Josua 9:1-27
9 Nira rogoca ga na tui kece era tiko ena ra ni Joritani+ na ka e yaco, o ira na tiko ena veiulunivanua, ena Sefila, ena baravi kece ena Wasa Levu,*+ kei na mata i Lepanoni, o ira na Itaiti, o ira na Amoraiti, o ira na kai Kenani, o ira na Perisaiti, o ira na Aivaiti, kei ira na Jepusaiti,+
2 era tovata mera valuti Josua kei Isireli.+
3 Era rogoca tale ga na lewe i Kipioni+ na ka e cakava o Josua vei Jeriko+ kei Ai.+
4 Era mani qaseqasetaka na ka era cakava, era tawana na kedra ena taga kakadresudresu me vodo ena nodra asa, kei na taganiwaini madra e kadresu qai cula,
5 era vakaivava kabasu botani, era vakaisulu madra tale ga. Na kedra madrai kece e mamaca, e kavuru.
6 Era qai lako yani vei Josua ena keba e Kilikali,+ era kaya vua kei ira na Isireli: “Keimami lako sara mai ena dua na vanua yawa. Ia qo meda veiyalayalati mada.”
7 Era kaya na Isireli vei ira na Aivaiti:+ “E kena irairai ni oni tiko volekati keimami. Me keimami veiyalayalati vakacava kei kemuni?”+
8 Era kaya sara vei Josua: “O keimami qo na nomuni tamata.”*
E kaya vei ira o Josua: “O cei o kemuni, oni lako mai vei?”
9 Era qai kaya vua: “Keimami lako mai na nomuni tamata ena dua na vanua yawa+ ena vuku ni yaca i Jiova na nomuni Kalou, ni keimami rogoca na kena irogorogo kei na ka kece e cakava e Ijipita+
10 kei na ka kece e vakayacora vei rau na nodra tui na Amoraiti erau tiko ena tai* ni Joritani, o Tui Sioni+ mai Esiponi kei Tui Oki+ mai Pasani e tiko e Aseteroci.
11 Era kaya gona vei keimami na neimami qase kei ira kece ena neimami vanua, ‘Moni kauta na kemuni ena ilakolako moni lai tavaki ira. Moni tukuna vei ira: “O keimami na nomuni tamata,+ ia qo meda veiyalayalati mada.”’+
12 A katakata tu na keimami madrai qo ni keimami kauta mai na neimami vale ena siga keimami lako mai kina vei kemuni. Ia qo oni raica ni sa mamaca tu qai kavuru.+
13 E vou na taganiwaini qo ena gauna keimami tawana kina, ia qo sa kabasu.+ Sa madra na neimami isulu, sa yavu tale ga na neimami ivava ena neimami ilakolako balavu.”
14 Era taura* sara na Isireli eso na kedra, ia era sega ni tarogi Jiova.+
15 E mani veiyaloni kei ira o Josua+ e veiyalayalati tale ga kei ira mera bula, qori na ka era bubuluitaka vei ira na turaga ni isoqosoqo.+
16 Oti e tolu na siga na nodra veiyalayalati, era qai rogoca nira tiko voleka ga ena nodra yasayasa.
17 Era biubiu sara na Isireli mera lako ina nodra koro ena ikatolu ni siga, na nodra koro o Kipioni,+ o Kifira, o Pieroci, kei Kiriaci-jiarimi.+
18 Era sega ni valuti ira o ira na Isireli, nira sa bubului oti vei ira o ira na turaga ni isoqosoqo ena yaca i Jiova+ na Kalou ni Isireli. E qai vosakudrukudrutaki ira na turaga na isoqosoqo taucoko.
19 Era kaya na turaga vua na isoqosoqo taucoko: “Keimami sa bubului oti vei ira ena yaca i Jiova na Kalou ni Isireli, e sega ni dodonu meda vakamavoataki ira.
20 Qo na ka eda na cakava: Eda na vakabulai ira meda kua ni cudruvi kina ena vuku ni neimami bubului vei ira.”+
21 Era kaya tale na turaga: “Mera bula, mera dau cabuka, mera dau takiwai vei ira na isoqosoqo taucoko.” Qo na ka era yalataka vei ira o ira na turaga.
22 E kacivi ira mai o Josua qai kaya vei ira: “Na cava oni lawakitaki keimami kina ni oni kaya, ‘Keimami lako sara mai ena dua na vanua yawa,’ ni oni tiko maliwai keimami ga?+
23 Tekivu nikua me lako yani oni sa cudruvi,+ oni na qarava tiko ga na itavi ni bobula moni dau cabuka, moni dau takiwai ena vale ni noqu Kalou.”
24 Era sauma vei Josua: “E tukuni vei keimami na nomu tamata ni o Jiova na nomu Kalou e vakaroti Mosese na nona tamata me solia vei kemuni na vanua taucoko, me vakawabokotaki ira tale ga na lewenivanua taucoko e matamuni.+ Dua na ka neimami rerevaki kemuni,+ oya na vuna keimami cakava kina qo.+
25 Keimami sa tu qo ena nomu loloma.* Mo cakava vei keimami na ka o nanuma ni vinaka, e dodonu.”
26 Qori na ka e qai cakava vei ira, e vakabulai ira mai na ligadra na Isireli, era sega ni vakamatei ira.
27 E lesi ira ena siga oya o Josua mera dau cabuka mera dau takiwai vei ira na isoqosoqo,+ vaka kina ena icabocabonisoro i Jiova ena vanua e digitaka o koya,+ era cakava tiko qori me yacova na siga qo.+
iVakamacala e ra
^ Oya na Mediterranean.
^ Se “bobula.”
^ Oya ena tokalau.
^ Se “dikeva.”
^ Ipe., “ligamu.”
