Josua 14:1-15
14 Qo na ka era taura na Isireli me nodra ivotavota ena vanua o Kenani, e solia vei ira o Eliesa na bete kei Josua na luvei Nuni kei ira na turaga ni mataqali ena nodra yavusa na Isireli mera taukena.+
2 E vakawirimadigitaki na nodra ivotavota+ na ciwa na yavusa kei na veimama ni yavusa, me vaka e vakaroti Mosese kina o Jiova.+
3 Sa solia oti o Mosese na nodrau ivotavota na rua na yavusa kei na veimama ni yavusa tale adua ena tai* ni Joritani,+ e sega ga ni solia e dua na nodra ivotavota na Livai.+
4 E rua na nodra yavusa+ na kawa nei Josefa, o Manasa kei Ifireimi,+ era sega ni solia e dua na iwase ni nodra vanua vei ira na Livai, era solia ga na koro+ mera tiko kina kei na vanua veico me yaga vei ira na nodra manumanu kei na nodra iyau.+
5 Era mani wasewasea na vanua na Isireli me vaka ga e vakaroti Mosese kina o Jiova.
6 Era qai lako yani vei Josua e Kilikali+ o ira na Juta, e qai kaya vua o Kelepi+ na luvei Jifune na Kenisaiti: “O kila vinaka na vosa i Jiova+ vei Mosese na tamata ni Kalou dina+ me baleti kedaru mai Ketesa-parinea.+
7 Au yabaki 40 ni talai au o Mosese na tamata i Jiova mai Ketesa-parinea meu raica lo na vanua,+ ia niu lesu mai au tukutuku sara vakadodonu vua.*+
8 O ira na taciqu keimami lako cake vata era vakayalolailaitaki* ira na tamata, ia o yau au muri Jiova ena lomaqu taucoko.+
9 E bubului sara o Mosese ena siga oya, e kaya: ‘Na vanua o butuka ena nomu ivotavota me tawamudu vei iko kei ira na luvemu, ni o muri Jiova na noqu Kalou ena lomamu taucoko.’+
10 Me vaka ga e yalataka+ o Jiova, e vakabulai+ au ena 45 na yabaki qo ni yalataka qo o Jiova vei Mosese ena gauna era lako voli kina na Isireli ena vanua talasiga,+ au se bula tiko ga nikua, au yabaki 85.
11 Au se kaukaua tiko ga nikua me vaka ga ena siga e talai au kina o Mosese. Na noqu kaukaua ena gauna qo e vaka ga ena gauna oya meu lako ena ivalu, meu qarava tale ga eso na itavi.
12 Mo solia mada vei au na veiulunivanua qo e yalataka o Jiova ena siga oya. O rogoca ena siga oya nira tiko e kea na luvei Anaki,+ e levu na nodra koro vakabai,+ ena tokoni au sara ga+ o Jiova, au na qai cemuri ira tani me vaka e yalataka o Jiova.”+
13 E mani vosa vakalougatataki koya o Josua, e soli Epironi vei Kelepi na luvei Jifune me nona ivotavota.+
14 Qori na vuna e taukeni Epironi kina o Kelepi na luvei Jifune na Kenisaiti me nona ivotavota me yacova na siga qo, ni a muri Jiova na Kalou ni Isireli mai vu ni lomana.+
15 E dau yaca i Epironi tu o Kiriaciaripa+ (o Aripa e rogo vei ira na luvei Anaki). E cegu tu na veivaluvaluti ena vanua.+
iVakamacala e ra
^ Oya ena tokalau.
^ Ipe., “au tukuna vua na ka e tu e lomaqu.”
^ Ipe., “vakawaicalataka na lomadra.”
