Lako Yani 34:1-35
34 E qai kaya vei Mosese o Jiova: “Mo taya e rua na vatu raraba me vaka ga na kena imatai,+ au na qai vola ena vatu raraba+ na vosa a laurai ena imatai ni vatu raraba o vorolaka.+
2 Mo vakarau ena mataka, ni o na cabeta na Ulu i Saineai ena mataka, mo lai duri tu kina e mataqu ena dela ni ulunivanua.+
3 Me kua ni dua e cabe kei iko, me kua tale ga ni laurai e dua ena ulunivanua taucoko. Me kua mada ga ni dua na sipi se bulumakau me kana co ena mata ni ulunivanua oya.”+
4 E mani taya o Mosese e rua na vatu raraba me vaka ga na kena imatai, e yadra vakamataka qai cabeta na Ulu i Saineai me vaka ga e vakarota o Jiova, e qai kauta e ligana e rua na vatu raraba.
5 E qai gole sobu+ mai o Jiova ena o, e mai tu vata kei koya e kea, e qai vakarogoya na yaca i Jiova.+
6 E tasivi tiko e matana o Jiova qai kacivaka: “O Jiova, o Jiova, na Kalou dauyalololoma+ qai dauveinanumi,*+ e berabera ni cudru,+ qai vuabale ena loloma e dei*+ kei na dina,+
7 e vakaraitaka ni dei na nona loloma vei ira na vica vata na udolu,+ e vosota na cala kei na talaidredre kei na ivalavala ca,+ ia ena totogitaki koya dina e cala,+ ena totogitaki ira na luvedra kei na makubudra ena cala i tamadra, ena ikatolu ni itabatamata kei na ikava ni itabatamata.”+
8 E cuva totolo sara o Mosese ina qele qai davo vakatoboicu.
9 E kaya: “I Jiova, keu bau nanumi e matamuni, ni yalovinaka Jiova ni tomani keimami ena neimami ilakolako,+ ni keimami tamata yalokaukaua,*+ ni vosota na neimami cala kei na neimami ivalavala ca,+ ni tauri keimami moni taukeni keimami.”
10 E sauma o koya: “Au sa cakava qo e dua na veiyalayalati: Au na cakava e matadra na nomuni tamata kece na ka veivakurabuitaki e se sega vakadua ni caka* e vuravura taucoko se ina veimatanitu kece,+ ia o ira na tamata kece oni tiko ena kedra maliwa era na raica na cakacaka i Jiova, ni vakatubuqoroqoro na ka au cakava tiko vei kemuni.+
11 “Ni vakatudaliga ina ka au vakaroti kemuni tiko kina nikua.+ Au sa cemuria tiko mai matamuni na Amoraiti, na kai Kenani, na Itaiti, na Perisaiti, na Aivaiti, kei na Jepusaiti.+
12 Ni qarauna moni kua ni veiyalayalati kei ira na lewe ni veivanua oni lako tiko kina,+ de qai yaco me icori ena kemuni maliwa.+
13 Ia moni talaraka na nodra icabocabonisoro, ni vorovorolaka na nodra vatu ni sokalou, ni musumusuka tale ga na nodra duru ni sokalou.*+
14 Moni kua ni cuva vua e dua tale na kalou,+ ni o Jiova e kilai ni* dau vinakata me qaravi duadua ga.* Io, o koya na Kalou e vinakata me qaravi duadua ga.+
15 Qarauna me kua ni caka e dua na veiyalayalati kei ira na lewenivanua, nira dau valavala vakasaqamua vei ira na nodra kalou ra qai vakacaboisoro vei ira na nodra kalou,+ ena sureti iko e dua o qai kana mai na nona isoro.+
16 O na qai taura sara ga eso na luvedra yalewa me nodra na luvemu tagane,+ era na qai valavala vakasaqamua na luvedra yalewa vei ira na nodra kalou, era na vakavuna mera valavala vakasaqamua tale ga na luvemu tagane vei ira na nodra kalou.+
17 “Mo kua ni cakava na kalou ena kaukamea waicala.+
18 “Mo vakananuma na Soqo ni Madrai Sega ni Vakaleveni.+ O na kania na madrai sega ni vakaleveni me vaka au vakaroti iko kina, mo cakava qo me siga vitu ena kena gauna lokuci ena vula o Epipi,*+ ni o biuti Ijipita mai ena vula o Epipi.
19 “Na ulumatua tagane kece* e noqu,+ wili kina na nomu manumanu kece, se mani imatai ni bulumakau tagane se sipi.+
20 Na imatai ni asa e sucu mai, mo volia lesu ena sipi. Ke o sega ni volia lesu, mo qai musuka na domona. Na ulumatua kece vei ira na luvemu tagane mo volia lesu.+ Me kua ni dua e lako ligalala mai e mataqu.
21 “Ono na siga mo cakacaka kina, ia mo cegu* ena ikavitu ni siga.+ Ke mani gauna ni siviyara se gauna ni tatamusuki, mo cegu ga.
22 “Mo cakava na Soqo ni Macawa me baleta na isevu matua ni witi e tamusuki, kei na Soqo ni Kumukumuni* ena icavacava ni yabaki.+
23 “Mera rairai yani vakatolu ena dua na yabaki na nomu tagane kece ena mata ni Turaga dina, o Jiova, na Kalou ni Isireli.+
24 Niu na cemuria mai matamu na veimatanitu,+ au na vakalevutaka na nomu vanua, ena sega sara ni dua me vinakata na nomu vanua ni o lako cake tiko mo rairai ena mata i Jiova na nomu Kalou, vakatolu ena dua na yabaki.
25 “Mo kua ni cabora vata na dra ni noqu isoro kei na ka e vakaleveni.+ Me kua ni maroroi tiko me yacova na mataka na isoro ni soqo ni Lakosivia.+
26 “Na isevu vinaka duadua mai na nomu qele mo kauta ina vale i Jiova na nomu Kalou.+
“Mo kua ni vakasaqara na me gone ena wainisucu i tinana.”+
27 E kaya tale vei Mosese o Jiova: “Mo vola na vosa qo,+ niu cakava tiko e dua na veiyalayalati kei iko kei ira na Isireli, me vaka ga na vosa qo.”+
28 E tiko voli mai kea kei Jiova me 40 na siga qai 40 na bogi. E sega ni kania e dua na madrai se gunu wai.+ E qai vola ena vatu raraba na vosa ni veiyalayalati, na iVunau e Tini.*+
29 E siro mai na Ulu i Saineai o Mosese, qai taura tiko e ligana na rua na vatu raraba ni iVakadinadina.+ Ni siro mai na ulunivanua, e sega ni kila o Mosese ni sa ramase tu na kuli ni matana, ni rau a veivosaki tiko kei na Kalou.
30 Ni raici Mosese o Eroni kei ira kece na Isireli, era raica ni sa ramase tu na kuli ni matana, ra qai rere ni torovi koya yani.+
31 Ia e kacivi ira o Mosese, mani lako yani vua o Eroni kei ira kece na iliuliu ni isoqosoqo, qai veivosaki kei ira o Mosese.
32 Oti oya era toro yani vua o ira kece na Isireli, e qai solia vei ira na ivakaro kece e solia vua o Jiova ena Ulu i Saineai.+
33 Ni dau veivosaki oti kei ira o Mosese, e dau biuta e matana e dua na iubi.+
34 Ia ni dau lako yani o Mosese ena mata i Jiova me veivosaki kei koya, e dau kauta laivi na iubi me yacova ni sa curu i tuba.+ Oti e curu i tuba me lai vakatakila vei ira na Isireli na ivakaro e soli vua.+
35 Era raica na Isireli ni sa ramase tu na kuli ni mata i Mosese, e qai dau biuta lesu i matana o Mosese na iubi, me yacova ni lako i loma me lai veivosaki kei na Kalou.*+
iVakamacala e ra
^ Se “yalololoma.”
^ Se “yalovinaka.”
^ Ipe., “domoqa.”
^ Se “buli.”
^ Raica na iVakamacala ni Vosa.
^ Se “sega ni dua me suguta na nona itutu.”
^ Ipe., “Jiova, na yacana o.”
^ Ipe., “na ka kece e dolava na katonigone.”
^ Se “vakatabuya me siga ni vakacecegu.”
^ E kilai tale ga me Soqo ni Valetabanikau (Valevakacevaceva).
^ Ipe., “na Vosa e Tini.”
^ Ipe., “koya.”
