Vei Ira mai Kalatia 1:1-24
1 O yau o Paula na yapositolo, era sega ni lesi au na tamata, e sega ni vakatamata na itavi tale ga qo, ia erau lesi au sara ga o Jisu Karisito+ kei na Kalou na Tamada,+ o koya e vakaturi Jisu mai na mate,
2 kei ira kece na taciqu era tiko qo, vei ira na ivavakoso e Kalatia.
3 Me nomuni mada ga na loloma soli wale kei na vakacegu ni Kalou na Tamada, kei na Turaga o Jisu Karisito.
4 E soli koya ena vuku ni noda ivalavala ca+ me vakabulai keda mai na veika ca ni vuravura qo,*+ me vaka na loma ni noda Kalou na Tamada,+
5 me vakalagilagi o koya me tawamudu. Emeni.
6 Au kurabui ena totolo ni nomudou vuki tani vei koya a kacivi kemuni ena loloma soli wale i Karisito, moni vakarorogo ina dua tale na itukutuku vinaka.+
7 Sega ena vuku ni dua tale na itukutuku vinaka, eso ga era vakaleqai kemuni tiko,+ era via vakatanitaka na itukutuku vinaka me baleti Karisito.
8 Ke dua mada ga vei keimami se dua na agilosi mai lomalagi e tukuna vei kemuni e dua na itukutuku e duidui mai na itukutuku vinaka keimami a tukuna vei kemuni, me cudruvi o koya.
9 Me vaka keimami sa tukuna oti, au tukuna tale qo, o koya e tukuna vei kemuni e dua na itukutuku vinaka e duidui mai na itukutuku oni vakabauta, me cudruvi o koya.
10 Vakaevei, au saga tiko me vakadonui au na tamata se na Kalou? Seu saga tiko meu vakamarautaka na tamata? Keu vakamarautaka tiko ga na tamata, au na sega ni dauveiqaravi i Karisito.
11 Au vinakata moni kila raveitacini, ni sega ni vakatamata na itukutuku vinaka au tukuna vei kemuni,+
12 e sega ni solia vei au na tamata, se meu vulica, e vakatakila ga vei au o Jisu Karisito.
13 Oni sa rogoca na ka au dau cakava niu se lotu vakaJiu,+ niu dau vakacacana sara vakalevu na ivavakoso ni Kalou meu vakarusa,+
14 niu uasivi ena lotu vakaJiu ni vakatauvatani kei ira e levu na kainoqu keimami tabavata, au qai gumatuataka na nodra ivakavuvuli na noqu qase.+
15 Ia na Kalou, o koya e tawasei au mai na katonigone i tinaqu, e kacivi au tale ga ena nona loloma soli wale,+ e nanuma ni vinaka
16 meu vakatakila na Luvena, meu tukuna na itukutuku vinaka me baleti koya ina veimatanitu,+ au sega sara ni lai kere ivakasala vua e dua tale.*
17 Au sega tale ga ni lako cake i Jerusalemi vei ira na yapositolo era lesi e liu vei au, ia au lako ga i Arapea, au qai lesu tale i Tamasiko.+
18 Oti e tolu na yabaki, au lako cake i Jerusalemi+ meu sikovi Kifa,*+ au mani tiko kei koya me 15 na siga.
19 Au sega ni raica e dua tale na yapositolo, o Jemesa+ ga, na tacina na Turaga.
20 Ena mata ni Kalou, au sega ni lasutaka na veika au vola yani qo vei kemuni.
21 Oti ya, au lako sara ina veivanua e Siria kei Silisia.+
22 Era sega ni kilai au vinaka na ivavakoso vaKarisito e Jutia,
23 era dau rogoca ga: “Na turaga e dau vakacacani keda+ e sa tukuna tiko qo na itukutuku vinaka me baleta na vakabauta a vakarusa e liu.”+
24 Era mani vakalagilagia na Kalou ena vukuqu.
iVakamacala e ra
^ Se “ni itabagauna ca.” Raica na iVakamacala ni Vosa.
^ Kir., “lewe kei na dra.”
^ Kilai tale ga me o Pita.
