Lako Yani 38:1-31
38 E cakava o koya na icabocabo ni isoro kama mai na kau na akasia. E sukuea,* e lima na kiupiti* na kena balavu, e lima na kiupiti na kena raba, qai tolu na kiupiti na kena cere.+
2 Sa qai cakava o koya na kena ileu ena tutuna vava. Na kena ileu e caka vata ga na icabocabonisoro. E ubia sara ena kopa.+
3 Oti oya e cakava o koya na iyaya kece ni icabocabonisoro, na vokete, na isivi, na boulu, na icula, kei na itawatawa ni bukawaqa. E caka mai na kopa na iyaya kece qo.
4 E cakava tale ga e dua na lawalawa ni icabocabonisoro e tali mai na kopa, e ruku ni batibatina me yaco ena kena veimama.
5 E cakava e va na rigi kopa ena tutuna vava, volekata na lawalawa kopa, me itautauri ni ivua.
6 Oti oya e cakava mai na kau na akasia na ivua qai ubi rau ena kopa.
7 E daramaka na ivua ena loma ni rigi ena yasa ni icabocabonisoro me kau kina. E cakava na icabocabonisoro me vaka na kisi kau vakalomana.
8 E cakava na beseni mai na kopa+ kei na kena itutu kopa, e vakayagataka na nodra iloilo* na yalewa era lesi mera veiqaravi ena icurucuru ni valelaca ni veitavaki.
9 E qai cakava na rara.+ Ena ceva ni rara e qara ina ceva, e cakava o koya na kena ilatilati mai na lineni matailalai e muloci, e 100 na kiupiti.+
10 E caka mai na kopa na 20 na kena duru kei na 20 na kena veleti e sivi vakalomana, e siliva tale ga na iqaso ni duru kei na kedra isema.
11 E yasana tale ga ena vualiku, e 100 na kiupiti na kena ilatilati. E caka mai na kopa na 20 na kena duru kei na 20 na kena veleti e sivi vakalomana. Era siliva na iqaso ni duru kei na kedra isema.
12 Ia ena yasana ena ra, e 50 na kiupiti na ilatilati. E tini na kena duru, e tini tale ga na veleti e sivi vakalomana, e siliva na iqaso ni duru kei na kedra isema.
13 Na raba ni yasana ena tokalau donuya na icabecabe ni siga e 50 na kiupiti.
14 E 15 na kiupiti na ilatilati ena dua na muana, e tolu tale ga na duru qai tolu na veleti e sivi vakalomana.
15 Ena dua tale na muana ena yasana adua ni icurucuru ni rara, e 15 na kiupiti na ilatilati, e tolu na kena duru qai tolu na veleti e sivi vakalomana.
16 Era caka kece mai na lineni matailalai e muloci na ilatilati e lili wavokita tu na rara.
17 Era kopa na veleti e sivi vakalomana me ka ni duru, e siliva na iqaso ni duru kei na kedra isema, era ubi ena siliva na dela ni duru, ra qai siliva tale ga na ivesu ni duru kece ena rara.+
18 Na ilati* ni icurucuru ni rara, e tali mai na wa karakarawa, na vutinisipi lokaloka, na isulu kulakula, kei na lineni matailalai e muloci. E 20 na kiupiti na kena balavu, qai 5 na kiupiti na kena cere, me tautauvata kei na balavu ni ilatilati ni rara.+
19 E caka mai na kopa na kena duru vava kei na va na kena veleti e sivi vakalomana. E siliva na kena iqaso kei na kedra isema, qai ubi ena siliva na dela ni duru.
20 Era kopa na pini kece ni valelaca ni valeniveitavaki, kei na kena e wavokita na rara.+
21 Qo na ka e wiliki ena valeniveitavaki, na valeniveitavaki ni iVakadinadina,+ a wiliki me salavata kei na ivakaro i Mosese, me nodra itavi na Livai+ ena veidusimaki nei Icama,+ na luvei Eroni na bete.
22 E qai cakava na ka kece e vakarota o Jiova vei Mosese o Pisalieli,+ na luvei Urei, na luvei Ure mai na yavusa o Juta.
23 A tiko vata kei koya o Aoliapi,+ na luvei Eiisamaki mai na yavusa o Tani, e kenadau ena cakacakaniliga, ena culaiukuuku, qai dau talitali ena wa karakarawa, na vutinisipi lokaloka, na isulu kulakula, kei na lineni matailalai.
24 Na koula taucoko e vakayagataki ena cakacaka kece ni vanua tabu e tautauvata kei na levu ni koula ni isoro yalovaki,+ e 29 na taledi* qai 730 na sikeli,* ena ivakarau tudei ni sikeli ena vanua tabu.*
25 Na nodra siliva tale ga na lewe ni isoqosoqo era volayacataki, e 100 na taledi qai 1,775 na sikeli, ena ivakarau tudei ni sikeli ena vanua tabu.*
26 Na veimama ni sikeli ni tamata yadua, e veimama ni sikeli ena ivakarau tudei ni sikeli ena vanua tabu,* vei ira na tagane yadua era volayacataki mai na yabaki 20 lako cake,+ na kedra iwiliwili e 603,550.+
27 Na vakawaicalataki ni veleti e sivi vakalomana ni vanua tabu kei na veleti e sivi vakalomana ni ilatilati, e vakayagataki kina e 100 na taledi, 100 na veleti e sivi vakalomana e tautauvata kei na 100 na taledi, dua na taledi ena dua na veleti e sivi vakalomana.+
28 Mai na 1,775 na sikeli e cakava kina o koya na iqaso ni duru, e ubia na dela ni duru qai semati ira.
29 Na kopa e cabori* e 70 na taledi qai 2,400 na sikeli.
30 E cakava kina o koya na veleti e sivi vakalomana ni icurucuru ni valelaca ni veitavaki, na icabocabonisoro kopa, na kena lawalawa kopa, na iyaya kece ni icabocabonisoro,
31 na veleti e sivi vakalomana wavokita na rara, na veleti e sivi vakalomana ni icurucuru ni rara, kei na pini kece ni valelaca+ ni valeniveitavaki kei na pini kece ni valelaca wavokita na rara.
iVakamacala e ra
^ Tautauvata na balavu ni yasana kece.
^ Oya na iloilo kaukamea dau masi sara vakavinaka.
^ Se “ilatilati.”
^ Se “na sikeli tabu.”
^ Se “na sikeli tabu.”
^ Se “na sikeli tabu.”
^ Se “isoro yalovaki.”
