Lako Yani 29:1-46
29 “Qo na ka mo cakava vei ratou mo vakatabui ratou kina me ratou veiqaravi vakabete vei au: Taura mai e dua na bulumakau tagane gone, rua na tamanisipi vinaka,+
2 na madrai sega ni vakaleveni, na madrai sega ni vakaleveni e vakawaiwaitaki qai buli vaka na mama, kei na madrai mamare sega ni vakaleveni e boro ena waiwai.+ Mo cakava qori mai na falawa witi vinaka sara
3 qai biuta ena dua na basikete, oti me cabori vata ena basikete,+ na bulumakau tagane kei rau na tamanisipi.
4 “Mo kauti Eroni yani kei ratou na luvena tagane ena icurucuru ni valelaca ni veitavaki,+ qai vui ratou ena wai.+
5 Mo kauta na isulu+ qai vakaisulutaki Eroni ena isulu balavu, na isulu balavu tabaleka ni efoti, na efoti, kei na taga ni lomasere, mo qai vesuka wavoki na beleti tali* ni efoti me dei e tolona.+
6 Mo biuta e uluna na ivauniulu, qai biuta ena ivauniulu na ivakatakilakila tabu ni yalayala,+
7 mo qai taura na waiwai ni veilumuti,+ mo livia e uluna qai lumuti koya.+
8 “Mo kauti ratou na luvena tagane mai liu qai vakaisulutaki ratou ena isulu balavu+
9 qai vauca vei ratou na ivaunitolo, o Eroni kei ratou na luvena tagane, vakadarama vei ratou na ivauniulu, me nodratou na itavi vakabete, me lawa tudei.+ Qo na ivalavala ni nomu buli Eroni kei ratou na luvena me ratou veiqaravi vakabete.*+
10 “Mo kauta yani na bulumakau tagane ena mata ni valelaca ni veitavaki, me ratou qai tabaka na ulu ni bulumakau tagane ena ligadratou o Eroni kei ratou na luvena tagane.+
11 Vakamatea na bulumakau tagane ena mata i Jiova, ena icurucuru ni valelaca ni veitavaki.+
12 Taura eso na dra ni bulumakau tagane ena iqaqaloniligamu qai boroya ena ileu ni icabocabonisoro,+ mo qai livia na dra kece e vo ena vu ni icabocabonisoro.+
13 Qai taura na uro kece+ e kabita na wawa, na uro e dela ni yate, na rua na ivi kei na kedrau uro e cake, qai vakama me kubou cake ena icabocabonisoro.+
14 Ia na lewe ni bulumakau tagane, na kulina kei na dena, mo vakama ena bukawaqa ena taudaku ni keba. Qo na isoro ni ivalavala ca.
15 “Mo qai kauta e dua na tamanisipi, me ratou tabaka na ulu ni tamanisipi+ ena ligadratou o Eroni kei ratou na luvena.
16 Vakamatea na tamanisipi, taura na kena dra qai kureitaka wavolita na icabocabonisoro.+
17 Musumusuka na tamanisipi, qai savata na kena wawa+ kei na yavana, oti tuvana na tikina kece kei na uluna.
18 Mo vakama na tamanisipi taucoko, me kubou ena icabocabonisoro. E isoro kama vei Jiova, me talei* na kena iboi.+ E isoro e cabori ena bukawaqa vei Jiova.
19 “Oti mo qai kauta na tamanisipi adua, me ratou tabaka na ulu ni tamanisipi ena ligadratou o Eroni kei ratou na luvena.+
20 Vakamatea na tamanisipi, taura eso na kena dra qai boroya ena bele ni daliga i Eroni imatau kei na belenidaligadratou imatau na luvena tagane, ena idovidovinikakana ni ligadratou imatau kei na iqaqalo levu ni yavadratou imatau, qai kureitaka na dra wavolita na icabocabonisoro.
21 Mo qai taura eso na dra ena icabocabonisoro kei na so na waiwai ni veilumuti+ qai kureitaka vei Eroni kei na nona isulu, vei ratou na luvena tagane kei na nodratou isulu, me savasava kina o koya kei na nona isulu, o iratou tale ga na luvena tagane kei na nodratou isulu.+
22 “Kauta mai na uro ni tamanisipi, na buina urouro, na uro e kabita na wawa, na uro e dela ni yate, na rua na ivi kei na kedrau uro e cake,+ kei na yavana imatau, ni qo na tamanisipi ni veibuli.+
23 Kauta tale ga e dua na madrai rauni, e dua na madrai e bali vata kei na waiwai qai buli vaka na mama, kei na dua na madrai mamare mai na basikete ni madrai sega ni vakaleveni e tu ena mata i Jiova.
24 Mo biuta kece qori ena liga i Eroni kei na ligadratou na luvena, mo qai yalovaka me isoro yalovaki ena mata i Jiova.
25 Mo qai kauta laivi mai ligadratou na veika qori, qai vakama ena dela ni isoro kama ena icabocabonisoro, me talei vei Jiova na kena iboi. E isoro e cabori ena bukawaqa vei Jiova.
26 “Mo qai kauta na sarisari ni tamanisipi ni veibuli+ e cabori ena vuku i Eroni, qai yalovaka me isoro yalovaki ena mata i Jiova, ena qai kemu ivotavota.
27 Mo vakatabuya na sarisari ni isoro yalovaki kei na yava ni ivotavota tabu a yalovaki, e kau mai na tamanisipi ni veibuli,+ mai na ka e cabori ena vuku i Eroni kei ratou na luvena tagane.
28 Me qai nei Eroni kei ratou na luvena tagane, me lawa tudei mera vakayacora na Isireli, ni ivotavota tabu, ena qai ivotavota tabu era solia na Isireli.+ E nodra ivotavota tabu vei Jiova mai na nodra isoro ni veiyaloni.+
29 “Na isulu tabu+ nei Eroni era na vakayagataka na luvena tagane+ era taravi koya, nira lumuti ra qai buli mera bete.
30 Na bete e sosomitaki koya vei ratou na luvena tagane qai curu yani ina valelaca ni veitavaki me veiqaravi ena vanua tabu, ena tokara qori me vitu na siga.+
31 “Mo kauta na tamanisipi ni veibuli qai vakasaqara na lewena ena dua na vanua tabu.+
32 Ena kania o Eroni kei ratou na luvena tagane+ na lewe ni tamanisipi kei na madrai e tu ena basikete, ena icurucuru ni valelaca ni veitavaki.
33 Me ratou kania na veika a caka kina na veibuluti ni ratou buli me ratou bete,* ratou qai vakatabui kina. Me kua ga ni kania e dua e sega ni vakadonui,* nira ka tabu.+
34 Ke mani vo me yacova na mataka na lewe ni isoro ni veibuli kei na madrai, mo qai vakama ena bukawaqa na ka e vo.+ Me kua ni laukana ni ka tabu.
35 “Mo cakava va qo vei Eroni kei ratou na luvena tagane me vaka na ka kece au vakarota vei iko. Ena taura e vitu na siga na nomu buli ratou me ratou bete.*+
36 Mo na cabora e veisiga na bulumakau tagane ni isoro ni ivalavala ca me veibuluti, mo qai vakasavasavataka na icabocabonisoro mai na ivalavala ca ni o cakava na kena veibuluti, mo qai lumuta me vakatabui kina.+
37 Ena taura e vitu na siga mo cakava na veibuluti ni icabocabonisoro, mo qai vakatabuya me dua na icabocabonisoro tabu sara.+ Me savasava o koya e tara na icabocabonisoro.
38 “Qo na ka mo cabora ena icabocabonisoro: me rua na luvenisipi tagane yabaki dua e veisiga.+
39 E dua na luvenisipi tagane mo cabora ena mataka, dua tale na luvenisipi tagane ni sa karobo.*+
40 Me cabori vata kei na imatai ni luvenisipi tagane, e dua na ikatini na efa* falawa vinaka sara, e dua na ikava na hini* ni waiwai ni olive vutu, kei na dua na ikava na hini ni waini.
41 O na cabora na ikarua ni luvenisipi tagane ni sa karobo* kei na isoro kakana kei na isoro livi me vaka ga ena mataka. Mo qai cabora ena bukawaqa vei Jiova me talei na kena iboi.
42 Me isoro kama e cabori wasoma ena nomuni itabatamata kece ena icurucuru ni valelaca ni veitavaki ena mata i Jiova, niu na vakaraitaki au e kea vei kemuni meu vosa kina vei iko.+
43 “Au na vakaraitaki au e kea vei ira na Isireli, ena qai vakatabui ena kequ lagilagi.+
44 Au na vakatabuya na valelaca ni veitavaki kei na icabocabonisoro, au na vakatabui Eroni kei ratou na luvena tagane+ me ratou veiqaravi vakabete vei au.
45 Au na vakaitikotiko* ena kedra maliwa na lewe i Isireli, au na qai nodra Kalou.+
46 Era na qai kila sara ga ni o yau o Jiova na nodra Kalou, au a kauti ira tani mai na vanua o Ijipita meu tiko ena kedra maliwa.+ O yau o Jiova na nodra Kalou.
iVakamacala e ra
^ Se “ioro.”
^ Ipe., “vakasinaita na liga i Eroni kei na ligadratou na luvena tagane.”
^ Se “veivakalomavinakataki, malumu.” Ipe., “veivakacegui.”
^ Ipe., “me vakasinaiti na ligadratou.”
^ Ipe., “vulagi,” oya dua e sega ni kawa i Eroni.
^ Ipe., “me vakasinaiti na ligadratou.”
^ Ipe., “maliwa ni rua na yakavi.”
^ Ipe., “maliwa ni rua na yakavi.”
^ Se “tiko kina vakalekaleka.”
