Josua 2:1-24
2 E tala lo o Josua na luvei Nuni e rua na tamata mai Sitimi+ me rau yamata. E kaya vei rau: “Drau lai vakaraica na vanua, vakabibi o Jeriko.” Rau lako sara rau curu ena nona vale e dua na saqamua na yacana o Reapi,+ rau mani tiko e kea.
2 E qai tukuni vei tui Jeriko: “Raica! Era yaco mai ena bogi qo eso na Isireli mera raica lo na vanua.”
3 E talatala sara na tui Jeriko vei Reapi: “Kauti rau mai na tamata erau lako yani vei iko erau tiko ena nomu vale, ni rau lako mai me rau vakaraica lo na vanua taucoko.”
4 E kauti rau sara na tamata o Reapi me vunitaki rau. E qai kaya: “Io, erau a lako mai vei au na tamata, au sega ga ni kila na vanua erau lako mai kina.
5 Erau curu i tuba ena gauna e vakarau sogo kina na matamatanikoro ni lutu na karobo. Au sega ni kila na vanua erau lako kina, ia ke dou cicimuri rau totolo dou na toboki rau.”
6 (Ia a kauti rau cake o koya ina delanivale qai vunitaki rau ena tolo ni feleki* a binia tu vakaiyatu e delanivale.)
7 Era mani cicimuri rau eso na tamata ina yasana e gole ina Joritani donuya na vanua mamatia,+ e sogo na matamatanikoro nira sa lako oti na cicimuri rau.
8 Ni bera ni rau davo me rau moce, e lako cake yani vei rau ina delanivale o Reapi.
9 E kaya sara vei rau: “Au kila ni na solia vei kemuni o Jiova na vanua,+ keimami rerevaki kemuni tale ga.+ Era yalolailai kece na lewenivanua ena vukumuni,+
10 ni keimami rogoca ni vakamacara vei kemuni o Jiova na wai ena Wasa Damudamu ni oni biuti Ijipita+ mai kei na ka oni cakava vei rau na nodra tui na Amoraiti, o Sioni+ kei Oki+ oni a vakamatei rau ena tai* ni Joritani.
11 Ena gauna keimami rogoca kina keimami lomataqaya,* e sega ni dua e yaloqaqa ena vukumuni, ni o Jiova na nomuni Kalou e Kalou ni lomalagi e cake kei na vuravura e ra.+
12 Yalovinaka, mo drau bubului mada vei au ena yaca i Jiova, ni dei na noqu lomani kemudrau, me dei tale ga na nomudrau lomana na vuvale nei tamaqu, mo drau vakaraitaka vei au e dua na ivakatakilakila meu vakabauti kemudrau kina.*
13 Mo drau vakabulai tamaqu kei tinaqu, o ratou na ganequ kei ratou na taciqu, kei ira kece era tiko vata kei ratou, mo drau vakabulai keimami mai na mate.”+
14 Erau qai kaya na tamata vei Reapi: “Keirau bolemate ena vukumudou!* Ke dou na sega ni tukuna na ka keirau mai cakava, ena dei na neirau lomani iko, keirau na dina vei iko ena gauna e solia kina vei keimami na vanua o Jiova.”
15 Oti oya e tukuci rau sobu ena dali ena katubaleka, ni toka na nona vale ena yasa ni bai ni koro. E vakaitikotiko o koya ena delanibai.+
16 E qai kaya vei rau: “Drau lako ina veiulunivanua mo drau vuni tiko e kea me tolu na siga, mera kua ni raici kemudrau o ira na cicimuri kemudrau tiko. Nira sa lesu mai drau qai lako ina vanua drau gole kina.”
17 Erau kaya na tamata vei Reapi: “Keirau na sega ni beitaki ena bubului o tukuna qo me keirau bubuluitaka+
18 ni keimami lako mai ena vanua, mo vesuka na wa damudamu qo ena katubaleka o tukuci keirau sobu kina. Mo kauti ratou vata yani na tamamu, na tinamu, o ratou na ganemu, kei ira kece na lewe ni vuvale nei tamamu ina nomu vale.+
19 Ke dua e biuta na katuba ni nomu vale me curu i tuba, ena beitaki ga vua na nona dra, keirau na sega ni cala kina. Ke vakaleqai* e dua e tiko vata kei iko e lomanivale ena beitaki vei keirau na nona dra.
20 Ia ke o tukuna na ka keirau mai cakava,+ keirau na sega ni beitaki ena bubului keirau cakava vei iko.”
21 E kaya o Reapi: “Me yaco mada ga na ka drau tukuna.”
E tukuna sara me rau lako, erau mani lako yani. Oti e vesuka na wa damudamu ena katubaleka.
22 Erau lako, erau yaco sara ena veiulunivanua, erau tiko ga e kea me tolu na siga mera lesu mada na cicimuri rau tiko. Era vaqarai rau ena gaunisala kece o ira na cicimuri rau tiko, ia era sega ni raici rau.
23 Erau qai siro mai na veiulunivanua na tamata, rau takosova na uciwai me rau yaco yani vei Josua na luvei Nuni. Erau tukuna sara vua na ka kece e yacovi rau.
24 Erau kaya vei Josua: “Sa solia vei keda o Jiova na vanua kece.+ Era yalolailai na lewenivanua kece ena vukuda.”+
iVakamacala e ra
^ Dua na kau tei ni gauna makawa. Na kena wa e caka kina na isululineni.
^ Oya ena tokalau.
^ Ipe., “waicala na lomai keimami.”
^ Se “na ivakatakilakila nuitaki.”
^ Se “Keirau na mate ia mo dou bula!”
^ Ipe., “lauti koya e dua na liga.”
