Josua 6:1-27
6 E sogo vinaka tu o Jeriko ena vukudra na Isireli, e sega ni dua e curu i tuba e sega ni dua e curu i loma.+
2 E qai kaya o Jiova vei Josua: “Raica, au sa soli Jeriko kei na kena tui, kei ira na kena tamata qaqa vei iko.+
3 O kemuni kece na tamataivalu moni wavokita na koro, moni lako wavokita vakadua. Qori na ka moni cakava me ono na siga.
4 Me ratou yadua na ileu ni tamanisipi e vitu na bete ena mata ni Kato. Ia ena ikavitu ni siga, moni wavokita vakavitu na koro, me ratou qai uvuca na ileu na bete.+
5 Ni uvuci na ileu ni tamanisipi, ena gauna ga oni rogoca kina na rorogo* ni ileu, mera kailavaka kece na tamata na kaila levu ni ivalu. Ena qai kasura na bai ni koro,+ mera dui lako cake vakadodonu na tamata.”
6 E mani kacivi ira vata na bete o Josua na luvei Nuni, e kaya vei ira: “Moni laveta na kato ni veiyalayalati, ia e vitu na bete me ratou yadua na ileu ni tamanisipi ena mata ni Kato i Jiova.”+
7 E kaya tale vei ira na tamata: “Moni lako yani moni wavokita na koro, mera liutaka na Kato i Jiova o ira na vakaiyaragi.”+
8 Ni vosa oti ga o Josua vei ira na tamata, eratou lako sara yani na vitu na bete eratou taura tiko na ileu ni tamanisipi ena mata i Jiova me ratou uvuca, e muri ratou yani na kato ni veiyalayalati i Jiova.
9 Era liutaki ira na bete era uvuca tiko na ileu o ira na vakaiyaragi, ra qai muria na Kato na yadra era tiko e muri ni uvuci tiko ga na ileu.
10 Ia e vakaroti ira na tamata o Josua: “Ni kua ni kaila se rogo na domomuni. Me kua ni dua na vosa e rogo mai gusumuni me yacova na siga au na tukuna kina vei kemuni, ‘Ni kaila!’ Moni kaila sara.”
11 E qai vakarota o koya me wavokita na koro na Kato i Jiova, me wavokita vakadua, oti mera lesu ina keba mera moce kina ena bogi.
12 Ena mataka tarava e yadra sara vakamataka o Josua, era qai laveta na bete na Kato+ i Jiova,
13 eratou uvuca tiko ga na ileu ni ratou lako ena mata ni Kato i Jiova na vitu na bete eratou yadua tiko na ileu ni tamanisipi. Era liu sara vei ratou o ira na vakaiyaragi, ra qai muria na Kato i Jiova na yadra era tiko e muri ni uvuci tiko ga na ileu.
14 Era wavokita vakadua na koro ena ikarua ni siga, oti era lesu ina keba. Era cakava tiko qori me ono na siga.+
15 Era yadra sara vakamataka ena ikavitu ni siga ni kida na mataka, era qai wavokita na koro me vaka era dau cakava, ia e vakavitu. Ena siga ga oya era wavokita vakavitu na koro.+
16 Ena ikavitu ni gauna era uvuca na bete na ileu, e kaya sara vei ira na tamata o Josua: “Ni kaila,+ sa solia vei kemuni o Jiova na koro!
17 Me vakarusai na koro kei na ka kece e tu kina,+ e nei Jiova kece. Me bula ga o Reapi+ na saqamua, o koya kei ira kece era tiko vata kei koya ena nona vale, ni a vunitaki rau na italai eda tala.+
18 Ia moni kua ni torova na ka me vakarusai+ de oni vinakata oni qai taura e dua na ka me vakarusai,+ ena rusa kina na keba ni Isireli me leqa kina.+
19 Ia na siliva kece kei na koula, na iyaya kopa kei na kaukamea me vakatabui me nei Jiova.+ Me biu ena katoniyau i Jiova.”+
20 Era qai kaila na tamata ni uvuci na ileu.+ Nira rogoca ga na tamata na rorogo ni ileu, era kailavaka sara na kaila levu ni ivalu, e mani kasura na bai.+ Oti qori era lako cake na tamata ina koro, era dui vakadodonu yani mera valuta na koro.
21 Era vakarusa na ka kece e tu ena koro ena iseleiwau, na tagane kei na yalewa, na gone kei na qase, na bulumakau, na sipi, kei na asa.+
22 E kaya sara o Josua vei rau na tagane erau a lai raica lo na vanua: “Drau lako ina nona vale na yalewa saqamua, drau kauta mai na yalewa kei ira kece era tiko vata kei koya, me vaka ga drau bubuluitaka vua.”+
23 Erau mani lako na cauravou yamata erau kauti Reapi mai, o tamana, o tinana, o ratou na ganena, kei ira kece era tiko vata kei koya,+ io erau kauti ira kece mai na nona vuvale, rau lai biuti ira sara ena daku ni nodra keba na Isireli.
24 Era qai vakama na koro kei na ka kece e tu kina. Ia na siliva, na koula, na iyaya kopa kei na kaukamea, era biuta ena katoniyau ena vale i Jiova.+
25 O Reapi ga na saqamua kei na vuvale i tamana, kei ira kece era tiko vata kei koya, e vakabulai ira o Josua,+ e tiko ga e Isireli o Reapi me yacova na siga qo,+ ni vunitaki rau na italai e tala o Josua me rau lai yamata i Jeriko.+
26 Ena gauna oya e cavuta na bubului qo o Josua:* “Me cudruvi mada ga ena mata i Jiova o koya e via tara tale na koro qo o Jeriko. Ena vakadavora na kena yavu ni mate na nona ulumatua, ena vakaduria tale ga na kena katuba ni mate na nona itini.”+
27 E tokoni Josua tiko ga o Jiova,+ e rogovaki e vuravura taucoko na kena irogorogo.+
iVakamacala e ra
^ Se “uvuci vakadede.”
^ Se rawa ni, “uqeti ira na tamata mera bubuluitaka na bubului qo.”
