iVola Vei Ira mai Kolosa 3:1-25
3 Ia ke oni vakaturi vata kei Karisito,+ ni vakaliuca tiko ga na veika mai cake, na vanua sa vakatikori kina o Karisito ena ligaimatau ni Kalou.+
2 Ni vakasamataka tiko ga na veika mai cake,+ ni kua ni vakasamataka na veika ni vuravura.+
3 Oni a mate, ia na nomuni bula sa vunitaki vata kei Karisito me vaka na loma ni Kalou.
4 Ni sa na vakatakilai mai o Karisito, o koya na noda bula,+ oni na qai vakatakilai tale ga ena nomuni vakalagilagi vata kei koya.+
5 Moni vakamatea gona na gagadre ni veitikiniyagomuni+ vakavuravura, na veiyacovi tawadodonu,* na ivalavala dukadukali, na garogaro vakasisila,+ na gagadre ca, kei na kocokoco ni okati me qaravi matakau.
6 Na ka kece qori ena waqa kina na cudru ni Kalou.
7 Qori tale ga na ivalavala oni dau cakava tu ena nomuni bula e liu.+
8 Ia moni biuta tani na ka kece qo: na yalokatakata, na cudrucudru, na ivakarau ca,+ na vosavakacaca,+ kei na vosa vakasisila+ mai gusumuni.
9 Ni kua ni veilasutaki.+ Ni luvata tani na tamata makawa+ kei na kena ivalavala,
10 ni sulumaka na itovo vou,+ e vakavoui tiko ga ena kilaka dodonu me salavata kei na iyaloyalo i koya e bulia.+
11 E sega tale ni kilai kina na Jiu se kai Kirisi, na cili se sega ni cili, kaitani, Siciani,* bobula, se tamata galala, ni sa vakaduavatataka na ka kece o Karisito.+
12 O koya gona, ni oni nona digitaki na Kalou,+ oni savasava qai lomani, moni vakaisulu ena yalo ni veikauaitaki dina,+ yalololoma, yalomalumalumu,+ yalomalua,+ kei na vosovoso.+
13 Moni dau yalorawarawa, ni dau veivosoti tale ga vakarawarawa+ ke dua e didivaka e dua na ka vua e dua tale.+ Moni dau veivosoti me vaka ga na nona vosoti kemuni vakarawarawa o Jiova.*+
14 Ia me kena ilutua, moni sulumaka na loloma+ ni qo na ivau vinaka duadua ni duavata.+
15 Me lewa tale ga na lomamuni na vakacegu i Karisito,+ ni oni a kacivi kina moni dua ga na yago. Me laurai na nomuni vakavinavinaka.
16 Me tiko vei kemuni na vosa i Karisito moni vuku vakalevu kina. Ni veivakavulici, ni veivakayaloqaqataki tiko ga ena same,+ ena sere ni vakacaucau vua na Kalou, ena sere vakayalo e salavata kei na vakavinavinaka, ni sere vei Jiova* mai vu ni lomamuni.+
17 Na ka kece oni tukuna se cakava, ni cakava kece ena yaca ni Turaga o Jisu, me vakavinavinakataki kina na Kalou na Tamada.+
18 Kemuni na yalewa vakawati, ni vakarorogo vei ira na watimuni,+ ni dodonu mera cakava qo na imuri i Karisito.
19 Kemuni na tagane vakawati, ni lomani ira tiko ga na watimuni,+ ni kua ni cudruvi ira vakaukaua.*+
20 Kemuni na gone, ni talairawarawa vei ira na nomuni itubutubu ena ka kece,+ ni marautaka qori na Turaga.
21 Kemuni na tama, ni kua ni vakacudrui ira na luvemuni,+ de ra yalolailai kina.
22 Kemuni na bobula, ni talairawarawa vei ira na nomuni iliuliu vakatamata,+ kua ni cakava wale ga vakarairai mera vinakati kemuni kina, ia me vu dina mai lomamuni na ka oni cakava me salavata kei na nomuni rerevaki Jiova.*
23 Na ka kece oni cakava, ni cakava ena nomuni vinaka taucoko me vaka oni cakava tiko vei Jiova,*+ sega vua na tamata,
24 ni oni kila ni o Jiova* ga ena vakaicovitaki kemuni ena nomuni ivotavota.+ Moni bobula ni Turaga, o Karisito.
25 O koya e caka cala ena sauti koya ga na cala ni ka e cakava,+ ni sega ni dau veivakaduiduitaki na Kalou.+
iVakamacala e ra
^ Kirisi, por·neiʹa. Raica na iVakamacala ni Vosa.
^ “Siciani,” e kena ibalebale tale ga “na matatamata butobuto duadua.”
^ Se “ni voravora vei ira.”
