Josua 22:1-34
22 E kacivi ira sara na Rupeni, na Kata, kei na veimama ni yavusa na Manasa o Josua,
2 e kaya vei ira: “Oni muria na ka kece e vakaroti kemuni+ kina o Mosese na tamata i Jiova, oni vakarorogo ina domoqu ena ka kece au vakaroti kemuni kina.+
3 Oni sega ni biuti ira na tacimuni ena gauna kece qo me yacova mai nikua,+ oni vakayacora tiko ga na nomuni itavi e vakaroti kemuni kina o Jiova na nomuni Kalou.+
4 Ia qo sa solia na vakacegu vei ira na tacimuni o Jiova na nomuni Kalou me vaka e yalataka vei ira.+ Moni lesu ina nomuni valelaca ena vanua e solia vei kemuni o Mosese na tamata i Jiova moni taukena ena tai* ni Joritani.+
5 Moni qarauna ga moni muria na ivakaro kei na Lawa e vakaroti kemuni kina o Mosese na tamata i Jiova,+ ni oni lomani Jiova na nomuni Kalou,+ ni oni muria na nona ivalavala kece,+ ni oni talairawarawa ena nona ivakaro,+ ni oni kabiti koya,+ ni oni qaravi koya+ ena lomamuni taucoko kei na nomuni vinaka taucoko.”*+
6 E vosa vakalougatataki ira sara o Josua qai tukuna mera lako, era mani dui gole ina nodra valelaca.
7 Sa solia oti o Mosese vei ira na veimama ni yavusa na Manasa na nodra ivotavota e Pasani,+ e qai solia o Josua vei ira na veimama ni yavusa adua na vanua ena yasa ni Joritani+ ina ra vata kei ira na tacidra. E mani tukuna vei ira o Josua mera lako ina nodra valelaca, e vosa vakalougatataki ira
8 e tukuna vei ira: “Moni lesu ina nomuni valelaca kei na levu na iyau, me levu na manumanu, na siliva kei na koula, na kopa kei na kaukamea, kei na levu sara na isulu.+ Moni wasea vata kei ira na tacimuni na nodra itokinivalu+ na kemuni meca.”
9 Oti qori era biuti ira na vo ni Isireli mai Sailo ena vanua o Kenani o ira na Rupeni, na Kata, kei na veimama ni yavusa na Manasa mera lesu ina vanua o Kiliati,+ ina vanua mera taukena mera tiko kina ena ivakaro i Jiova ena gusu i Mosese.+
10 Nira yaco yani na Rupeni, na Kata, kei na veimama ni yavusa na Manasa ena yasayasa na Joritani ena vanua o Kenani, era tara e kea e dua na icabocabonisoro levu sara volekata na Joritani.
11 Oti era qai rogoca+ na vo ni Isireli, era kaya: “Raica! Era sa tara na Rupeni, na Kata, kei na veimama ni yavusa na Manasa na icabocabonisoro ena iyala ni vanua o Kenani ena yasayasa na Joritani, ena nodra yasana na Isireli.”
12 Nira rogoca qori na Isireli, era soqoni vata e Sailo na isoqosoqo taucoko na Isireli+ mera lai valuti ira.
13 Era qai talai Finiasi+ na luvei Eliesa na bete o ira na Isireli vei ira na Rupeni, na Kata, kei na veimama ni yavusa na Manasa ena vanua o Kiliati,
14 era tomani koya e tini na turaga, e dua na turaga mai na dua na mataqali ena yavusa taucoko e Isireli, era turaga kece ni mataqali ena vica vata na udolu* e Isireli.+
15 Nira yaco yani vei ira na Rupeni, vei ira na Kata, kei na veimama ni yavusa na Manasa ena vanua o Kiliati era kaya vei ira:
16 “Qo na ka e tukuna na isoqosoqo kece i Jiova: ‘Na cava oni sega ni yalodina+ kina vua na Kalou ni Isireli? Oni sa lesu moni kua ni muri Jiova nikua, ni oni tara e dua na icabocabonisoro moni talaidredre kina vei Jiova.+
17 Se lailai vei keda na noda cakacala mai Piori? Eda se sega ni vakasavasavataki keda me yacova nikua qai tauva na isoqosoqo i Jiova na matedewa.+
18 Ia oni na lesu nikua moni kua ni muri Jiova! Ke oni talaidredre vei Jiova nikua, nimataka ena cudruva o koya na isoqosoqo taucoko ni Isireli.+
19 Ke sega ni savasava na vanua oni taukena, moni takoso ina vanua e taukena+ o Jiova e tiko kina+ na valeniveitavaki i Jiova moni tiko vata kei keimami, ia moni kua ni talaidredre vei Jiova, moni kua ni vakavuna na neimami talaidredre ni oni tara na icabocabonisoro me ikuri ni icabocabonisoro i Jiova na noda Kalou.+
20 Ena gauna e sega ni yalodina kina o Ekani+ na luvei Sira me baleta na ka me vakarusai, vakacava e sega ni cudruvi kece kina na isoqosoqo ni Isireli?+ E sega ni mate duadua ga ena nona cala.’”+
21 Era mani sauma na Rupeni, na Kata, kei na veimama ni yavusa na Manasa vei ira na turaga ni vica vata na udolu* e Isireli:+
22 “O Jiova na nodra Kalou na kalou! O Jiova na nodra Kalou na kalou!+ E kila o koya, ena kila tale ga o Isireli. Ke keimami talaidredre se sega ni yalodina vei Jiova moni kua ni vakabulai keimami nikua.
23 Ke keimami tara e dua na icabocabonisoro me keimami lesu me keimami kua ni muri Jiova, me keimami vakacabora kina na isoro kama, na isoro kakana, kei na isoro ni veiyaloni, me qai totogitaki keimami ga o Jiova.+
24 Ia e tiko e dua tale na vuna keimami cakava kina qo, keimami kaya, ‘Era na tukuna na luvemuni vei ira na luvei keimami ena dua na gauna mai muri: “Me icavai vei kemuni o Jiova na Kalou ni Isireli?
25 E vakarautaka o Jiova na Joritani me yalana na neimami vanua kei na nomuni na Rupeni kei na Kata. E sega na nomuni ivotavota vei Jiova.” Era na vakavuna na luvemuni mera sega ni sokaloutaki Jiova na luvei keimami.’
26 “Keimami kaya sara, ‘Meda yavala mada meda tara e dua na icabocabonisoro, me kua ni cabori kina na isoro kama se na isoro,
27 ia me ivakadinadina vei kemuni kei keimami,+ vei ira tale ga na noda kawa* era taravi keda ni keimami na qarava na neimami itavi vei Jiova ena neimami isoro kama, na neimami isoro kei na neimami isoro ni veiyaloni,+ mera kua kina ni kaya na luvemuni vei ira na luvei keimami ena dua na gauna mai muri: “E sega na nomuni ivotavota vei Jiova.”’
28 Keimami kaya, ‘Ke ra mani tukuna vei keimami kei ira na neimami kawa* ena dua na gauna mai muri, keimami na kaya: “Moni raica na ivakatakarakara ni icabocabonisoro i Jiova era tara na tukai keimami, e sega ni cabori kina na isoro kama se isoro, ia me ivakadinadina vei keimami kei kemuni.”’
29 E sega sara ga ni votu ena neimami vakasama me keimami talaidredre vei Jiova, me keimami lesu nikua me keimami kua ni muri Jiova+ ni keimami tara e dua na icabocabonisoro me cabori kina na isoro kama, na isoro kakana kei na isoro, me ikuri ni icabocabonisoro i Jiova na noda Kalou e tiko ena mata ni nona valeniveitavaki!”+
30 Ni rogoca o Finiasi na bete, o ira na turaga ni isoqosoqo, kei ira na turaga ni vica vata na udolu* e Isireli era tomani koya na ka era tukuna na Rupeni, na Kata kei ira na Manasa, era lomavakacegu sara.+
31 E mani kaya o Finiasi na luvei Eliesa na bete vei ira na kawa i Rupeni, na Kata, kei ira na Manasa: “Keimami kila nikua ni tiko vata kei keda o Jiova, ni oni sega ni talaidredre vei Jiova. Oni vakabulai ira na Isireli mai na liga i Jiova.”
32 Oti oya e biuti ira na Rupeni kei ira na Kata ena vanua o Kiliati o Finiasi na luvei Eliesa na bete kei ira na turaga mera lesu ina vanua o Kenani mera tukutuku vei ira na vo ni Isireli.
33 Era taleitaka sara na itukutuku qori na Isireli. Era qai vakavinavinakataka na Kalou, era sega tale ni veivosakitaka mera lai valuti ira na Rupeni kei ira na Kata, mera vakarusa na vanua era tiko kina.
34 Era vakayacana sara na Rupeni kei ira na Kata na icabocabonisoro,* baleta ni “ivakadinadina vei keda ni o Jiova na Kalou dina.”
iVakamacala e ra
^ Oya ena tokalau.
^ Ipe., “nomuni neʹphesh kece.” Raica na iVakamacala ni Vosa.
^ Se “mataqali.”
^ Se “mataqali.”
^ Ipe., “itabatamata.”
^ Ipe., “itabatamata.”
^ Se “mataqali.”
^ Mai na ka e tukuni, e rairai yaca ni icabocabonisoro o iVakadinadina.
