Lako Yani 31:1-18
31 E vosa tale vei Mosese o Jiova, e kaya:
2 “Raica, au sa digitaki* Pisalieli+ na luvei Urei, e luvei Ure mai na yavusa i Juta.+
3 Au na vakasinaiti koya ena yalo ni Kalou, me soli vua na vuku, na yalomatua, kei na kila ni cakacakaniliga kece ga,
4 me baleta na buli iyaya vakamaqosa, na cakacaka ena koula, siliva, kei na kopa,
5 na kena ta kei na kena vakadaberi na vatu,+ kei na caka ni veimataqali iyaya kau.+
6 Au sa lesi Aoliapi+ na luvei Eiisamaki mai na yavusa o Tani me vukei koya, au na biuta na vuku ina lomadra kece na kenadau,* mera cakava kina na ka kece au vakarota vei iko:+
7 na valelaca ni veitavaki,+ na kato ni iVakadinadina+ kei na isogo e delana,+ na iyaya kece ni valelaca,
8 na teveli+ kei na kena iyaya, na itutu ni cina koula dina kei na kena iyaya kece,+ na icabocabo ni ka boivinaka,+
9 na icabocabo ni isoro kama+ kei na kena iyaya kece, na beseni kei na kena itutu,+
10 na isulu era tali vakamatailalai, na isulu tabu nei Eroni na bete, na nodratou isulu na luvena tagane me ratou veiqaravi kina vakabete,+
11 na waiwai ni veilumuti kei na ka boivinaka e dau vakamai ena tikina tabu.+ Mera cakava na ka kece au vakaroti iko kina.”
12 E kaya tale vei Mosese o Jiova:
13 “Vosa vei ira na Isireli qai tukuna vei ira, ‘Moni muria sara ga na noqu siga ni vakacecegu,+ ni qo na ivakatakilakila vei au kei kemuni ena nomuni itabatamata kece, moni kila kina ni o yau o Jiova au vakatabui kemuni.
14 Moni muria na Siga ni Vakacecegu, ni ka tabu vei kemuni.+ O koya ga e beca me vakamatei. Ke mani dua e cakacaka ena siga qori, me muduki laivi* na tamata oya mai na kedra maliwa na nona tamata.+
15 Me ono na siga me caka na cakacaka, ia na ikavitu ni siga e siga ni vakacecegu, me gauna sara ga ni cegu.+ E ka tabu vei Jiova. O koya e cakava e dua na cakacaka ena Siga ni Vakacecegu me vakamatei.
16 Mera muria na Isireli na Siga ni Vakacecegu, mera vakananuma na Siga ni Vakacecegu ena nodra itabatamata kece. Qo na veiyalayalati tudei.
17 Qo na ivakatakilakila tudei vei au kei ira na lewe i Isireli,+ ni a cakava na lomalagi kei na vuravura o Jiova ena ono na siga, ia ena ikavitu ni siga e cava kina nona cakacaka qai vakacegu.’”+
18 Ni vosa oti ga vei koya e Ulu i Saineai, e solia vei Mosese e rua na vatu raraba ni iVakadinadina,+ na vatu raraba e volai ena iqaqaloniliga ni Kalou.+
