Josua 3:1-17
-
Ra takosova na Isireli na Joritani (1-17)
3 E yadra sara vakamataka o Josua, o koya kei ira kece na Isireli* mera biuti Sitimi+ mera lako ina Joritani. Era moce e kea, oti ra qai takoso.
2 Oti e tolu na siga era lako sara yani na turaga+ ena keba
3 mera vakaroti ira na tamata: “Ena gauna ga oni raici ira kina na bete era Livai+ nira colata mai na kato ni veiyalayalati i Jiova na nomuni Kalou, moni biuta sara na nomuni tikina moni muria.
4 Ia moni yawaka toka na kato me rauta ni 2,000 na kiupiti.* Moni kua sara ni volekata yani, moni kila kina na sala moni muria, ni oni se sega vakadua ni muria na sala qori.”
5 E kaya vei ira na tamata o Josua: “Moni vakasavasavataki kemuni,+ ni na vakayacora vei kemuni o Jiova na veika veivakurabuitaki nimataka.”+
6 E qai kaya o Josua vei ira na bete: “Moni laveta na kato+ ni veiyalayalati, moni liutaki ira na tamata.” Era laveta sara na kato ni veiyalayalati mera liutaki ira yani na tamata.
7 E kaya o Jiova vei Josua: “Au na tekivu vakacerecerei iko nikua e matadra kece na Isireli,+ mera kila kina niu na tokoni iko+ me vaka ga na noqu tokoni Mosese.+
8 Ia o iko mo vakaroti ira na bete era colata tiko na kato ni veiyalayalati: ‘Ni oni yaco yani ena batiniwai na Joritani, moni duri vakadua ena Joritani.’”+
9 E qai kaya o Josua vei ira na Isireli: “Ni toso mai moni rogoca na vosa i Jiova na nomuni Kalou.”
10 E tomana o Josua: “Oni na qai kila qo ni tiko vata kei kemuni e dua na Kalou bula,+ ena cemuri ira sara ga e matamuni na kai Kenani, o ira na Itaiti, o ira na Aivaiti, o ira na Perisaiti, o ira na Kakesaiti, o ira na Amoraiti, kei ira na Jepusaiti.+
11 Raica! Na nona kato ni veiyalayalati na Turaga ni vuravura taucoko ena liutaki kemuni ina loma ni Joritani.
12 Ia qo moni kauta e 12 na tagane mai na yavusa i Isireli, e dua na tagane mai na dua na yavusa,+
13 ena gauna ga e tara kina na wai ni Joritani na qeteqeteniyavadra na bete era colata tiko na Kato i Jiova, na Turaga ni vuravura taucoko, ena mudu na drodro ni wai mai cake, ena tu vakadua na wai me vaka e dua na ilatiniwai.”*+
14 Era biuta sara na tamata na nodra valelaca ni bera nira takosova na Joritani, era liutaki ira na tamata na bete nira colata tiko na kato+ ni veiyalayalati.
15 Nira yaco ga yani ena Joritani o ira na colata tiko na Kato qai dromu ena batiniwai na yavadra na bete era colata tiko na Kato (ni dau luvu na bati ni Joritani+ ena gauna kece ni tatamusuki),
16 e tu sara vakadua na drodro ni wai mai cake. E tubu me vaka na ilatiniwai* ena koro yawa sara o Atama volekati Saricani, e maca kina na wai e drodro sobu ina Wasa na Arapa, na Wasa Tuituina.* Ni tu vakadua na wai era takoso sara na tamata donui Jeriko.
17 Era duri tiko ga vakadua na bete era colata tiko na kato ni veiyalayalati i Jiova ena vanua mamaca+ ena lomadonu ni Joritani, nira takoso tiko na Isireli taucoko ena vanua mamaca+ me yacova ni takosova na Joritani na matanitu taucoko.