Josua 20:1-9
-
Koro ni idrodro (1-9)
20 E vosa vei Josua o Jiova:
2 “Mo tukuna vei ira na Isireli, ‘Moni digia eso na nomuni koro ni idrodro+ me vaka au tukuna vei kemuni ena gusu i Mosese,
3 me dro kina o koya e sega ni nakita se vakamatea vakacalaka e dua. Ena nomuni idrodro qori moni drovaki koya kina e nona itavi me sauma na dra.+
4 Me dro ina dua na koro qori,+ me duri ena matamatanikoro+ qai vakamacalataka na ka e cakava vei ira na qase ena koro qori. Mera kauti koya yani ina lomanikoro, mera qai solia vua e dua na vanua, ena tiko vata kei ira.
5 Ke cicimuria o koya e nona itavi me sauma na dra mera kua ni soli koya e veivakamatei vua, ni vakamatea vakacalaka na wekana qai sega ni cati koya e liu.+
6 Me tiko ena koro qori mera lewai koya mada na isoqosoqo,+ me tiko ga e kea me yacova ni mate o koya e veiqaravi tiko vakabete levu+ ena gauna qori. Oti me qai lesu o koya e veivakamatei vakacalaka ina koro e dro mai kina, me curu ina nona koro kei na nona vale.’”+
7 Era qai vakatabui Ketesi+ e Kalili ena veiulunivanua o Nafitalai, o Sikemi+ ena veiulunivanua o Ifireimi, kei Kiriaciaripa,+ oya o Epironi ena veiulunivanua e Juta.
8 Ena yasayasa na Joritani ena tokalau kei Jeriko, era digitaki Peseri+ ena vanua talasiga ena delana raraba mai na yavusa na Rupeni, o Remoci+ e Kiliati mai na yavusa na Kata, kei Kolani+ e Pasani mai na yavusa na Manasa.+
9 Qo kece na koro e digitaki me baleti ira na Isireli kei ira na vulagi e maliwai ira tiko, me dro kina o koya e sega ni nakita na nona vakamatea e dua,+ me kua ni mate e liga i koya e nona itavi me sauma na dra me yacova ni sa lewai e matadra na isoqosoqo.+