Josua 7:1-26
7 Ia era sega ni yalodina na Isireli ena ka me vakarusai, ni taura o Ekani+ na luvei Kamai, na luvei Sapiti, na luvei Sira ena yavusa o Juta eso na ka me vakarusai.+ E cudruvi ira kina na Isireli o Jiova.+
2 E tala sara o Josua eso na tamata mai Jeriko mera lako i Ai,+ e volekati Peciaveni ena tokalau kei Peceli,+ e kaya vei ratou: “Dou lako cake mo dou raica mai na vanua.” Eratou lako sara na tamata me ratou raica mai na vanua o Ai.
3 Ni ratou lesu vei Josua eratou kaya vua: “Mera kua ni lako cake kece na tamata. Me rauta ga ni rua se tolu na udolu mera valuti Ai. Kua ni vakaocai ira kece na tamata mera lako nira lewe lailai ga.”
4 mani lako cake kina e rauta ni 3,000 na tamata, ia era qai drovaki ira na kai Ai.+
5 Era mokuta na kai Ai e 36 na tamata, era cicimuri ira mai na taudaku ni matamatanikoro me yaco sara i Siparimi,* era mokuti ira tiko ga ena baba. E waicala na lomadra* na tamata qai drodro yani me vaka na wai.
6 E dresulaka sara na nona isulu o Josua qai cuva vakatoboicu ena qele ena mata ni Kato i Jiova me yacova na yakavi, o koya kei ira na qase ni Isireli, ra qai kaburaka tiko ga e uludra na kuvuniqele.
7 E kaya o Josua: “Oilei kemuni na Turaga Cecere Duadua Jiova, na cava oni kauti ira mai kina na tamata qo ina tai ni Joritani moni soli keimami vei ira na Amoraiti mera vakarusai keimami? E vinaka ga me keimami a lomavakacegu me keimami tiko ga ena tai* kadua ni Joritani!
8 Moni vosoti au kemuni Jiova, na cava tale meu kaya qo ni sa drovaka* na kena meca o Isireli?
9 Nira rogoca na kai Kenani kei ira kece na lewenivanua, era na qai wavokiti keimami mera bokoca mai vuravura na yaca i keimami, na cava oni na cakava ena vuku ni yacamuni cecere?”+
10 E kaya o Jiova vei Josua: “Mo tucake! Na cava o davo vakatoboicu tiko kina?
11 Sa valavala ca o Isireli. Era beca na noqu veiyalayalati+ au vakarota mera muria. Era kauta eso na ka me vakarusai,+ era butakoca+ ra qai vunia vata kei na ka era taukena.+
12 O koya gona, era na sega ni vakadruka na Isireli na kedra meca. Era na vuki mera drovaki ira na kedra meca ni dodonu ga mera vakarusai. Au na sega ni tokoni kemuni tale, vakavo ke oni vakawabokotaka na ka me vakarusai e tiko vei kemuni.+
13 Mo tucake mo vakasavasavataki ira na tamata!+ Mo tukuna vei ira, ‘Moni vakasavasavataki kemuni nimataka, ni qo na ka e tukuna o Jiova na Kalou ni Isireli: “E tiko vei kemuni na Isireli na ka me vakarusai. Oni na sega ni vakadruka na kemuni meca, vakavo ke oni kauta tani na ka me vakarusai e tiko vei kemuni.
14 Moni lako mai vakayavusa ena mataka, na yavusa e digitaka o Jiova+ ena toro mai vakamataqali, na mataqali e digitaka o Jiova ena toro mai vakavuvale, na vuvale e digitaka o Jiova ena toro mai na tamata yadua.
15 O koya e tobo ni tiko vua na ka me vakarusai ena vakamai ena bukawaqa,+ o koya kei na ka kece e taukena ni beca na veiyalayalati+ i Jiova, e vakayacora tale ga na ka vakamadua e Isireli.”’”
16 E yadra totolo sara o Josua ena mataka tarava qai vakarota mera toro yani vakayavusa na Isireli, e mani digitaki na yavusa i Juta.
17 E vakarota o koya mera toro yani na mataqali kece ena yavusa i Juta, e digitaki sara na nodra mataqali na luvei Sira,+ e vakarota sara o koya mera lako yadudua yani na vuvale i Sira mani digitaki o Sapiti.
18 Oti e vakarota o koya mera lako yadudua yani na lewe ni vuvale nei Sapiti qai digitaki+ o Ekani na luvei Kamai, na luvei Sapiti, na luvei Sira ena yavusa i Juta.
19 E kaya sara o Josua vei Ekani: “Na luvequ, yalovinaka mo rokovi Jiova na Kalou ni Isireli, mo vakatusai iko vua. Yalovinaka, mo tukuna vei au na ka o cakava. Kua ni vunitaka vei au.”
20 E kaya o Ekani vei Josua: “Au sa valavala ca vei Jiova na Kalou ni Isireli, qo na ka au cakava.
21 Niu raica ena itokinivalu na isulu talei matavinaka ni Saina+ kei na 200 na sikeli* siliva kei na dua na uma koula e 50 na sikeli na kena bibi, au vinakata au qai kauta. E vunitaki tiko ena qele ena loma ni noqu valelaca, e toka e rukuna na ilavo.”
22 E tala sara o Josua eso na italai, eratou cici ina valelaca, e vunitaki tu na isulu ena nona valelaca, e tiko e rukuna na ilavo.
23 Eratou taura mai na ka qori ena loma ni valelaca me ratou kauta vei Josua kei ira kece na Isireli, eratou biuta na ka kece qori ena mata i Jiova.
24 O Josua kei ira kece na Isireli era kauti Ekani+ na luvei Sira, na siliva, na isulu talei, na uma koula,+ o ira na luvena tagane kei ira na luvena yalewa, na nona bulumakau, na nona asa, na nona qelenisipi, na nona valelaca, kei na ka kece e nona ina Buca o Akori.+
25 E kaya o Josua: “Na cava oni kauta mai kina na leqa vei keimami?+ O Jiova ena kauta yani vei iko na leqa ena siga nikua.” Era qai vakaviriki koya ena vatu na Isireli taucoko,+ oti era vakamai ratou ena bukawaqa.+ O koya gona, era vakaviriki ratou kece ena vatu.
26 Oti era binia e delana e dua na ibinibini vatu levu, se tu ga me yacova mai na siga qo. E mani ruru na cudru katakata i Jiova.+ Oya na vuna e vakatokai kina na vanua oya me Buca o Akori* me yacova na siga qo.
iVakamacala e ra
^ Kena ibalebale “Vanua Keli.”
^ Se “yaloqaqa.”
^ Oya ena tokalau.
^ Se “vakanadakuya.”
^ Kena ibalebale “Leqa, Cemuri.”
