mani solia vei ira na Isireli o Josua na nodra ivotavota me vaka na nodra iwasewase mera qai wasea vakayavusa.+ E cegu tu na veivaluvaluti ena vanua.+
