Lako Yani 13:1-22
13 E vosa tale vei Mosese o Jiova, e kaya:
2 “Me vakatabui* vei au na ulumatua tagane kece vei ira na Isireli. E noqu na imatai ni tagane e sucu,* se mani tamata se manumanu.”+
3 E qai kaya o Mosese vei ira na tamata: “Moni nanuma na siga qo oni biuti Ijipita mai kina,+ mai na vale ni veivakabobulataki, ni a kauti kemuni tani mai eke o Jiova ena ligana qaqa.+ Me kua gona ni laukana e dua na ka e vakaleveni.
4 Oni na biubiu tiko ena siga qo, ena vula o Epipi.*+
5 Ni sa kauti iko yani o Jiova ina nodra vanua na kai Kenani, na Itaiti, na Amoraiti, na Aivaiti kei na Jepusaiti,+ na vanua a bubuluitaka o koya vei ira na tukamuni me solia vei iko,+ na vanua e drodro kina na sucu kei na oni,+ mo na dau vakayacora na ivakananumi qo ena vula qo.
6 Me vitu na siga mo kania tiko kina na madrai sega ni vakaleveni,+ me qai dua na soqo vei Jiova ena ikavitu ni siga.
7 Ena laukana na madrai sega ni vakaleveni me vitu na siga,+ me kua ni laurai vei iko e dua na ka e vakaleveni,+ me kua tale ga ni laurai ena nomu veiyasana kece* na falawa wiwi sa bali.
8 Mo qai tukuna vua na luvemu tagane ena siga oya, ‘Qo e baleta na ka e cakava ena vukuqu o Jiova niu biuti Ijipita mai.’+
9 Vei iko, qo ena vaka na ivakatakilakila e ligamu kei na ivakananumi e yadremu,*+ me rawa ni tu ga kina e gusumu na lawa i Jiova, ni a kauti iko laivi mai Ijipita o Jiova ena ligana qaqa.
10 Mo dau muria tiko na lawa qo ena kena gauna lokuci e veiyabaki.+
11 “Ni sa kauti iko yani o Jiova ina nodra vanua na kai Kenani, na vanua a bubuluitaka vei iko kei ira na tukamuni me soli vei iko.+
12 mo solia sara ga vei Jiova na ulumatua tagane kece,* wili kina na imatai ni nomu luve ni manumanu era sucu mai. E nei Jiova na ka tagane.+
13 Na imatai ni nomu luve ni asa kece mo volia lesu ena dua na sipi, ke o sega ni volia lesu, mo qai musuka na domona. Mo volia lesu tale ga na luvemu tagane ulumatua kece.+
14 “Ke mani tarogi iko na luvemu tagane ena dua na gauna e muri, ‘Na cava na ibalebale ni ka qo?’ mo qai kaya vua, ‘E kauti keimami tani mai Ijipita o Jiova ena ligana qaqa, mai na vale ni veivakabobulataki.+
15 Ni yalokaukaua tiko ga o Fero ni bese ni laiva me keimami lako,+ e qai vakamatea o Jiova na ulumatua kece ena vanua o Ijipita, mai na ulumatua ni tamata yaco sara ina imatai ni manumanu era sucu.+ Oya na vuna au cabora tiko kina vei Jiova na ka tagane kece era sucu mai e liu,* au qai volia lesu na noqu ulumatua tagane kece.’
16 Qo ena vaka tu na ivakatakilakila ena ligamu kei na iukuuku ena yadremu,*+ ni a kauti keda laivi mai Ijipita o Jiova ena ligana qaqa.”
17 Ena gauna e vakatalai ira kina na tamata o Fero, e sega ni tuberi ira yani na Kalou ena gaunisala ina nodra vanua na kai Filisitia, veitalia ga na kena voleka. Ni kaya na Kalou: “De ra qai veisautaka na nodra vakasama na tamata nira sotava na ivalu ra qai lesu i Ijipita.”
18 E mani dusimaki ira na Kalou mera wavoki ena gaunisala ina vanua talasiga donuya na Wasa Damudamu.+ Ia era tuva vakamataivalu* na Isireli nira lako cake mai na vanua o Ijipita.
19 E kauta tale ga kei koya o Mosese na sui i Josefa, ni a vakavuna o Josefa mera cakava e dua na bubului bibi na luvei Isireli: “Ena kauaitaki kemuni dina mai na Kalou, moni qai kauta cake yani kei kemuni na suiqu ni oni lako laivi mai ke.”+
20 Era biubiu mai Sukoci, ra qai keba e Ecami, ena iyalayala ni vanua talasiga.
21 E liu tiko vei ira o Jiova ni vakayagataka na duru o ena siga me dusimaki ira ena ilakolako,+ kei na duru bukawaqa ena bogi me solia mai na rarama, mera lako voli kina ena siga, ena bogi tale ga.+
22 E sega ni dau toso tani na duru o mai na matadra na tamata ena siga, se na duru bukawaqa ena bogi.+
iVakamacala e ra
^ Ipe., “na ulumatua kece e dolava na katonigone yadua.”
^ Se “wasei tani.”
^ Ipe., “iyalayala ni vanua.”
^ Ipe., “e maliwa ni matamu.”
^ Ipe., “o ira kece era dolava na katonigone.”
^ Ipe., “na ka kece e dolava na katonigone.”
^ Ipe., “ena maliwa ni matamu.”
^ “Tuva vakamataivalu,” me vaka na mataivalu ni wasei vakalima, o ira ena iyatu e liu kei ira na iyatu e muri, o ira e lomadonu kei na tutuna ruarua.
