Josua 8:1-35
8 E kaya sara o Jiova vei Josua: “Kua ni rere se domobula.+ Mo kauti ira kece na tamataivalu moni lako cake moni valuti Ai. Raica, au sa soli tui Ai vei iko, o ira na nona tamata, na nona koro, kei na nona vanua.+
2 Mo vakayacora vei Ai kei na kena tui na ka ga o cakava vei Jeriko kei na kena tui,+ ia moni taura na itokinivalu kei na kena manumanu me nomuni. Moni toka vuni ena daku ni koro.”
3 E lako cake sara o Josua kei ira kece na tamataivalu mera valuti Ai. E digitaka o Josua e 30,000 na tamata qaqa qai talai ira yani ena bogi.
4 E tukuna vei ira na ivakaro qo: “Raica, moni toka vuni ga ena daku ni koro. Moni kua ni yawaka na koro, moni vakarau kece tu.
5 O yau kei ira kece na tamata era tiko vata kei au keimami na toro volekata na koro, ia nira lako mai mera valuti keimami me vaka ga e liu,+ keimami na drovaki ira.
6 Nira cicimuri keimami mai, keimami na vagolei ira tani mai na koro, era na kaya, ‘Era drovaki keda me vaka ga e liu.’+ Keimami na qai drovaki ira.
7 Oti qori moni duri mai na vanua oni toka vuni kina moni valuta na koro, o Jiova na nomuni Kalou ena solia vei kemuni.
8 Ni oni ravuta oti ga na koro moni vakama sara ena bukawaqa.+ Moni vakayacora me vaka na vosa i Jiova. Raica, qo na ka au vakaroti kemuni kina.”
9 Oti e talai ira o Josua mera lako yani ena vanua mera toka vuni kina, era lai tu ena kedrau maliwa o Peceli kei Ai, oya ena ra kei Ai, ia o Josua e moce vata kei ira na tamata ena bogi oya.
10 E yadra sara vakamataka o Josua me kumuni ira na sotia qai liutaki ira i Ai, o koya kei ira na qase ni Isireli.
11 Era lako cake kece na tamataivalu+ era tiko vata kei koya ena mata ni koro. Era keba ena vualiku kei Ai, ni toka na buca ena kedra maliwa kei Ai.
12 E kauta sara e rauta ni 5,000 na tamata qai tukuna mera toka vuni+ ena kedrau maliwa o Peceli+ kei Ai ena ra ni koro.
13 Era mani vakaduria na tamata na mataivalu levu ena vualiku ni koro,+ era tiko ena ra ni koro+ o ira na toka vuni, qai lako o Josua ena bogi oya ena lomadonu ni buca.
14 Ni raica ga qori na tui Ai, e vakusakusa yani o koya kei ira na lewenikoro ena matakalailai mera lai valuti ira na Isireli ena dua na vanua e laurai vinaka kina na buca dravuisiga. Ia e sega ni kila o koya nira toka vuni eso ena daku ni koro mera valuti koya.
15 Nira vala yani na lewe i Ai e qai dro o Josua kei ira kece na Isireli e gaunisala donuya na vanua talasiga.+
16 Era mani kacivi na tamata kece era tiko ena koro mera cicimuri ira, era cicimuri Josua sara ra qai vagolei tani mai na koro.
17 E sega tale ni dua e vo e Ai kei Peceli me sega ni cicimuri Isireli. Era dolava tu ga na koro mera cicimuri Isireli.
18 E kaya o Jiova vei Josua: “Mo dodoka i Ai na moto e tiko e ligamu+ niu sa solia vei iko na koro.”+ E mani dodoka o Josua na moto e tiko e ligana ina koro.
19 Ena gauna ga e dodoka kina na ligana era duri totolo mai na toka vuni, era cici yani ena lomanikoro mera ravuta. Era vakama sara na koro.+
20 Nira raivuki na lewe i Ai, era raica ni sa kuvu cake i macawa na kubou ni koro, sa sega na nodra kaukaua mera dro ena dua na vanua. Ia o ira na dro tiko ina vanua talasiga era vuki mera valuti ira na cicimuri ira tiko.
21 Ni raica o Josua kei ira kece na Isireli nira sa ravuta na koro o ira na toka vuni, era raica tale ga ni sa kuvu cake na kubou ni koro, era vuki mera valuti ira na lewe i Ai.
22 Era biuta na koro o ira na kena vo mera tavaki ira, era mani tao tu e lomadonu na lewe i Ai, era tu eso na Isireli e yasana qo eso tale e yasana oya, era qai mokuti ira tiko me kua tale ni dua e vo se dro.+
23 Ia era vakabula na tui Ai+ ra qai kauti koya vei Josua.
24 Nira vakamatei ira kece na lewe i Ai o ira na Isireli ena vanua lala, oya ena vanua talasiga era cicimuri ira kina, era bale kece sara ena iseleiwau, era qai lesu kece na Isireli mera ravuti Ai ena iseleiwau.
25 O ira kece era bale ena siga oya, o ira na tagane kei na yalewa era le 12,000, o ira kece na lewe i Ai.
26 E sega ni vakasuka o Josua na ligana e dodoka kina na moto+ me vakarusai ira kece mada na lewe i Ai.+
27 Ia era kauta na Isireli na manumanu kei na itokinivalu ni koro oya me nodra, me vaka ga e vakaroti Josua kina o Jiova.+
28 E qai vakamai Ai o Josua e cakava me ibinibini benu me tawamudu,+ e tu ga me yacova mai na siga qo.
29 E vakaliligi tui Ai ena kau* me yacova na yakavi, ni vakarau dromu na siga e qai vakarota o Josua me kau sobu mai na yagona ena kau.+ Era mani biuta ena matamatanikoro ra qai binia e delana e dua na ibinibini vatu levu, se tu ga me yacova mai na siga qo.
30 Ena gauna qori e tara o Josua e dua na icabocabonisoro vei Jiova na Kalou ni Isireli e Ulu i Ipali,+
31 me vaka e vakaroti ira kina na Isireli o Mosese na tamata i Jiova, e volai ena ivola ni Lawa+ e vola o Mosese: “Na icabocabonisoro e caka ena vatu e sega ni ta ena iyaya kaukamea.”+ Era cabora kina na isoro kama vei Jiova kei na isoro ni veiyaloni.+
32 E qai vola o koya ena vatu na ilavelave ni Lawa+ e vola o Mosese e matadra na Isireli.+
33 O ira kece na Isireli, na nodra qase, na nodra turaga, kei na nodra turaganilewa era duri ena yasa ruarua ni Kato e matadra na bete era Livai era laveta tiko na kato ni veiyalayalati i Jiova. Era tiko tale ga e kea na vulagi kei ira na itaukei.+ E dua na kena veimama era duri tu ena mata ni Ulu i Kirisimi, e dua tale na kena veimama ena mata ni Ulu i Ipali+ (me vaka ga e vakarota e liu o Mosese na tamata i Jiova),+ mera vosa vakalougatataki ira na lewe i Isireli.
34 Oti oya e wilika i cake na vosa kece ni Lawa,+ na vosa ni veivakalougatataki+ kei na itotogi+ me vaka e volai kece tu ena ivola ni Lawa.
35 E sega ni dua na vosa ena ka kece e vakarota o Mosese me sega ni wilika o Josua e matadra na ivavakoso e Isireli,+ wili kina o ira na yalewa kei ira na gone kei ira na vulagi+ era tiko* vata kei ira.+
