Vei Ira mai Kalatia 2:1-21
2 Oti e 14 na yabaki au lako tale i Jerusalemi kei Panapasa,+ au kauti Taito tale ga.+
2 Au lako cake ni a vakatakilai vei au meu lako. Au mani vakaraitaka vei ira na itukutuku vinaka au vunautaka tiko ina veimatanitu. E caka vakavuni qo e matadra na dokai ena ivavakoso, me vakadeitaka ni sega ni ka wale na cakacaka vakaitalatala au vakayacora tiko, se na kena au sa vakayacora oti.
3 O Taito mada ga+ e kai Kirisi qai tiko vata kei au, ia e sega ni vakasaurarataki me cili.+
4 Ia e basika qori ena nodra lako lo mai na tacida lasu ina ivavakoso,+ era curu mai vaka na yamata mera kila na veika me baleta na galala+ eda vakila nida tisaipeli i Karisito Jisu, me rawa nira vakabobulataki keda.+
5 Keitou sega ni bau vakamalumalumu vei ira qori,+ keitou sega mada ga ni via cakava vakalekaleka,* me dei tiko kina vei kemuni na dina ni itukutuku vinaka.
6 E sega ni dua na ka vei au na nodratou itutu taumada o ratou na nanuma ni ratou dua na ka,+ ni sega ni dau raica na Kalou na irairai e sau. O ratou na tagane dokai qori eratou sega ni tukuna vei au e dua na vakasama vou.
7 Ia ni ratou raica niu lesi meu tukuna na itukutuku vinaka vei ira na sega ni cili,+ me vaka nona lesi o Pita vei ira na cili—
8 ni o koya a solia vei Pita na kaukaua me yapositolo vei ira na cili, e solia tale ga vei au na kaukaua meu yapositolo vei ira na veimatanitu+—
9 io, ni ratou kila na loloma e soli wale vei au+ o iratou na duru ni ivavakoso, o Jemesa,+ o Kifa* kei Joni, eratou dodoka mai na ligadratou imatau me ratou lululu vei keirau kei Panapasa+ ni ratou vakadonuya me keirau lako ina veimatanitu, ia o iratou vei ira na cili.
10 E dodonu me keitou nanumi ira tale tiko ga na tacida dravudravua. Na ka sara ga qo au saga tale ga meu cakava.+
11 Ia ni lako mai Anitioki+ o Kifa,*+ au tukuna sara ga e matana ni cala na ka e cakava.
12 Nira se bera ni yaco mai eso na tagane era itokani i Jemesa,+ e dau nona ivakarau me kanavata kei ira na lewe ni veimatanitu,+ ia nira yaco mai e biubiu sara, e vakayawaki koya ni rerevaki ira na tokona na cili.+
13 Era tokoni koya tale ga ena veivakaisini ya na vo ni Jiu, era mani rawai Panapasa.
14 Ia niu raica nira sega ni lakovata tiko kei na ka dina me baleta na itukutuku vinaka,+ au kaya vei Kifa* e matadra kece: “Ni o Jiu o qai bula me vakataki ira na veimatanitu, o sega ni bula me vakataki ira na Jiu, o qai tukuna vakacava vei ira na lewe ni veimatanitu mera bula me vaka na nodra ivalavala na Jiu?”+
15 Eda Jiu vakayago, eda sega ni lewe ni veimatanitu ivalavala ca,
16 eda kila ni na sega ni okati e dua me yalododonu ni muria na lawa, ena vuku ga ni nona vakabauti+ Jisu Karisito.+ O keda tale ga na vakabauti Karisito Jisu eda okati meda yalododonu ena vuku ni noda vakabauti Karisito, sega ni noda muria na lawa, ni sega ni okati e dua* me yalododonu ni muria na lawa.+
17 Ia nida saga meda okati meda yalododonu ena vuku i Karisito, eda sa okati tale ga meda ivalavala ca, e vakaevei, sa dauveiqaravi ni ivalavala ca o Karisito? Me kua sara ni yaco qori!
18 Keu tara tale na veika au sa talaraka, au sa vakaraitaka sara ga niu beca na lawa.
19 Ia o yau, au mate ena noqu muria na lawa.+ Ena vuku ni ka qo, au bula kina vua na Kalou.
20 Au sa lauvako vata kei Karisito ena kau.+ Au sa sega ni qai bula tiko,+ ia na Karisito ga e bula qai duavata kei au. Na noqu bula tiko qo e rawa ga ena noqu vakabauta na Luve ni Kalou,+ o koya e lomani au, e solia tale ga nona bula ena vukuqu.+
21 Au sega ni vakawaletaka na loloma soli wale ni Kalou,+ ke vakadonui e dua ni muria na lawa, sa na tawayaga na mate i Karisito.+
iVakamacala e ra
^ Kir., “dua na aua.”
^ Kilai tale ga me o Pita.
^ Kilai tale ga me o Pita.
^ Kilai tale ga me o Pita.
^ Kir., “lewe.”
