iVola Vei Ira mai Kolosa 4:1-18
4 Kemuni na nodra iliuliu na bobula, ni cakava vei ira na nomuni bobula na ka e dodonu kei na ka e veiganiti, ni oni kila ni tiko tale ga na nomuni iLiuliu mai lomalagi.+
2 Ni gumatua tiko ena masu+ moni yadra tiko ga kina salavata kei na vakavinavinaka.+
3 Ni masulaki keitou tale ga+ me dolava na Kalou na katuba me keitou vunautaka kina na vosa, me keitou tukuna tale ga na ka vuni tabu me baleti Karisito, qori na vu ni noqu vesu,+
4 meu tukuna yani vakamatata me vaka e dodonu meu cakava.
5 Moni lewa vakayalomatua na nomuni ilakolako ni oni maliwai ira e taudaku, ni vakayagataka vinaka na nomuni gauna.*+
6 Moni vosa ena yalovinaka ena gauna kece, me vakamasima,+ moni kila kina na ka moni tukuna vua na tamata yadua.+
7 Ena qai tukuna vei kemuni na itukutuku kece me baleti au o Tikiko+ na taciqu lomani, na italatala yalodina, noqu itokani dauveiqaravi ena Turaga.
8 Au talai koya tiko yani vei kemuni moni kila kina na ka e baleti keitou, me vakaceguya tale ga na lomamuni.
9 E lako tiko yani kei Onisimo+ na taciqu lomani qai yalodina, e dua ga vei kemuni o koya. Erau na vakamacalataka vei kemuni na ka kece eke.
10 E loloma tu yani vei kemuni o Arisitako,+ o koya keirau vesu vata tiko, kei Marika+ na wekai Panapasa, (o koya au tukuna moni ciqoma+ ke lako yani vei kemuni),
11 kei Jisu e dau kilai tale ga me o Jusitu, o iratou qo eratou cili. O iratou ga qo eratou dau cakacaka vata kei au ena ka e vauca na Matanitu ni Kalou, eratou dau vukei au, eratou dau vakacegui* au tale ga.
12 E loloma yani vei kemuni o Epafira,+ e dua tale ga vei kemuni o koya, e dauveiqaravi i Karisito Jisu. E dau gumatua ni masulaki kemuni moni tudei me yacova na iotioti, moni nuidei tale ga ena ka me baleta na loma ni Kalou.
13 Au vakadinadinataka ni dau sasaga ena vukumuni, ena vukudra tale ga mai Leotisea, kei ira mai Aiarapoli.
14 E loloma yani vei kemuni o Luke,+ na vuniwai lomani, kei Timasa.+
15 Au loloma yani vei ira na veitacini e Leotisea, vei Nimifa na ganeda, kei na ivavakoso e dau soqoni e nona vale.+
16 Ni oni sa wilika oti na ivola qo, ni raica me wiliki tale ga+ ena ivavakoso e Leotisea. Moni wilika tale ga na nodra ivola mai Leotisea.
17 Qai kaya tale ga vei Akipo:+ “Qarava vinaka na cakacaka vakaitalatala e solia vei iko na Turaga, mo vakayacora sara.”
18 O yau o Paula, na iloloma kece qo au vola sara ga e ligaqu.+ Moni nanumi au niu se vesu tiko ga.+ Me tiko mada ga kei kemuni na loloma soli wale ni Kalou.
